އިންޑިއާގެ އިރުމަތީ ސްޓޭޓެއް ކަމަށްވާ ޖަރްކަންޑްގައި ސަރުކާރުގެ ވަޒީފާތަކަށް މީހުން ހޮވުމަށް ބާއްވާ އިމްތިހާނުތަކުގެ ނިޒާމު އިސްލާހު ކުރުމަށް ގޮވާލައި، އެތައް ހާސް ބަޔަކު އެ ސްޓޭޓްގެ އެސެމްބްލީއާ ދިމާލަށް ހިނގާލުމެއް ބާއްވައިފި އެވެ.
ޖަރްކަންޑްގެ ވެރިރަށް ރާންޗީގައި ދަރިވަރުންނާއި، ވަޒީފާ ހޯދާ ފަރާތްތަކުގެ އިތުރުން ވޮލަންޓިއަރުން މުޒާހަރާ ކުރަމުންދާތާ މިހާރު ދެ ހަފުތާއަށް ވުރެ ގިނަ ދުވަސް ވެފައިވާއިރު، އެމީހުން ބޭނުންވަނީ އެ ސްޓޭޓްގެ ސަރުކާރުގެ އިމްތިހާނުތައް ހިންގާ ނިޒާމު މުޅިން ބަދަލުކުރުމަށެވެ.
މި މައްސަލައިގައި ސަރުކާރާއެކު އެތައް ފަހަރަކު މަޝްވަރާކޮށް، މުޒާހަރާގެ ބައިވެރިންގެ ބައެއް ޑިމާންޑްތައް ސަރުކާރުން ގަބޫލުކޮށްފައިވީ ނަމަވެސް، ހުރިހާ ޑިމާންޑްތަކެއް ފުރިހަމަވަންދެން އިހުތިޖާޖު ކުރިއަށް ގެންދާނެ ކަމަށް މުޒާހަރާގެ ބައިވެރިން ބުނެ އެވެ.
މި މުޒާހަރާ މި ފެށުނީ، އިންޑިއާގެ އިމްތިހާނު ކަރުދާސްތައް ލީކުވުމާ ގުޅިގެން ކުރިއަށްދިޔަ "ކުރަފި" މުޒާހަރާތަކުގެ ތެރެއިން، އެތައް ހާސް ޒުވާނުންނެއް ދިއްލީގައި ހުންނަ ގައުމީ ޕާލަމެންޓަށް ހިނގާލުމެއް ބާއްވަން މަސައްކަތް ކުރިތާ ހަފުތާތަކެއް ފަހުންނެވެ.
އިންޑިއާގެ "ކޮކްރޯޗް ޖަންތާ ޕާޓީ" (ސީޖޭޕީ) އަކީ ސިޔާސީ ޕާޓީއެއް ނޫން ނަމަވެސް، އެ ޖަމާއަތުން ފަސް ހަފުތާ ވަންދެން ކުރިއަށް ގެންދިޔަ މުޒާހަރާތައް، އެޑިއުކޭޝަން މިނިސްޓަރު ދަރުމެންދުރަ ޕްރަދާން އިސްތިއުފާ ދެއްވުމާ ގުޅިގެން ޖުލައި 25 ވަނަ ދުވަހު ވަނީ ހުއްޓާލާފަ އެވެ.
ސީޖޭޕީން ކުރިއަށް ގެންދިޔަ އެ ހަރަކާތްތަކަށް އިންޑިއާގެ އެކި ސްޓޭޓްތަކުގެ ދަރިވަރުންގެ ބޮޑު ތަރުހީބެއް ލިބިފައިވެ އެވެ.
ޖަރްކަންޑްގެ މުޒާހަރާގެ ބައިވެރިން ޖުލައި 25 އިން ފެށިގެން ރާންޗީގެ ސްޓޭޑިއަމެއްގައި ކޭމްޕް ޖަހާފައިވާއިރު، ބައެއް މީހުން ނިދަނީ އެ ތަނުގަ އެވެ. އަދި ބައެއް މީހުން ވަނީ ބަނޑުހައިހޫނުކަމުގެ ހަޅުތާލެއް ވެސް ފަށާފަ އެވެ.
މިކަން ފެށެން މެދުވެރިވި މައިގަނޑު ސަބަބަކީ، ޖަރްކަންޑް ޕަބްލިކް ސާވިސް ކޮމިޝަން (ޖޭޕީއެސްސީ) އިން މިދިޔަ އޭޕްރީލް މަހު ބޭއްވި ސިވިލް ސާވިސްގެ ޕްރިލިމިނަރީ އިމްތިހާނެވެ. އިމްތިހާނުގެ ނަތީޖާއަށް ނުފޫޒު ފޯރުވާފައިވާ ކަމަށް ބުނެ އާންމުންގެ މެދުގައި ވަނީ ބޮޑު ޝައްކުތަކެއް އުފެދިފަ އެވެ.
ސްޓޭޓް ސަރުކާރުން ވަނީ ދަރިވަރުންނަށް އިންސާފު ހޯދައިދޭނެ ކަމުގެ ޔަގީންކަން ދީފަ އެވެ. އިމްތިހާނާ ގުޅޭ ތުހުމަތުތައް ޖަރްކަންޑްގެ ކްރިމިނަލް އިންވެސްޓިގޭޝަން ޑިޕާޓްމަންޓް (ސީއައިޑީ) އިން ތަހުގީގު ކުރަމުންދާއިރު، މިހާތަނަށް 12 އަށް ވުރެ ގިނަ މީހުން ވަނީ ހައްޔަރުކޮށްފަ އެވެ.
އިމްތިހާނުގެ ބައެއް ކަންކަން ކުރިއަށް ގެންދިޔަ އަމިއްލަ ކުންފުންޏެއް ހޮވި ގޮތާ މެދު ކެންޑިޑޭޓުން ސުވާލު އުފެއްދުމާ ގުޅިގެން، ތަހުގީގު ކުރާ ފަރާތްތަކުން ދަނީ އެ ކުންފުނީގެ ދައުރު ވެސް ބަލަމުންނެވެ.
މުޒާހަރާގެ ބައިވެރިންނާއެކު އާދީއްތަ ދުވަހު ބޭއްވި މަޝްވަރާތަކަށް ފަހު، މައްސަލަ ޖެހިފައިވާ އިމްތިހާނުގެ އިތުރުން އެހެން ދެ އިމްތިހާނެއް ބާތިލުކުރުމަށް ސަރުކާރުން ވަނީ އެއްބަސްވެފަ އެވެ. އަދި ޖޭޕީއެސްސީގެ ތިން މެންބަރަކު އިސްތިއުފާ ދެއްވާފައިވާ ކަމަށް ވެސް ރިޕޯޓްތައް ބުނެ އެވެ.
މި ބަދަލުތައް އައިސްފައިވަނީ ޖޭޕީއެސްސީގެ ޗެއާމަން އެލް ކިއަންގްޓޭ ޖުލައި 22 ގައި މަގާމުން ވަކިވެވަޑައިގަތުމާ ގުޅިގެންނެވެ. ތަހުގީގުގެ ބައެއްގެ ގޮތުގައި އޭނާއާ ވެސް ވަނީ ސުވާލުކޮށްފަ އެވެ.
ނަމަވެސް މުޒާހަރާގެ ބައިވެރިން ބުނަނީ އަދިވެސް ގިނަ ޑިމާންޑްތަކެއް ފުރިހަމަނުވާ ކަމަށެވެ. އޭގެ ތެރޭގައި އެންމެ މުހިންމު ކަމެއްގެ ގޮތުގައި އެދެނީ، އިންޑިއާގެ ފެޑަރަލް ތަހުގީގީ އިދާރާ، ސެންޓްރަލް ބިއުރޯ އޮފް އިންވެސްޓިގޭޝަން (ސީބީއައި) މެދުވެރިކޮށް މި މައްސަލަ ތަހުގީގު ކުރުމަށެވެ.
