އަދަދު ނޫސް ހިންގާ އޮފީހަށް ފުލުހުން މިދިޔަ ހޯމަ ދުވަހު ރެއިޑު ކުރިއިރު އެއް ފުލުސް އޮފިސަރުގެ އަތުގައި ޓޭޒާ ބަޑިއެއް އޮތްއިރު، ހަތިޔާރު ބޭނުން ކުރަންޖެހޭ އުސޫލާ އޭނާ ހިލާފުވި ކަމަށް ބެލެވެން ފަށައިފި އެވެ.
ފުލުހުން މި ނޫހުގެ އޮފީހަށް ވަދެ ކުރިއަށްގެންދިޔަ ހަތަރު ގަޑިއިރުގެ ސާޗް އޮޕަރޭޝަނަކަށް ފަހު ލެޕްޓޮޕްތަކާއި ހާޑް ޑިސްކުތަކާއި ބައެއް މެމޮރީ ކާޑު ހިމެނޭ ގޮތަށް 20 ޑިވައިސްއެއް ގެންދިޔަ އެވެ.
މި އޮފީހަށް ފުލުހުން ވަނީ ރައީސް މުހައްމަދު މުއިއްޒުއާ ކައިވެނިން ބޭރުން ގުޅުމެއް ހިންގި ކަމަށް ތުހުމަތު ކުރި އެ ރައީސް އޮފީހުގެ ކުރީގެ މުވައްޒަފެއްގެ ބަސް ގެނެސްދީ މި ނޫހުން ޝާއިއު ކުރި "އައިޝާ" ޑޮކިއުމެންޓަރީގެ ސަބަބުންނެވެ.
މި ނޫހަށް ޖެހި ރެއިޑުގައި ގާތްގަނޑަކަށް 10 ފުލުހަކު ބައިވެރިވި އެވެ. އޭގެ ތެރެއިން ޓޭޒާ ބަޑިއެއް އޮތީ އެންމެ ފުލުހެއްގެ އަތުގަ އެވެ. ޓޭޒާ އޮތީ ފުލުސް މީހާ އުނަގަނޑުގައި އަޅުވާފައި ހުރި ހޯލްސްޓަރުގައި އަޅުވާފަ އެވެ.
އެކަމަކު މި ނޫހުގެ އޮފީހުގައި ފުލުހުން ހޭދަ ކުރި ހަތަރު ގަޑިއިރުގެ ތެރޭގައި ޓޭޒާ ގެންގުޅުނު ފުލުސް މީހާ ވަނީ ޓޭޒާ ގެންގުޅުމުގެ ގަވާއިދާ ހިލާފުވާނެ ކަމަށް ބެލެވޭ ފަދަ ގޮތްތަކަކަށް އަމަލުކޮށްފަ އެވެ. އޭގެ ތެރޭގައި ޓޭޒާ ބަޑީގައި އަތްލުން ހިމެނެ އެވެ.
ފުލުހުން ޓޭޒާ ގެންގުޅުމާ ބެހޭ ގަވާއިދުގެ ނުވަ ވަނަ މާއްދާގައި ބުނެފައިވާ ގޮތުން، ޓޭޒާ ބޭނުން ކުރުމުގެ ކުރިން އިންޒާރު ދިނުމުގެ ގޮތުން މެނުވީ ޓޭޒާ ބަޑީގައި އަތެއް ނުލެވޭނެ އެވެ. އަދި އެ މާއްދާގައިވާ ގޮތުން، ޓޭޒާ ބަޑި ބޭނުން ކުރުމުގެ އިންޒާރު ދިނުމަށް ނޫން ގޮތަށް ޓޭޒާ ބަޑިއާ ދިމާލަށް އަތް ގެންދިޔުމަކީ ވެސް މަނާ ކަމެކެވެ.
އަދަދު ނޫހުގެ އޮފީހަށް ރެއިޑު ކުރީ، އެ މައްސަލަ ތަހުގީގު ކުރުމަށް ރައީސް މުއިއްޒު އެންގެވިތާ 12 ގަޑިއިރެއްހާއިރު ފަހުންނެވެ. އަދަދު ނޫހުގެ މައްސަލަ ތަހުގީގު ކުރަން މުއިއްޒު އެންގެވީ ވަގުތުން ގެނެސްދިން ނޫސްވެރިންގެ ބައްދަލުވުމެއްގެ ތެރެއިން ރައީސް މުއިއްޒަށް އަމާޒުވެފައިވާ ސީރިއަސް ތުހުމަތުތަކާ ބެހޭ ގޮތުން މި ނޫހުގެ ނޫސްވެރިޔާ މުހައްމަދު ޝަހުޒާން ސުވާލު ކުރުމުންނެވެ.
"އާދެ، ކަނޑައެޅިގެން ދޮގު ވާހަކައެއް ތިއީ އިނގޭތޯ. އަދަދު ނޫހުން ތި ވިދާޅުވީ ތިބޭފުޅުން ހެއްދެވި ވީޑިއޯގެ ވާހަކަ. އެހެންވީމަ ކަނޑައެޅިގެން ދޮގު ވާހަކަ ހިމެނޭ ގޮތަށް ތިބޭފުޅުން ވީޑިއޯއެއް ހެއްދެވި ހެއްދެވުމަށް ތި އިއުތިރާފުވަޑައިގެންނެވީ. މިފަދަ ދޮގު ވާހަކަ ދެއްކި ހުރިހާ ފަރާތްތަކާ ދެކޮޅަށް އަޅުގަނޑު ދައުވާ ކުރަން އެދެން ކަމާބެހޭ ހުރިހާ ފަރާތްތަކުގެ ކިބައިން،" މުއިއްޒު ވިދާޅުވި އެވެ.
އަދަދު ނޫހަށް ރެއިޑު ކުރުމުގެ އިތުރުން މި ނޫހުގެ ސީއީއޯ ހުސެއިން ފިޔާޒް މޫސާ އަދި މެނޭޖިން އެޑިޓަރު ހަސަން މުހައްމަދުގެ ޕާސްޕޯޓު ހިފަހައްޓަން ފުލުހުން އެދިގެން ކްރިމިނަލް ކޯޓުން ވަނީ އަމުރެއް ނެރެފަ އެވެ. އަދި އެ މައްސަލައިގެ ތަހުގީގަށް ފިޔާޒް އާއި ހަސަން ވަނީ މިދިޔަ ހަފުތާގައި ފުލުސް އޮފީހަށް ވެސް ހާޒިރުކޮށްފަ އެވެ.
