މާލޭގެ ކުދި އަދި ބާރުބޮޑު މަގުތަކާއި، ސިނަމާލެ ބްރިޖުގެ ހައިވޭއަށް ނުކުމެލުމާއެކު އަބަދުވެސް ފެންނަނީ އަވަސްވެގެން އުޅޭ އުޅަނދުފަހަރެވެ. ނަމަވެސް، މި އަވަސްވެގަތުމުގެ ފަހަތުގައި އޮތީ މަގުމަތީގެ ބޮޑު ނުރައްކަލެކެވެ.
ދިވެހި ފުލުހުންގެ ހިދުމަތުން އިއްޔެ އާންމުކޮށްފައިވާ ތަފާސްހިސާބުތަކަށް ބަލާއިރު، މިއަހަރުގެ ފުރަތަމަ ހަ މަސްދުވަހު (ޖަނަވަރީ އިން ޖޫން އަށް) މާލެ އާއި ބްރިޖު ހައިވޭގައި އެކަނިވެސް 1،355 އެކްސިޑެންޓް ވަނީ ރެކޯޑުކުރެވިފަ އެވެ. މިއީ ދުވާލެއްގެ މައްޗަށް އެވްރެޖްކޮށް 7.49 އެކްސިޑެންޓެވެ.
މި އަހަރުގެ ފުރަތަމަ ހަ މަސްދުވަހުގެ ތެރޭގައި މަހެއްގެ މައްޗަށް އެވްރެޖްކޮށް 226 އެކްސިޑެންޓް ހިނގާފައިވެއެވެ. އޭގެ ތެރެއިން އެންމެ ގިނަ އެކްސިޑެންޓް ރެކޯޑުކުރެވުނީ އަހަރުގެ ފެށުނު ޖަނަވަރީ މަހު އެވެ. އެ މަހު 253 އެކްސިޑެންޓް ހިނގިއެވެ.
އެންމެ މަދުން އެކްސިޑެންޓް ރެކޯޑުކުރެވިފައިވަނީ ފެބްރުއަރީ މަހުއެވެ. އެއީ 191 އެކްސިޑެންޓެވެ. ނަމަވެސް، ފެބްރުއަރީ މަހަށްފަހު މާޗު މަހު ވަނީ އަދަދުތައް 23.56 ޕަސެންޓު އިތުރެވެ.
| މަސް | އެކްސިޑެންޓުގެ އަދަދު |
| ޖަނަވަރީ | 253 |
| ފެބްރުއަރީ | 191 |
| މާޗު | 236 |
| އެޕްރީލް | 232 |
| މޭ | 238 |
| ޖޫން | 205 |
އެކްސިޑެންޓްތައް ގިނައީ މާލޭގައި، އަދި ދުވާލު
މުޅި ހަ މަސްދުވަހުގެ ތަފާސްހިސާބަށް ބަލާއިރު، އެކްސިޑެންޓްތަކުގެ ބޮޑު ޕަސެންޓެއް ހިނގާފައިވަނީ މާލޭގެ މަގުތަކުގަ އެވެ.
- މާލެ: 83.25 ޕަސެންޓު (1,128 އެކްސިޑެންޓް) – މިއީ ކޮންމެ 5 އެކްސިޑެންޓަކުން 4 އަށްވުރެ ގިނަ އެކްސިޑެންޓެވެ.
- ބްރިޖާއި ހައިވޭ: 16.75 ޕަސެންޓު (227 އެކްސިޑެންޓް)
ފުލުހުން ބުނި ގޮތުގައި ވަގުތަށް ބަލާއިރު، އެކްސިޑެންޓްތަކުގެ ގާތްގަނޑަކަށް ތިންބައިކުޅަ ދެބައި ނުވަތަ 66.49 ޕަސެންޓު (901 އެކްސިޑެންޓް) ހިނގާފައިވަނީ ދުވާލުގެ ވަގުތުގަ އެވެ.
ރޭގަނޑުގެ ވަގުތްތަކުގައި ހިނގާފައި ވަނީ 33.51 ޕަސެންޓް (454 އެކްސިޑެންޓް) އެވެ. ދުވާލު ހިނގި އަދަދު ރޭގަނޑަށްވުރެ 447 އިތުރުވީ ނަމަވެސް، މިއީ މަގުތަކުގައި އުޅަނދުތައް ބޭނުންކުރާ ނިސްބަތަށް ނުބަލައި، ވަކި ވަގުތަކީ ނުރައްކާ ބޮޑު ވަގުތެއްކަން މިންކުރެވޭނެ އަދަދެއް ނޫން ކަމަށް ފުލުހުން ބުނެފައިވެ އެވެ.
އަނިޔާތަކާއި މާލީ ބޮޑެތި ގެއްލުންތައް
މި ހަ މަސްދުވަހުގެ ތެރޭގައި ހިނގި ހާދިސާތަކުގައި ދެ މީހެއްގެ ފުރާނަ ވަނީ ގެއްލިފަ އެވެ. އަދި 31 މައްސަލައެއްގައި ސީރިއަސް އަނިޔާތައް ރެކޯޑުކުރެވުނުއިރު، 1,322 މައްސަލައެއްގައި ލިބިފައިވަނީ ކުދި އަނިޔާތަކެވެ.
ފުރަތަމަ ހަ މަސް ދުވަހު ދެ މީހަކު މަރުވިއިރު، މި ހިނގަމުންދާ ޖުލައި މަހު ވެސް އެކްސިޑެންޓެއްގައި ޒުވާނަކު ނިޔާވެފައިވެ އެވެ.
އެކްސިޑެންޓުތަކުގައި ގެއްލުން ލިބެނީ ހަމައެކަނި އިހުމާލުވި ފަރާތުގެ އުޅަނދަކަށް ނޫނެވެ. އެކްސިޑެންޓުގައި ޝާމިލްނުވާ އެހެން ފަރާތްތަކުގެ ގިނަ އަދަދެއްގެ އުޅަނދުތަކަށް ވެސް ގެއްލުން ލިބިފައިވެ އެވެ.
ތަފާސް ހިސާބުތަކުން ދައްކާ ގޮތުގައި ފުރަތަމަ ހަ މަސް ދުވަހުގެ އެކްސިޑެންޓުތަކުގައި ޖުމްލަ 1482 އުޅަނދުކަށް ގެއްލުން ލިބިފައިވެ އެވެ. މި އުޅަނދުތަކަށް އިންޝުއަރެންސްގެ ތެރެއިން ނަގައިދިން ޖުމްލަ ފައިސާގެ އަދަދު 3.28 މިލިއަން ރުފިޔާއަށް އަރަ އެވެ. އެއީ މަހެއްގެ މައްޗަށް އެވްރެޖުކޮށް 547,437ރ. އެވެ. މައްސަލައަކަށް އެވްރެޖަކީ 2,424ރ. ކަމަށާއި އުޅަނދަކަށް އެވްރެޖްކޮށް 2,216ރ. ކަމަށް ފުލުހުން ބުނެ އެވެ.
"[ނަމަވެސް] މި އެވްރެޖްތަކަކީ ހިސާބުގެ ނިސްބަތުން ބަހާލެވިފައިވާ އަދަދުތަކަކަށް ވުމާއެކު، މިއީ ހިނގި ކޮންމެ އެކްސިޑެންޓެއްގައި ނުވަތަ ގެއްލުން ލިބުނު ކޮންމެ އުޅަނދަކަށް ބަދަލުގެ ގޮތުގައި ފައިސާ ލިބުނުކަން އަންގައިދޭ އަދަދުތަކެއް ނޫން،" ފުލުހުން ބުންޏެވެ.
އިންޝުއަރެންސްގެ ބަދަލު ދިން އުޅަނދުތަކުގެ ތެރޭގައި އެކްސިޑެންޓުވި ހުރިހާ އުޅަނދަކަށް ނުހިމެނޭނެ އެވެ.
ސަމާލުވާންޖެހޭ!
މި އަހަރުގެ ފުރަތަމަ ހަ މަސްދުވަހުގެ ތަފާސްހިސާބުތަކުން ސާފުކޮށް އެނގެނީ މަގުމަތީގެ ނުރައްކާތެރި ކަމެވެ. މަގުމަތީގެ ރައްކާތެރިކަން ކަށަވަރުކުރެވޭނީ ދަތުރުފަތުރުކުރާ ހުރިހާ ފަރާތްތަކުން ޓްރެފިކް ގަވާއިދުތަކަށް ފުރިހަމައަށް ބޯލަނބައި، އަމިއްލަ އަދި އަނެކުންގެ ސަލާމަތަށް ހާއްސަ ސަމާލުކަމެއް ދީގެންނެވެ. ތަންފީޒީ އިދާރާތަކުން ހާއްސަކޮށް ފުލުހުން ވެސް މަގުތަކުގެ ރައްކާތެރިކަން ކަށަވަރުކުރަން އެކަށޭނަ މަސައްކަތްތަކެއް ކޮށްގެނެވެ.
