އިންޑިއާއިން ލުއި ލޯނެއް ނަގައިގެން ލ. ގަމުގައި ތަރައްގީކުރަން އުޅުނު މެންޓަލް ހެލްތު ހޮސްޕިޓަލަށް ބޭނުންވާ ލޯނު ނުލިބި ދިގުލައިގެންދާތީ، ސަރުކާރުގެ ބަޖެޓުން ހަރަދުކޮށްގެން އޭގެ ހޮސްޕިޓަލެއް މާލޭގައި އިމާރާތްކުރަން ނިންމާފައިވާ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
މިފަހުން ދިމާވި ހާދިސާތަކަކާ ގުޅިގެން ނަފްސާނީ ފަރުވާގެ މައުލޫގައި ހޫނުކޮށް ބަހުސްކުރެވެމުންދާ ދަނޑިވަޅެއްގައި މެންޓަލް ހެލްތު ހޮސްޕިޓަލްގެ ވާހަކަ މުއިއްޒު ދެއްކެވިއިރު، މިއީ އެމަނިކުފާނުގެ ކެމްޕެއިން ވައުދެކެވެ. އަދި، މިދިޔަ އަހަރުގެ ރިޔާސީ ބަޔާނުގައި، މި ހޮސްޕިޓާ ހިމެނޭހެން އިންޑިއާއިން ލޯނު ނަގައިގެން އަޅާ ތިން ހޮސްޕިޓަލުގެ މަސައްކަތުގެ ތައްޔާރީތައް ކުރިއަށްދާ ކަމަށް ވިދާޅުވެފައިވެ އެވެ.
މުއިއްޒު މިހެން ވިދާޅުވިތާ އަހަރަކަށް ވުރެ ގިނަ ދުވަސް ފަހުން ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެމަނިކުފާނު ވިދާޅުވީ، ލޯނު ނަގައިގެން އެ ހޮސްޕިޓަލުގެ މަސައްކަތް ފެށޭތޯ ވަރަށް ގިނަ މަސައްކަތްތަކެއް ކުރެވުނު ކަމަށެވެ.
"އެހެން ނަމަވެސް އަދިވެސް އެ ޕްރޮސީޖާ ދިގުކަމުން މީގެން ލޯނެއް ހަމަޖެހިގެން ޕްރޮޖެކްޓު، އަދި މިކަހަލަ އެއްވެސް ޕްރޮޖެކްޓެއް ފެށޭ ގޮތް ނުވެ ލަސްވަމުންދާތީ، އަދި މި މައްސަލަ ރާއްޖޭގައި [] އިތުރު އެހީތެރިކަމަކަށް ބޭނުންވެފައިވާ ބޮޑު މައްސަލައަކަށް ވާތީ އަޅުގަނޑުމެން މިހާރު މަޝްވަރާކޮށްފަ ސަރުކާރުގެ ބަޖެޓުން ސީދާ މި މެންޓަލް ހެލްތު ފެސިލިޓީ، ހޮސްޕިޓަލް އެޅުމަށް މި ނިންމީ." އެމަނިކުފާނު ވިދާޅުވި އެވެ.
މުއިއްޒު ވިދާޅުވީ، މާލޭގައި އިމާރާތްކުރާ މެންޓަލް ހެލްތު ހޮސްޕިޓަލު ޕްރޮޖެކްޓު ފަށާނީ ސަރުކާރުން މި އަހަރުގެ ނިއު ޕޮލިސީ އިނީޝިއޭޓިވްސް ބަޖެޓުގެ ތެރެއިން ފައިސާ ނަގައިގެން ކަމަށެވެ.
މި ޕްރޮޖެކްޓަށް ހަރަދު ވާނެ ސީދާ ވަރެއް ނުބުނި ނަމަވެސް މުއިއްޒު ވަނީ ގަމުގައި އަޅަން އުޅުނު ހޮސްޕިޓަލަކީ 18 މިލިއަން ޑޮލަރުގެ ޕްރޮޖެކްޓެއް ކަމަށް ފާހަގަކުރައްވައި، މި ޕްރޮޖެކްޓު އެއަށް ވުރެ އަގުހެޔޮ ވާނެ ކަމަށް ވިދާޅުވެފަ އެވެ.
މާލޭގައި ހޮސްޕިޓަލެއް އެޅި ނަމަވެސް، މުއިއްޒު ވިދާޅުވީ، އެމަނިކުފާނު ވައުދުވެފައިވާ ގޮތަށް ލ. ގަމުގައި އަޅާ ހޮސްޕިޓަލުގެ ޕްރޮޖެކްޓާ މެދު އަދި ގޮތެއް ނުނިންމާ ކަމަށެވެ. މުއިއްޒު ވިދާޅުވީ އެކަމާ މެދު ފަހުން ގޮތެއް ނިންމަވާނެ ކަމަށެވެ. މިހެން ވިދާޅުވުމަށް ފަހު މުއިއްޒު ވަނީ މާލޭގައި މި ހޮސްޕިޓަލު އެޅުން މާ ރަނގަޅު ކަމަށް ވެސް ވިދާޅުވެފަ އެވެ.
"މާލެ ސިޓީ މި ރީޖަންގައި އެންމެ ގިނައީ މީހުން ވެސް. އަދި އެ މައްސަލަ ގިނަ ކުދިން ވެސް." މުއިއްޒު ވިދާޅުވި އެވެ.
މުއިއްޒުގެ ވާހަކައިގައި އެމަނިކުފާނު ވަނީ ނަފްސާނީ ދުޅަހެޔޮކަން ކަށަވަރުކުރަން މި ސަރުކާރުން އަހައްމިއްޔަތުކަން ދޭ ކަމަށް ބުނެފަ އެވެ. އެ ގޮތުން ކުރި އެންމެ މުހިންމު ކަމެއްގެ ގޮތުގައި މުއިއްޒު ފާހަގަކުރެއްވީ ނަފްސާނީ ފަރުވާތަކަށް އާސަންދަ ކަވަރޭޖު ދިނުމެވެ.
ކުރިއަށް ހުރި ކަންކަމުގެ ތެރޭގައި މުއިއްޒު ވަނީ ނަފްސާނީ ދުޅަހެޔޮކަމާ ގުޅޭ ބިލެއް ހުށަހެޅުމުގެ މަސައްކަތް ކުރަމުންދާ ކަމަށް ވިދާޅުވެފަ އެވެ. އަދި، މި މައްސަލައާ ގުޅުން ހުރި މައްސަލައެއް ކަމުގައިވާ، ހަނގާކުރުން (ބުލީކުރުން) އަކީ ގާނޫނީ ކުށެއްގެ ގޮތުގައި ކަނޑައަޅަން "އެންޓި ބުލީ" ގާނޫނެއްގެ މަސައްކަތް ކުރިއަށްދާ ކަން އިއުލާންކުރެއްވި އެވެ.
