ސްވިޑަންގެ ހައި ސްކޫލެއްގައި ކަނޑިއަކުން ހަމަލާދީ އެކަކު މަރާލައި، އިތުރު ތިން މީހަކު ޒަހަމްކޮށްލި 18 އަހަރުގެ ފިރިހެނަކަށް ފުލުހުން ބަޑިޖަހައި ހައްޔަރުކޮށްފި އެވެ.
ހުކުރު ދުވަހު ހިނގި މި ހާދިސާގައި ހަމަލާދިން މީހާއަކީ އެ ސްކޫލުގެ ކުރީގެ ދަރިވަރެއް ކަމަށް މީޑިއާ ރިޕޯޓުތައް ބުނެ އެވެ.
މި ހާދިސާ ހިނގާފައިވަނީ ހުކުރު ދުވަހުގެ މެންދުރުފަހުގެ ވަގުތެއްގައި، ގާތްގަނޑަކަށް 13،000 މީހުންގެ އާބާދީއެއް އޮންނަ ސްވިޑަންގެ މެދުތެރޭ ރަށެއް ކަމަށްވާ ފަގަރްސްޓާގައި ހުންނަ ބްރިނެލް ހައި ސްކޫލުގަ އެވެ.
މި ހާދިސާ ހިނގިއިރު، ސްކޫލްތައް ހޫނު މޫސުމުގެ ބަންދަށްފަހު އަލުން ހުޅުވިތާ މާގިނަ ދުވަހެއް ނުވެ އެވެ. އަދި ބައެއް ދަރިވަރުންނަށް އެއީ ސްކޫލުގެ ފުރަތަމަ ދުވަހެވެ.
ފުލުހުން ބޭއްވި ނޫސްވެރިންގެ ބައްދަލުވުމެއްގައި ބުނީ، މީހަކު މެރުމުގެ ތުހުމަތުގައި ފުލުހުން ބަޑިޖަހައި ހައްޔަރުކޮށްފައިވަނީ އުމުރުން 18 އަހަރުގެ ފިރިހެނެއް ކަމަށެވެ.
އެ ސަރަހައްދުގެ ފުލުހުންގެ ވެރިޔާ ޓޮމީ އަލްރިކްސަން ވިދާޅުވީ، 16 އަހަރާއި 20 އަހަރާ ދެމެދުގެ 450 ދަރިވަރުން ކިޔަވަމުންދާ އެ ސްކޫލަށް ހަމަލާގެ ރިޕޯޓު ލިބުމާއެކު ފުލުހުން ވަރަށް އަވަހަށް އެތަނަށް ދިޔަ ކަމަށެވެ.
"ފުރަތަމަ ދިޔަ ޕެޓްރޯލް ޓީމު ސްކޫލަށް ވަދެ، ބަޑިޖަހައި ހަމަލާދިން މީހާ ކޮންޓްރޯލްކޮށްފައިވާ ކަމުގެ މައުލޫމާތު ދިން،" އޭނާ ވިދާޅުވި އެވެ.
ސްވިޑަންގެ ދައުލަތުގެ މީޑިއާ، އެސް.ވީ.ޓީ އިން ނަން ހާމަނުކުރާ މަސްދަރުތަކާ ހަވާލާދީ ރިޕޯޓުކޮށްފައިވާ ގޮތުގައި، ހެލްމެޓެއް އަޅައިގެން ކަނޑިއެއް ހިފައިގެން ހުރެ ހަމަލާދިން މީހާއަކީ އެ ސްކޫލުގެ ކުރީގެ ދަރިވަރެކެވެ. އަދި އޭނާއަކީ މީގެ ކުރިން ވެސް މާރާމާރީގެ މައްސަލައެއްގައި ކުށް ސާބިތުވެފައިވާ މީހެއް ކަމަށް އެ ނޫހުން ބުނެ އެވެ.
އެ ސަރަހައްދުގެ ސިއްހީ އިދާރާތަކުން ބުނި ގޮތުގައި، މި ހަމަލާގައި ޒަހަމްވި މީހުންގެ ތެރެއިން ދެ ކުދިންނަކީ ފުރާވަރުގެ ފިރިހެން ކުދިންނެވެ. އެ ދެ ކުދިންނަށް ސީރިއަސް އަނިޔާތަކެއް ލިބިފައިވާއިރު، އަނިޔާވި ތިންވަނަ މީހާ މިހާރު ވަނީ ފަރުވާއަށްފަހު ހޮސްޕިޓަލުން ދޫކޮށްލާފަ އެވެ.
