އިންޑިއާގެ ދިއްލީން ފުރައިގެން ސްވިޒަލޭންޑްގެ ޒިއުރިކަށް ދަތުރުކުރަން އުޅުނު "ސްވިސް އިންޓަނޭޝަނަލް" އެއާލައިންގެ ބޯޓެއްގެ އިންޖީނަށް ދިމާވި މައްސަލައަކާ ގުޅިގެން، އާދީއްތަ ދުވަހު ބޯޓު ނައްޓާލަން އުޅެނިކޮށް ހުއްޓާލައިފި އެވެ. މި ހާދިސާގައި ހަތަރު ފަސިންޖަރަކަށާއި ފަޅުވެރިއަކަށް އަނިޔާވެފައިވާ ކަމަށް އެ އެއާލައިނުން ބުނެފައިވެ އެވެ.
މި ހާދިސާއާ ގުޅޭ އިތުރު ތަފްސީލެއް އެއާލައިނުން ހާމަކޮށްފައި ނުވި ނަމަވެސް، "އިކޮނޮމިކް ޓައިމްސް" އިން ރިޕޯޓްކޮށްފައިވާ ގޮތުގައި ބޯޓު ރަންވޭމަތީގައި ބާރު ސްޕީޑުގައި ދުއްވަމުން ދަނިކޮށް އޭގެ އެއް އިންޖީނުގައި ވަނީ އަލިފާން ހިފާފަ އެވެ. އަދި ފަސިންޖަރުންނަށް އަނިޔާވީ ކުއްލި ހާލަތުގައި ބޯޓުން މީހުން ބޭލުމުގެ ތެރޭގައި ކަމަށް ވެސް އެ ނޫހުން ބުނެފައިވެ އެވެ.
ސްވިސް އިންޓަނޭޝަނަލް އިން ނެރުނު ބަޔާނެއްގައި ބުނީ، އޭޕްރިލް 26 ވަނަ ދުވަހުގެ ދަންވަރު 1:00 އެހާކަންހާއިރު ދިއްލީން ފުރަން އުޅުނު އެލްއެކްސް147 ފްލައިޓްގެ އިންޖީނަކަށް މައްސަލައެއް ދިމާވި ކަމަށެވެ. އެއާއެކު ބޯޓުގެ ފަޅުވެރިން ބޯޓު ނައްޓާލުން ހުއްޓާލައި، ހާލަތު ވަޒަންކުރުމަށްފަހު ރައްކާތެރިކަމުގެ ފިޔަވަޅެއްގެ ގޮތުން ބޯޓުން މީހުން ހުސްކުރަން ނިންމީ ކަމަށް އެ އެއާލައިނުން ބުންޏެވެ.
މި ހާދިސާ ތަހުގީގު ކުރުމަށްޓަކައި ޚާއްސަ ޓާސްކް ފޯހެއް އެކުލަވާލާފައިވާ ކަމަށާއި، އަނިޔާވި ފަސިންޖަރުން ހޮސްޕިޓަލަށް ގެންގޮސްފައިވާ ކަމަށް އެ އެއާލައިނުން ބުނެފައިވެ އެވެ. އަދި އަނިޔާވި ފަޅުވެރިޔާގެ ފައިގެ ކުޑަހުޅަށް ތަދުވެފައިވާ ކަމަށް ވެސް ބަޔާނުގައިވެ އެވެ.
މި ހާދިސާގައި ހަ ފަސިންޖަރަކަށް އަނިޔާވި ކަމަށް އެއާލައިނުން ކުރިން ބުނި ނަމަވެސް، ފަހުން ވަނީ އެ އަދަދު އިސްލާހުކޮށްފަ އެވެ.
އެއާބަސް އޭ330 މަރުކާގެ މި ބޯޓުގައި ހާދިސާ ހިނގިއިރު 228 ފަސިންޖަރުންނާއި، ހަތަރު ތުއްތު ކުދިންގެ އިތުރުން 13 ފަޅުވެރިން ތިއްބެވެ.
މި ހާދިސާއާ ގުޅިގެން ދިއްލީގެ އިންދިރާ ގާންދީ އިންޓަނޭޝަނަލް އެއާޕޯޓުގައި ކުއްލި ހާލަތު އިއުލާން ކުރި ނަމަވެސް، މިހާރު ރަންވޭގެ އޮޕަރޭޝަންތައް އަލުން ފަށާފައިވާ ކަމަށް މިކަމުގެ މައުލޫމާތު އެނގޭ، ނަން ހާމަކުރަން ބޭނުންނުވާ މަސްދަރަކުން ރޮއިޓާޒްއަށް ބުނެފައިވެ އެވެ.
