އިދިކޮޅު އެމްޑީޕީގެ ޗެއާޕާސަން ހޮވުމަށް ބޭއްވި އިންތިހާބުގެ ދާއިމީ ނަތީޖާ މިއަދު އިއުލާންކޮށްފި އެވެ.
މި އިންތިހާބު ބޮޑު ތަފާތަކުން ކާމިޔާބުކުރެއްވީ ކުރީގެ ރައީސް މުހައްމަދު ނަޝީދެވެ. ނަޝީދާ އެންމެ ކައިރިން ވާދަކުރެއްވީ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް އެވެ. ތިންވަނަ ލިބުނީ އިބްރާހިމް މުހައްމަދުއަށެވެ.
އިންތިހާބުގެ ދާއިމީ ނަތީޖާ:
- މުހައްމަދު ނަޝީދު - 21،063 ވޯޓު (69.16 ޕަސަންޓު)
- މީކާއީލް އަހްމަދު ނަސީމް - 9,263 ވޯޓު (30.42 ޕަސަންޓު)
- އިބްރާހިމް މުހައްމަދު - 132 ވޯޓު (0.43 ޕަސަންޓު)
މި އިންތިހާބުގައި ޖުމްލަ 50،176 މީހުންނަށް ވޯޓުލުމުގެ ފުރުސަތު ލިބުނުއިރު، އޭގެ ތެރެއިން ވޯޓުލީ 30،695 މީހުންނެވެ.
އިންތިހާބުގައި 241 ވޯޓު މަރުކަޒު، ރާއްޖޭގެ އެކި ކަންކޮޅުތަކުގައި އަދި ރާއްޖެއިން ބޭރުގައި ވަނީ ގާއިމްކޮށްފަ އެވެ. ރާއްޖެއިން ބޭރުގައި ވޯޓު ފޮށްޓެއް ބެހެއްޓީ ސްރީ ލަންކާގައި އެކަންޏެވެ.
އިންތިހާބު ކާމިޔާބުކުރެއްވުމަށްފަހު ނަޝީދު އިއްޔެ ވަނީ އެމްޑީޕީގެ ލީޑާޝިޕްގެ ބޭފުޅުންގެ އިތުރުން ވާދަވެރި ކެންޑިޑޭޓް މީކާއީލްއާވެސް ބައްދަލުކުރައްވާފަ އެވެ. އޭގެއިތުރުން ނަޝީދު ވަނީ އިއްޔެ އެމްޑީޕީގެ ގައުމީ މަޖިލީހާ ނުރަސްމީކޮށް ރޭ ބައްދަލުކުރައްވާފަ އެވެ.
އެމްޑީޕީގެ އަސާސީ ގަވާއިދުގައިވާ ގޮތުން ޗެއާޕާސަން އަކީ ޕާޓީގެ އެތެރޭގެ ކަންކަން ރާވާ އިންތިޒާމުކޮށް ބަލަހައްޓާ އެންމެ އިސް ފަރާތެވެ. ޗެއާޕާސަންގެ ދައުރަކީ ފަސް އަހަރު ދުވަހު އެވެ. ކުރީގެ ޗެއާޕާސަން ފައްޔާޒް އިސްމާއިލް ވަނީ އެ މަގާމުގައި ތިން އަހަރާއި ހަ މަސްދުވަސް ހޭދަކުރައްވާފަ އެވެ.
ޗެއާޕާސަންގެ މަސްއޫލިއްޔަތުތަކުގެ ތެރޭގައި ޕާޓީގެ ފަރާތުން ސަރުކާރާއި އެހެނިހެން ސިޔާސީ ފަރާތްތަކާއި މުއާމަލާތް ކުރުމާއި، އެތެރޭގެ އިންތިހާބުތައް ރާވާ އިންތިޒާމު ކުރުމާއި، ކޮންގްރެސް އާއި ގައުމީ މަޖިލީހާއި ގައުމީ ހިންގާ ކޮމިޓީގެ ރިޔާސަތު ބެލެހެއްޓުމާއި، ޕާޓީގެ އިދާރީ ކަންކަމުގެ މަސްއޫލިއްޔަތު އުފުލުން ހިމެނެ އެވެ.
