ހިއުސްޓަން، ޔުނައިޓެޑް ސްޓޭޓްސް (ޖުލައި 5) - ފީފާ ވޯލްޑް ކަޕް ފުޓްބޯޅަ މުބާރާތުގައި މޮރޮކޯ އިން ކުރިއަށްދިއުމަކީ މިހާރު ދުނިޔޭގެ ފުޓްބޯޅައިގައި "ސަޕްރައިޒެއް"ގެ ގޮތުގައި ބެލެވޭނެ ކަމެއް ނޫން ކަމަށް މޮރޮކޯގެ ކޯޗު، މުހައްމަދު އުއާބީ ބުނެފި އެވެ.
މޮރޮކޯ އިން މި ފަހަރުގެ ވޯލްޑް ކަޕްގެ ކުއާޓާ ފައިނަލަށް ދަތުރުކުރީ ރޭ ކުޅުނު ގަދަ 16 ބުރުގެ މެޗުގައި މުބާެރާތުގެ އެއް ހޯސްޓް ކަމަށްވާ ކެނަޑާ އަތުން 3-0 އިން މޮޅުވެގެންނެވެ. މި މެޗުގައި މޮރޮކޯ އިން ޖެހި ތިން ގޯލު ވެސް ކާމިޔާބުކުރީ މެޗުގެ ދެ ވަނަ ހާފުގަ އެވެ.
ގަތަރުގައި މީގެ ހަތަރު އަހަރު ކުރިން، 2022 ވަނަ އަހަރު ބޭއްވި ފީފާ ވޯލްޑް ކަޕް ފުޓްބޯޅަ މުބާރާތުގެ ސެމީ ފައިނަލުގައި ކުޅުނު މޮރޮކޯ އިން މި ފަހަރުގެ މުބާެރާތަށް ކުރިމަތިލީ ތަފާތު ކޯޗަކާ އެކު އެވެ. އެންމެ ފަހުން، ބޭއްވި ވޯލްޑް ކަޕްގައި މޮރޮކޯ އަށް އިރުޝާދުދިން ވަލީދު ރެގްރާގީ މި އަހަރުގެ އެފްރިކަން ކަޕް އޮފް ނޭޝަންސް އަށް ފަހު މަގާމުން ވަކިވި އެވެ. އެހެންވެ، މޮރޮކޯ އިން އެ ޓީމު ހަވާލުކުރީ މޮރޮކޯ އަށް 20 އަހަރުން ދަށުގެ ފީފާ ވޯލްޑް ކަޕް ކާމިޔާބުކޮށްދިން ކޯޗު އުއާބީއާ އެވެ.
އުއާބީ ބުނީ، މޮރޮކޯ އިން ދުނިޔޭގެ ފުޓްބޯޅައިގައި މި ހޯދަމުން އަންނަ ކުރިއެރުންތަކާ ގުޅިގެން އެ ޓީމާ މެދު މީހުންގެ އުންމީދުތައް ވެސް މަތިވެފައިވާ ކަމަށެވެ.
"އަހަރެމެން މި ހޯދާ ކުރިއެރުންތަކާއި ކާމިޔާބީތަކަކީ ސަޕްރައިޒް ޕެކޭޖުތަކެއް ނޫން. އެހެންވީމަ، ގިނަ ބަޔަކު އުންމީދުކުރޭ އަހަރެެމެން މުބާރާތްތަކުގައި ދުރަށް ދަތުރުކުރާނެކަމަށް. އަހަރެން ބުނާނީ އަހަރެެމެން މި މަސައްކަތް ދިގު މުއްދަތަކަށް ކުރިއަށްގެންދަން ޖެހެއޭ،" އުއާބީ ބުންޏެވެ.
މޮރޮކޯ އިން މި ފަހަރުގެ ވޯލްޑް ކަޕްގެ ކުއާޓާ ފައިނަލުގައި ކުޅެން ޖެހޭނީ ފްރާންސްއާ އެވެ. ގަަތަރުގައި 2022 ވަނަ އަހަރު ބޭއްވި ވޯލްޑް ކަޕްގެ ސެމީ ފައިނަލުން މޮޮރޮކޯ ބަލިވީ ފްރާންސް އަތުންނެވެ. މި ފަހަރުގެ މުބާރާތުގެ ކުއާޓާ ފައިނަލުގައި މި ދެ ޓީމު ބައްދަލުކުރަން ޖެހުމުން، މިއީ ބަދަލުހިފުމުގެ ރޫހެއްގައި ކުރިމަތިލާނެ މެޗެއްތޯ ސުވާލުކުރުމުން އެ އަށް އުއާބީ ޖަވާބު ދީފައިނުވެ އެވެ.
"އަމާޒަކީ ދެވޭ އެންމެ ދުރަށް ދިއުން،" އުއާބީ ބުންޏެވެ.
އުއާބީ ބުނީ ވޯލްޑް ކަޕެއްގައި ކުރިއަށްދެވޭނީ ވަރަށް އުނދަގުލުން ގިނަ ހަރުފަތްތަކެއް ގިރާކޮށްގެން ކަމަށާއި ކޮންމެ ކަމަކީ. ވެސް ގިނަ ތަޖުރިބާތަކެއް ލިބިގެންދާނެ ކަމެއް ކަމަށެެވެ.
