ވޭސްޓް މެނޭޖުމަންޓު ކޯޕަރޭޝަން (ވެމްކޯ) ގެ ތިލަފުށީ ސައިޓުގައި ރޯވެ އަނދައިގެންދިޔަ ކުނިތައް ހދ. ކުނބުރުދޫއަށް ގެންދިޔުމާ ދެކޮޅަށް މަޖިލީހުގެ ތަޅުގައި އަޑުއުފުލުމުން ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) ގެ ނަން އިއްވައި ތަޅުމުން ނެރެފި އެވެ.
އެކަމާ ގުޅިގެން ކަންބޮޑުވުން ފާޅުކޮށް މިއަދު ހެނދުނު ފިއްޓޭ މަޖިލީހަށް ކުއްލި މައްސަލައެއް ވެސް ހުށަހެޅުއްވި އެވެ. ނަމަވެސް، އެ މައްސަލަ ބަލައިނުގަނެ ވަނި ބޭރުކޮށްލާފަ އެވެ. މައްސަލަ ބޭރުކޮށްލީ 27 މެންބަރުންގެ ވޯޓުންނެވެ.
އެއަށްފަހު ކުރިއަށްގެންދިޔަ ޔޫޓިލިޓީ ރެގިއުލޭޓަރީ އޮތޯރިޓީގެ ގާނޫނަށް އިސްލާހު ގެނައުމުގެ ބިލުގައި ވެސް ފިއްޓޭ ވަނީ އެ މައްސަލައަށް ފުރުސަތު ނުދިނުމުން ކަންބޮޑުވުން ފާޅުކުރައްވާފަ އެވެ. އަދި ވެމްކޯއިން އެގޮތަށް އަމަލުކުރުމުން އުތުރުގެ ރަށްތަށް ވަރަށް ބޮޑަށް ނޭދެވޭ އަސަރުތަކެއް ކުރާަނެކަން ފާހަގަކުރެއްވި އެވެ.
ބަހުސްގައި ބައިވެރިވުމަށް ފަހު ފިއްޓޭ ވަނީ ރިޔާސަތުގެ މޭޒު ކުރިމައްޗަށް ވަޑައިގެން ކުނި ގެންދިޔުމާ ދެކޮޅަށް އަޑުއުފުލާފަ އެވެ. އެއާއެކު ރިޔާސަތު ބަލަހައްޓަވަމުން ގެންދެވި މަޖިލީހުގެ ނައިބު ރައީސް އަހުމަދު ސަލީމް ވަނީ ފިއްޓޭގެ ނަން އިއްވާފަ އެވެ.
މާލެ ސަރަހައްދުގައި އުފެދޭ ހުރިހާ ކުންޏެއް ގެންދާ ތިލަފުށީގައި ރޯވީ ޖުލައި 19، ގަ އެވެ. އެ އަލިފާނުގެ ހާދިސާއާ ގުޅިގެން ވެމްކޯގެ ތިލަފުށީ ސައިޓަށް ގެއްލުންވެ ކުނި ބަލައިގަންނަ މިންވަރު ވެސް ވަނީ މަދުކޮށްފަ އެވެ. އެނދި ހުރިހާ ކުންޏެއް ގެންދަނީ ހދ. ކުނބުރުދޫގައި ހުންނަ ވޭސްޓް މެނޭޖުމަންޓު ފެސިލިޓީއަށް ކަމަށް ވެމްކޯއިން އޮތީ ހާމަކޮށްފަ އެވެ.
ފިއްޓޭ ހުށަހެޅުއްވި މައްސަލާގައި ބުނެފައިވާ ގޮތުގައި އެ ފެސިލިޓީގެ މަސައްކަތްތައް ނިމިފައި ނުވެ އެވެ. އެ ރަށަކީ ވޭސްޓް ޓްރާންސްފާ ސްޓޭޝަނެއް ކަމަށާއި އެހެން ނަމަވެސް ވެމްކޯއިން އެ ރަށް ބޭނުންކުރަން އުޅެނީ އެހެން ބޭނުމެއްގައި ކަމަށް ފިއްޓޭގެ މައްސަލާގައި ބުނެފައިވެ އެވެ.
އެ ކުނީގެ ސަބަބުން އެ ރަށުގެ ގުދުރަތީ ރީތިކަން ގެއްލި، ދަނޑުވެރިކަމާއި ގަސްގަހާގެއްސަށް އިއާދަނުކުރެވޭ ގެއްލުން ލިބުމުގެ ފުރުސަތު އޮތް ކަމަށް އެ މައްސަލާގައި ބަޔާންކޮށްފައިވެ އެވެ. ވެމްކޯގެ އެ ނިންމުމަކީ ރައްޔިތުންގެ ސިއްހަތަށް އޮތް ނުރައްކަލެއް ކަމަށް ފިއްޓޭގެ މައްސަލާގައި ބުނެފައިވެ އެވެ.
ކުޅުދުއްފުށީ ސިޓީގެ މޭޔަރު މުހައްމަދު އާތިފް ވެސް ވަނީ އެއީ "ކޮށްގެންވާނޭ ކަމެއް ނޫން" ކަމަށް ވިދާޅުވެފަ އެވެ.
