ހޯމް މިނިސްޓްރީގައި ތިބި ސިޔާސީ މުވައްޒަފުންގެ އަދަދަކީ ކޮންމެ ދުވަހަކު ވެސް ބަދަލުވަމުންދާ އެއްޗެއް ކަމަށް މިނިސްޓަރު އަލީ އިހުސާން ވިދާޅުވެއްޖެ އެވެ.
ރައްޔިތުންގެ މަޖިލީހަށް އިހުސާން މިއަދު ހާޒިރުކޮށް، ތޮއްޑޫ ދާއިރާގެ މެންބަރު، ހުސައިން ސަމީރު އޭނާއާ ސުވާލުކުރެއްވީ ހޯމް މިނިސްޓްރީގައި ތިބި ސިޔާސީ މުވައްޒަފުންގެ އަދަދަކީ ކޮބައިތޯ އެވެ.
އިހުސާން ވިދާޅުވީ އެ މިނިސްޓްރީގައި ތިބޭ ސިޔާސީ މުވައްޒަފުންގެ އަދަދު ކޮންމެ ދުވަހަކު ވެސް ބަދަލުވަމުން ދާތީ، މިއަދުގެ މި ވަގުތު ސިޔާސީ މުވައްޒަފުން ތިބި އަދަދު ބެލުމަށްފަހު ލިޔުމުން ސަމީރުއަށް އަންގަވާނެ ކަމަށެވެ.
"ހޯމް މިނިސްޓްރީގައި ތިބި ސިޔާސީ މުވައްޒަފުންގެ އެގްޒެކްޓު އަދަދު، އެއީ ކޮންމެ ދުވަހަކުވެސް ހަމަ ބައެއްފަހަރު ބަދަލުވަމުންދާ އެއްޗެއް، އެހެންވީމާ އަޅުގަނޑު ލިޔުމުން މިއަދުގެ މިވަގުތު އޮތް އަދަދު އިއްޒަތްތެރި މެންބަރަށް އަރުވާނަން،" އިހުސާން ވިދާޅުވި އެވެ.
ހޯމް މިނިސްޓްރީގައި ތިބި ސިޔާސީ މުވައްޒަފުންގެ އަދަދު ކޮންމެ ދުވަހަކު ވެސް ބަދަލުވާ ކަމަށް އިހުސާން ވިދާޅުވިއިރު، ސަރުކާރުގެ ސިޔާސީ މުވައްޒަފުންގެ އަދަދު ހާމަކުރުމަށް ރައީސް އޮފީހުން ވަނީ ދެކޮޅު ހަދައިފަ އެވެ.
ސިޔާސީ މުވައްޒަފުންގެ އަދަދާއި، ސިޔާސީ މުވައްޒަފުންނަށް ކުރާ ހަރަދު ހާމަނުކުރާ މައްސަލައިގައި އިންފޮމޭޝަން ކޮމިޝަނަރުގެ އޮފީހުން ވަނީ އެ މައުލޫމާތު ހާމަކުރުމަށް ރައީސް އޮފީހަށް މުހުލަތު ވެސް ދީފަ އެވެ. އެހެންނަމަވެސް، އެ މުހުލަތު ހަމަވިއިރު ވެސް ރައީސް އޮފީހުން އެ މައުލޫމާތު ހާމަކޮށްފައެއް ނުވެ އެވެ.
ސަރުކާރުގެ މިނިސްޓްރީއެއްގައި ތިބޭ ސިޔާސީ މުވައްޒަފުންގެ އަދަދު ކޮންމެ ދުވަހަކު ވެސް ބަދަލުވަމުންދާކަމަށް އިހުސާން ވިދާޅުވިއިރު، ސަރުކާރުގެ ހަރަދު ކުޑަކުރުމުގެ ގޮތުން ކަމަށް ބުނެ ސަރުކާރު ހިއްސާވާ ކުންފުނިތަކުން މުވައްޒަފުން ވަކިކުރުމުގެ މަސައްކަތް އެ ކުންފުނިތަކުން ދަނީ ކުރަމުންނެވެ.
