ހޮލީވުޑްގެ މަޝްހޫރު އެކްޓްރެސް އަދި ލަވަކިޔުންތެރިޔާ ސެލީނާ ގޯމޭޒް އާއި އޭނާގެ މަންމަ ގުޅިގެން އުފައްދާފައިވާ ނަފްސާނީ ދުޅަހެޔޮކަމާ ބެހޭ ކުންފުނި، "ވޮންޑާމައިންޑް ގްލޯބަލް" އަށް އިންވެސްޓްކުރި ފަސް ފަރާތަކުން އޭނާއާ ދެކޮޅަށް ދައުވާކޮށްފި އެވެ.
ހިއްސާދާރުން ކުރި ދައުވާގައި ބުނެފައިވަނީ، އެ ބްރޭންޑް ކުރިއެރުވުމަށް "އަމަލީ ގޮތުން މަސައްކަތްކުރާނެ" ކަމަށް ސެލީނާ ގޯމޭޒް ވީ ވައުދުތައް ފުއްދާފައިނުވާ ކަމަށެވެ. އަދި އޭނާގެ މަސްއޫލިއްޔަތުތަކަށް "އިންތިހާއަށް އިހުމާލުވުމުގެ" ސަބަބުން، ކުންފުނި މިހާރު އޮތީ "މާލީ ބޮޑު ކާރިސާއެއްގެ" ތެރޭގައި ކަމަށް ވެސް އެ ފަރާތްތަކުން ބުނެފައިވެ އެވެ.
މި ދައުވާގެ ބޭނުމަކީ އިންވެސްޓްމަންޓްގެ ގޮތުގައި ދީފައިވާ ކަމަށް ބުނާ ގާތްގަނޑަކަށް 1.2 މިލިއަން ޑޮލަރު އަނބުރާ ހޯދުމާއި، މައްސަލައިގެ ހަރަދާއި ލިބުނު ގެއްލުމުގެ ބަދަލު ހޯދުމެވެ.
ޅަ އުމުރުގައި އެކްޓަރެއްގެ ގޮތުގައި މަޝްހޫރުކަން ހޯދުމަށްފަހު ޕޮޕް މިއުޒިކްގެ ދާއިރާއަށް ނުކުތް ސެލީނާ ގޯމޭޒް، ނަފްސާނީ ދުޅަހެޔޮކަމާ ބެހޭ މި ޕްލެޓްފޯމް އުފެއްދީ މީގެ ފަސް އަހަރު ކުރިން އޭނާގެ މަންމަ މެންޑީ ޓީފީ އާއި ވިޔަފާވެރިޔާ ޑެނިއެލާ ޕިއަރސަންއާ ގުޅިގެންނެވެ. މި މަސައްކަތް އޭނާ ފެށީ، އަމިއްލަ ނަފްސާނީ ދުޅަހެޔޮކަމުގެ މައްސަލަތަކާއި، ހާއްސަކޮށް ބައިޕޯލާ ޑިސްއޯޑާ ތަހައްމަލުކުރަމުންދާ ކަމަށް އާންމުކޮށް ހާމަކުރުމަށްފަހުގަ އެވެ.
އުމުރުން 34 އަހަރުގެ ސެލީނާ ގޯމޭޒްއަކީ ސޯޝަލް މީޑިއާގައި 500 މިލިއަނަށް ވުރެ ގިނަ ފޮލޯވަރުންނާއެކު ދުނިޔޭގައި އެންމެ ނުފޫޒު ގަދަ އެއް އަންހެން ފަންނާނެވެ. އޭނާގެ މިލްކިއްޔާތު ގާތްގަނޑަކަށް އެއް ބިލިއަން ޑޮލަރަށް އަރާއިރު، 2020 ވަނަ އަހަރު އޭނާ ވަނީ އަމިއްލަ ނަމާއި ސޫރައާ ގުޅުވައިގެން "ރެއާ ބިއުޓީ" ގެ ނަމުގައި ކޮސްމެޓިކްސް ކުންފުންޏެއް ވެސް އުފައްދާފަ އެވެ.
