ތުއްތު ކުދިންގެ ކާނާ އުފައްދާ މަޝްހޫރު ބްރޭންޑެއްގެ އުފެއްދުންތަކަކުން މީދާ މަރާ ބޭސް ފެނުނު މައްސަލައެއްގައި، އޮސްޓްރިއާގެ ފުލުހުން މީހަކު ހައްޔަރުކޮށްފި އެވެ.
އެ މީހާ ހައްޔަރުކޮށްފައި ވަނީ، އޮސްޓްރިއާ އާއި ޗެކް ރިޕަބްލިކް އަދި ސްލޮވާކިއާގައި ވިއްކަން ހުރި ހިޕް (HiPP) ބްރޭންޑުގެ ކުޑަކުދިންގެ ކާނާ ފުޅިތަކަކުން މީދާ މަރާ ބޭހާއި، ކޮން އެއްޗެއްކަން ނޭނގޭ "ވިހަ މާއްދާއެއް" ފެނުމާ ގުޅިގެން، އެ ކުންފުނީގެ ބައެއް އުފެއްދުންތައް މިދިޔަ މަހު ބާޒާރުން ނެގުމަށްފަހު އެވެ.
ދުނިޔޭގެ އެންމެ ބޮޑު އޯގަނިކް ބޭބީ ފުޑް ބްރޭންޑްގެ ގޮތުގައި މަޝްހޫރުވެފައިވާ ހިޕް ކުންފުނިން އޭރު ބުނެފައިވަނީ، އެ ތަކެތި ތަގައްޔަރުވެފައިވަނީ އުފެއްދުމުގެ މަރުހަލާގައި ނޫން ކަމަށާއި، އެއީ ބަޔަކު ގަސްތުގައި ހިންގާފައިވާ "ޖިނާއީ އަމަލެއް" ކަމަށެވެ. އަދި އެ މައްސަލަ ކަމާބެހޭ އިދާރާތަކުން ތަހުގީގު ކުރަމުންދާ ކަމަށްވެސް އެ ކުންފުނިން ބުންޏެވެ.
އެ ކުންފުނިން ފަހުން ހާމަކުރި ގޮތުގައި، އެ ކުންފުނީގެ އަތުން ފައިސާ ހޯދުމަށް ބަޔަކު ވަނީ ބިރުދައްކައި އިންޒާރުދީފަ އެވެ.
އޮސްޓްރިއާގެ އިރުމަތީ ސްޓޭޓެއް ކަމަށްވާ ބާގަންލޭންޑްގެ ފުލުހުން އާދީއްތަ ދުވަހު ކަށަވަރުކޮށްދިން ގޮތުގައި، މި މައްސަލައިގެ ތުހުމަތުގައި އުމުރުން 39 އަހަރުގެ ފިރިހެނަކު މިހާރު ވަނީ ހައްޔަރުކޮށްފަ އެވެ.
އޮސްޓްރިއަން އެޖެންސީ ފޯ ހެލްތު އެންޑް ފުޑް ސޭފްޓީން ބުނެފައިވަނީ، ވިހަވުމުގެ އެއްވެސް އަލާމާތެއް، މިސާލަކަށް ލޭ އައުން، އާދަޔާ ހިލާފަށް ވަރުބަލިވުން ނުވަތަ މޫނުމަތި ހުދުވުން ފަދަ ކަމެއް ފެނިއްޖެނަމަ ލަސްނުކޮށް ޑޮކްޓަރެއްގެ އެހީތެރިކަން ހޯދަންޖެހޭނެ ކަމަށެވެ.
އޮސްޓްރިއާގެ ފުޑް ސޭފްޓީ އެޖެންސީން ބުނާ ގޮތުގައި، މީދާ މަރާ ބޭހުގެ ސަބަބުން ހަށިގަނޑުގައި ވިޓަމިން ކޭ (Vitamin K) ބޭނުންކުރުމަށް ހުރަސްއެޅެ އެވެ. އަދި މިފަދަ އެއްޗެއް ކެވޭތާ ދެ ދުވަހާއި ފަސް ދުވަހާ ދެމެދުގެ މުއްދަތެއްގެ ތެރޭގައި އޭގެ އަލާމާތްތައް ފެންނަން ފަށާނެ އެވެ.
