ކޯޓުތަކަކީ އާންމު ރައްޔިތުންގެ މައްޗަށް ކަންކަން މަނާކުރުމުގެ ބާރު ލިބިގެންވާ ތަންތަނެއް ނޫން ކަމަށް ރައްޔިތުންގެ މަޖިލީހުގެ މެންބަރު އިބްރާހީމް އިސްމާއީލް (އިބްރާ) ރޭ ވިދާޅުވެއްޖެ އެވެ.
އަދަދު ނޫހުން ތައްޔާރުކޮށްފައިވާ ޑޮކިއުމަންޓަރީއަކާ ގުޅިގެން ކްރިމިނަލް ކޯޓުން ރޭ ނެރުނު އަމުރަކަށް ފާޑުވިދާޅުވެ، އިބްރާ ފޭސްބުކްގައި ވިދާޅުވީ، ކޯޓުތަކުން އަމުރެއް ނެރެވޭނީ ހަމައެކަނި އެ ކޯޓަކަށް ހުށަހެޅިފައިވާ މައްސަލައެއްގައި ހިމެނޭ ހަސްމުންގެ މައްޗަށް ނުވަތަ އެ މައްސަލައަކާ ސީދާ ގޮތުންނާއި ނުސީދާ ގޮތުން ގުޅުން ހުރި ފަރާތްތަކުގެ މައްޗަށް އެކަނި ކަމަށެވެ.
މުޅި މުޖުތަމައަށް ނުވަތަ ހުރިހާ ރައްޔިތުންނަށް އާންމުކޮށް ކަމެއް މަނާކުރުމަކީ ކޯޓުތަކަށް ލިބިގެންވާ ބާރެއް ނޫން ކަމަށް އޭނާ ފާހަގަކުރެއްވިއެވެ.
ދައުލަތުގެ ބާރުތައް ބެހިފައިވާ ގޮތަށް އަލިއަޅުއްވާލައްވަމުން އިބްރާ ވިދާޅުވީ، އާންމުކޮށް ހުރިހާ ރައްޔިތުންނަށް ކަމެއް މަނާކުރުމުގެ ނުވަތަ ގާނޫނު ހެދުމުގެ ބާރު އޮންނަނީ ހަމައެކަނި ރައްޔިތުންގެ މަޖިލީހަށް ކަމަށެވެ. ކޯޓުތަކުގެ އަސްލު ދައުރަކީ ގާނޫނަކުން މަނާކޮށްފައިވާ ކަމެއް މީހަކު ކޮށްފިކަމުގެ ދައުވާ ހުށަހެޅިއްޖެ ނަމަ، އެ ކުށް އެ މީހެއްގެ މައްޗަށް ސާބިތުވޭތޯ ބަލައި އިންސާފު ގާއިމުކުރުން ކަމަށް އޭނާ ވިދާޅުވިއެވެ.
'އައިޝާ' ޑޮކިއުމެންޓްރީއާ ގުޅޭ އެއްވެސް ވާހަކައެއް ނުދެއްކުމަށް ކްރިމިނަލް ކޯޓުން ހުރިހާ ރައްޔިތުންގެ މައްޗަށް އަމުރުކޮށްފި
'އައިޝާ' ޑޮކިއުމެންޓްރީ ދައުރުކުރުމާއި އޭގައިވާ ވާހަކަތައް އެއްވެސް ސިފައެއްގައި ދެއްކުން މަނާކޮށް ކްރިމިނަލް ކޯޓުން އަމުރެއް ނެރެފި. މި އަމުރު ނެރުނީ އެ ޑޮކިއުމެންޓްރީއާ ގުޅިގެން އުފުލާފައިވާ ގަޒުފުކުރުމުގެ ދައުވާގެ ޝަރީއަތް ސިއްރުކޮށްގެން ކުރިއަށްގެންދާތީ، މުޖުތަމައުގެ އަހުލާގީ މިންގަނޑު ހިފެހެއްޓުމަށް ކަމަށް ކްރިމިނަލް ކޯޓުގެ އަމުރުގައި ބުނޭ
ކްރިމިނަލް ކޯޓުގެ ގާޒީ މުޒައްމިލު ނާސިރު ނެރުއްވި އަމުރުގައިވާ ގޮތުން، އަދަދު ނޫހުގެ ސީއީއޯ ސައިން ފިޔާޒު މޫސާ އާއި އެޑިޓަރު ހަސަން މުހައްމަދުގެ މައްޗަށް ގާނޫނުލްއުގޫބާތުގެ 612 ވަނަ މާއްދާގެ ދަށުން ގަޒުފުކުރުމުގެ ދައުވާ އުފުލިފައިވާތީ ކްރިމިނަލް ކޯޓުން ގެންދަނީ އެ މައްސަލަ ބަލަމުންނެވެ.
މި މައްސަލައާ ގުޅިގެން ކޯޓުން ވަނީ އައިޝާ ޑޮކިއުމެންޓަރީ މުޖުތަމައުގެ ތެރޭގައި ދައުރުކުރުން މުޅިން މަނާކޮށްފަ އެވެ. މީގެ އިތުރުން އެ ވީޑިއޯގައި ހިމެނޭ ވާހަކަތައް، އެއްވެސް ފަރާތަކުން ސީދާގޮތުންނާއި ނުސީދާގޮތުން ދެއްކުމަކީ ވެސް މަނާކަމެއްގެ ގޮތުގައި ވަނީ ކަނޑައަޅާފަ އެވެ.
