ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބުގެ ވޯޓުލުން ކުރިއަށްދިޔަ މަރުކަޒެއްގެ ކައިރީގައި ބޮޑު ހަމަނުޖެހުމެއް ހިންގައިފި އެވެ.
މައުލޫމާތު ލިބިފައިވާ ގޮތުގައި ހަމަނުޖެހުން ހިނގީ ހުޅުމާލޭ ދެވަނަ ފިޔަވަހީގައި ހުންނަ ކާމިލުދީދީ ސްކޫލުގައި ހުރި ހުޅުމާލެ އުތުރު ދާއިރާ ވޯޓު ފޮށި ކައިރީގަ އެވެ.
އެ ހަމަނުޖެހުމުގެ ވީޑިއޯތަކުން ފެންނަ ގޮތުގައި ދެ ގްރޫޕެއްގެ މެދުގައި ބަހުގަ ހަމަލާ ބަދަލުކޮށް އެކަކު އަނެކަކަށް ހަމަލާ ދީފައިވެ އެވެ. އަދި އެ ސްކޫލުގެ ބައެއް ގޮނޑި އާއި މޭޒަށް ވެސް ގެއްލުން ދީފަައިވެ އެވެ. ހަމަނުޖެހުން ކޮންޓްރޯލް ކުރުމަށް ފުލުހުން މަސައްކަތް ކުރާ މަންޒަރު ވެސް ވީޑިއޯއިން ފެނެ އެވެ.
އެ ސަރަހައްދަށް ޕީއެންސީގެ ލީޑަރުން ވަނީ ވަޑައިގަންނަވާފަ އެވެ. އޭގެ ތެރޭގައި މަޖިލީހުގެ ރައީސް އަބްދުއްރަހީމް ހިމެނިވަޑައިގަންނަވަ އެވެ.
މިއަދު ބޭއްވި އިންތިހާބުގައި ޕީއެންސީގެ ދާއިރާތަކާއި ސްޓިއަރިންގް ކޮމިޓީތަކުގެ އެކި މަގާމުތަކަށް 2,500 އަށްވުރެ ގިނަ މީހުން އިންތިހާބު ކުރުމަށް ވަނީ ހަމަޖެހިފަ އެވެ. އޭގެ ތެރެއިން ބައެއް މަގާމުތަކަށް އިންތިހާބަކާ ނުލައި މީހުން ވަނީ ހޮވިފަ އެވެ.
