ރާއްޖެއިން ކުރިން ނައްތާލާފައިވާ ބައްޔެއް ކަމުގައިވާ ހިމަބިހި (މީސްލްސް) އަލުން ފެތުރެން ފަށައި އެތައް ބަޔަކު އެ ބައްޔަށް ޕޮޒިޓިވްވަމުންދާ ދަނޑިވަޅެއްގައި ވެސް މާލޭގައި މަގުމަތީ ބާޒާރާއި ކާނިވަލްތައް ބާއްވަމުން އެބަ ގެންދެ އެވެ.
ހިމިބިއްސަށް ޕޮޒިޓިވްވި މީހުންގެ އަދަދު މިދިޔަ ހަފުތާއަށް ވުރެ މި ހަފުތާގައި ގާތްގަނޑަކަށް ދެ ގުނަ އިތުރުވެ، 121 އަށް ވަނީ އަރާފަ އެވެ. އެޗްޕީއޭއިން މިދިޔަ ހަފުތާ ނިމުނުއިރު ހިއްސާކުރި ތަފާސްހިސާބުތަކުގައި ވަނީ އެ މަސް ނިމުނުއިރު އެ ބައްޔަށް ޕޮޒިޓިވް މީހުންގެ އަދަދަކީ 66 އެވެ.
ހަލުވިކަމާއެކު ހިމަބިހި ފެތުރެމުން އަންނައިރު މާލޭ ރަސްފަންނު ސަރަހައްދުގައި މަގުމަތީ ބާޒާރެއް ބާއްވަމުން އަންނަތާ ހަފްތާއެއްހާ ދުވަސް ވަނީ ވެފަ އެވެ. އެ ސަރަހައްދަށް ކޮންމެ ރެޔަކު ވެސް އެތައް ބަޔަކު ޖަމާވެ އެވެ.
މިިދިޔަ ހަފްތާ ބަންދުގެ ތެރޭގައި ހުޅުމާލޭ ސެންޓްރަލް ޕާކުގައި ބޮޑު އެކްސްޕޯއެއް ވެސް ކުރިއަށްގެންދިޔަ އެވެ. މާދަމާ ޔޫތު ހަބުގައި ގޭމިން ކާނިވަލެއް ވެސް އޮންނާނެކަން ޔޫތު މިނިސްޓްރީން ވަނީ އިއުލާންކޮށްފަ އެވެ.
އޭގެ އިތުރުން، މިއީ ވޯލްޑް ކަޕް ދުވަސްވަރަށް ވުމާއެކު ކޮންމެ ރެޔަކު މެޗުތައް ބެލުމަށް އެތައް ބަޔަކު މާލޭގެ އެކި ސަރަހައްދުތަކަށް ޖަމާވެ އެވެ.
ހުސްވި ހަފުތާގެ ތެރޭގައި އެކަނި 55 މީހެއްގެ ގައިން މި ބަލި ފެނިފައިވެ އެވެ. މިއީ އޭގެ ކުރީ ހަފުތާގައި މި ބައްޔަށް ޕޮޒިޓިވްވީ 44 މީހުންނަށް ވުރެ އިތުރު އަދަދެއް ކަން ފާހަގަކޮށްލެވެ އެވެ.
ހިމަބިހި އަލުން ފެނުމާ ގުޅިގެން ރައްކާތެރިކަމުގެ ފިޔަވަޅެއްގެ ގަޮތުން އެޗްޕީއޭއިން ވަނީ ވެކްސިން ދިނުމުގެ ކެމްޕެއިނެއް ފަށާފަ އެވެ.
އެޗްޕީއޭއިން ވަނީ ބަލީގެ އަލާމާތްތައް ހުރިހަމަ މީހުން އެއްވެ އުޅޭ ތަންތަނަށް ނުދާން އިލްތިމާސްކޮށްފަ އެވެ. އަދި، ހިމަބިއްސަށް ޝައްކުވެގެން ޓެސްޓް ހަދައިފިނަމަ، ނަތީޖާ ލިބެންދެން އެކަހެރިވެގެން ހުރުމަށާއި ބަލީގެ އަލާމާތެއް ހުރިނަމަ މީހުން އެއްވެ އުޅޭ ތަންތަނަށް ނުގޮސް ގޭގައި މަޑުކުރަން އެދިފައިވެ އެވެ.
ހިމަބިއްސަކީ 2017 ވަނަ އަހަރު ރާއްޖެއިން މުޅިން ނައްތާލާފައިވާ ބައްޔެއްގެ ގޮތުގައި ޑަބްލިއުއެޗްއޯއިން ކަނޑައަޅާފައިވާ ބައްޔެކެވެ. ނަމަވެސް 2020 ވަނަ އަހަރާއި 2023 ވަނަ އަހަރުގެ އޭޕްރިލް މަހުގައި ވެސް ވަނީ ހިމަބިހީގެ ކޭސްތަކެއް ރާއްޖެއިން ފެނިފަ އެވެ. އެ ކޭސްތައް އޭރު ވަނީ ކޮންޓްރޯލް ކޮށްފަ އެވެ.
ހިމަބިހިން ރައްކާތެރިވުމުގެ ވެކްސިން ދެނީ ދެ ޑޯޒަކަށް ބަހާލައިގެންނެވެ. ފުރަތަމަ ޑޯޒް ދެނީ އުމުރުން އެއް އަހަރުގަ އެވެ. ދެވަނަ ޑޯޒް ދެނީ އުމުރުން ގާތްގަނޑަކަށް ތިން އަހަރުގަ އެވެ. މިހާރު ވެކްސިންދެމުން ދަނީ ދެ ޑޯޒް ފުރިހަމަ ނުކުރާ ފަރާތްތަކަށެވެ.
ހިމަބިހިން ރައްކާތެރިވުމަށްޓަކައި ކުރަންޖެހޭ އެންމެ މުހިންމު ކަމަކީ ވެކްސިން ޖެހުން ކަމަށް ޑޮކްޓަރުން އަންނަނީ ބުނަމުންނެވެ. އަދި ވެކްސިނާއެކު ރާއްޖެއިން ނައްތާލެވިފައިވާ ބަލިތަކަކީ ކައިރި ގައުމުތަކުން އައިސްދާނެ ބަލިތައް ކަމަށްވާތީ، ވެކްސިން ޖެހުމުގައި ފަރުވާ ކުޑަ ނުކުރަން ޑޮކްޓަރުން އިލްތިމާސްކުރެ އެވެ.
