މިހާރު ކުރިއަށްދާ ރިސޯޓް ލީގު ފުޓްސަލް މުބާރާތުގެ އަރި ޒޯނުގައި ކުޅުނު ފުރަތަމަ މެޗުތަކުން، ލިލީ ބީޗް ރިސޯޓް އެންޑް ސްޕާ އާއި މެލިއާ ވޭލް ލެގޫން އަދި ކޮންރަޑް މޯލްޑިވްސް ރަންގަލިން މޮޅެއް ހޯދައި، މުބާރާތުގެ ފެށުން ރަނގަޅުކޮށްފި އެވެ.
ޖުމްލަ އެކު ފަސް ޓީމު ވާދަކުރާ މި ޒޯނުގެ ތާވަލު އޮތްގޮތުން، ލީގު ބުރެއް ކުޅުމަށް ފަހު އެންމެ ރަނގަޅު ނަތީޖާ ނެރޭ ޓީމަކަށް ފައިނަލުގެ ސީދާ ޖާގައެއް ލިބޭނެ އެވެ. ދެ ވަނަ އާއި ތިން ވަނަ އަށް ދާ ޓީމު ސެމީ ފައިނަލެއް ކުޅުމަށް ފަހު، ފައިނަލްގެ ފަހު ޖާގަ ކަނޑައެޅޭނެ އެވެ. އަދި، ލީގު ބުރުގެ ފުލަށް ދާ ދެ ޓީމެއް މުބާރާތުން ކަޓާނެ އެވެ.
ރާއްޖޭގައި ކުރިއަށްދާ އެންމެ ފޯރިގަދަ ރިސޯޓް ފުޓްސަލް މުބާރާތް، ރިސޯޓް ލީގުގެ މި ސީޒަނުގެ ފުރަތަމަ މުބާރާތް، އަރި ޒޯނުގައި ކުރިއަށްދާއިރު، ފުރަތަމަ މެޗުގައި މައްޗަފުށި އައިލެންޑް ރިސޯޓް އެންޑް ސްޕާ އަތުން ލިލީ ބީޗް ވަނީ 4-0 އިން މޮޅުވެފަ އެވެ. މެޗުގެ މޮޅު ކުޅުންތެރިޔާ ހަސަން ނާއިމް ދެ ގޯލު ޖެހިއިރު، އަަނެއް ލަނޑުތައް ޖެހީ މުހައްމަދު މާއިސް އާއި މުހައްމަދު ޔަޝްފާން އެވެ.
ދެ ވަނަ މެޗުގައި، މެލިއާ އިން 5-1 އިން ޑަބްލިއު މޯލްޑިވްސް ބަލިކުރިއިރު، މެޗުގެ މޮޅު ކުޅުންތެރިޔާ، މެލިއާގެ މައިސޫން ވަނީ ހެޓްރިކެއް ހަދައިފަ އެވެ. އަނެއް ލަނޑުތައް ޖެހީ މުހައްމަދު އާދަމް އާއި މާއިން މުހައްމަދު އެވެ. ޑަބްލިއުގެ ހަމައެކަނި ލަނޑު ޖެހީ އިސްމާއިލް ސައީދު އެވެ.
ތިން ވަނަ މެޗުގައި، މައްޗަފުށި ވަނީ 5-2 އިން ކޮންރަޑް އަތްދަށުވެފަ އެވެ. މެޗުގެ މޮޅު ކުޅުންތެރިޔާ، ކޮންރަޑްގެ އަބްދުﷲ އަޒީމް ވަނީ ތިން ގޯލު ޖަހައި، ހެޓްރިކެއް ހަދައިފަ އެވެ. އަނެއް ލަނޑުތައް ޖެހީ، އަހުމަދު ޝާހީން އާއި މައްޗަފުށީގެ އަބްދުﷲ ޝަރީފް އަތުން ބައިކޮޅަށް ވަން ގޯލެކެވެ. މައްޗަފުށީގެ ލަނޑުތައް ޖެހިީ، މުހައްމަދު ނާއިފް އާއި އިސްމާއިލް ސަމޫހު އެވެ.
ތިން ޓީމަށް ތިން ޕޮއިންޓް ލިބިފައިވާއިރު، ލަނޑުގެ ތަފާތުން އެއް ވަނައިގައި މެލިއާ، ދެ ވަނައިގައި ލިލީ ބީޗް އަދި ތިން ވަނައިގައި އޮތީ ކޮންރަޑް އެވެ. ހަތަރެއްގައި ޑަބްލިއު އަދި ފަހެއްގައި އޮތީ މައްޗަފުށި އެވެ.
