ތެލެސީމިއާ ސެންޓަރުގައި ހުންނަ ލޭ ރައްކާކުރާ ފްރިޖަކަށް ދިމާވި މައްސަލައަކާ ގުޅިގެން ލޭ ޕެކެޓުތަކުގައި ހުންނަން ޖެހޭވަރަށްވުރެ ބޮޑަށް ފިނިކަން ކެނޑި، ކުނިވެފައި ހުރި ލޭ ތެލެސީމިއާ ތިން ކުއްޖެއް ގަޔަށް އަޅައިފި އެވެ.
އަދަދު އަށް އެނގިފައިވާ ގޮތުގައި ތެލެސީމިއާ ސެންޓަރުގައި ލޭ ރައްކާކުރާ ފްރިޖުގައި ހުރި ލޭތައް ކުނިވީ މިދިޔަ އާދީއްތަ ދުވަހުގެ ރޭ ފްރިޖަށް ދިމާވި މައްސަލައަކާ ގުޅިގެންނެވެ. އެއީ ފްރިޖުގެ ފިނިހޫނުމިނަށް ދިމާވި މައްސަލައެއްކަން ވަނީ އެނގިފަ އެވެ.
ނަމަވެސް، އެކަން ތެލެސީމިއާ ސެންޓަރުގައި މަސައްކަތްކުރާ ބައެއް ނަރުހުނުންނަށް ނޭނގި ހޯމަ ދުވަހު ތިން ކުއްޖެއް ގަޔަށް ކުނިވެފައި ހުރި ލޭ އަޅާފައިވާ ކަމަށް މައުލޫމާތު ލިބެ އެވެ.
ތެލެސީމިއާ ސެންޓަރުގައި ހުންނަ ފްރިޖްތަކަކީ ފިނިހޫނުމިން ހުންނަންޖެހޭ ވަރަށްވުރެ މަތިވެ ނުވަތަ ދަށްވާނަމަ އެލާމް އަޅާ ގޮތަށް ސެންސަރެއް ހަރުކޮށްފައި ހުންނަ ފްރިޖެވެ. އާދީއްތަ ދުވަހުގެ ރޭ ފްރިޖެއްގައި އެލާމް އެޅުމުން، އެ ފްރިޖުގައި ހުރި ލޭ ޕެކެޓްތައް އެހެން ފްރިޖަކަށް ބަދަލުވެސް ކުރި އެވެ.
މިކަމާ ގުޅިގެން މޯލްޑިވިއަން ބްލަޑް ސާވިސް (އެމްބީއެސް) ގެ ޑިރެކްޓާ ޖެނެރަލް އަހްމީމް ފާރިޝް އަދަދު އަށް ވިދާޅުވީ ފްރިޖަށް ދިމާވި މައްސަލައާ ގުޅިގެން ހޯމަ ދުވަހު ހެނދުނު ފްރިޖުގައި ހުރި ލޭ ޕެކެޓްތައް ރަނގަޅުކަން ކަށަވަރުކުރުމުގެ މަސައްކަތް ދަނިކޮށް ތެލެސީމިއާ ތިން ކުއްޖެއް ގަޔަށް ލޭ އެޅި ފްރިޖަށް މައްސަލަ ޖެހުނުކަމުގެ މައުލުމާތު ނުލިބޭ ނަރުހުންތަކެއް ކަމަށެވެ.
އެގޮތުން އެ ތެލެސީމިއާ ކުދިންނަށް ލޭ އެޅުނުކަން އެނގުނީ އެ ކުދިން ގެއަށްވެސް ދިޔަ ފަހުން ކަމަށާއި އޭގެ ތެރެއިން ދެ އާއިލާއަކަށް ގުޅައި މައުލޫމާތު ހިއްސާކުރި ކަމަށާއި ނަމަވެސް އެއް އާއިލާއަށް އެ ވަގުތު ގުޅުމުން ފޯނަށް ޖަވާބު ނުދޭތީ މައުލޫމާތު ފޯރުކޮށްދެވުނީ ލަސްވިފަހުން ކަމަށް އޭނާ ވިދާޅުވި އެވެ.
އަހްމީމް ވިދާޅުވީ އެކަން ހިނގާފައިވަނީ ރަނގަޅަށް މުއާމަލާތްތައް ނުކުރެވުމުންކަން ގަބޫލުކުރާ ކަމަށާއި އެކަމާ ގުޅިގެން ލޭ އެޅުނު ތެލެސީމިއާ ކުދިންގެ އާއިލާތައް ކިބައިން މައާފަށްވެސް އެދޭ ކަމަށެވެ. ކުރިއަށް އޮތްތަނުގައި މިފަދަ ހާދިސާއެއް ހިނގައިފިނަމަ، ލަސްނުކޮށް ވީހާވެސް އަވަހަށް އާއިލާތަކަށް މައުލޫމާތު ފޯރުކޮށްދެވޭނެކަން ކަށަވަރުކުރާނެ ކަމަށް ވެސް އޭނާ ވިދާޅުވި އެވެ.
"ކޮމިއުނިކޭޝަން އެރާއެއް އަރާފައި އެއިނީ. އަލަމާރި ހަލާކުވީމަ އޭތި ނާޅާށޭ ބުނަށްވާއިރަށް ނޫނީ ލޮޖްތަކާ އެއްޗެހި ޗެކްކޮށް ނިމެންވާއިރަށް އެހެން ނަރުހުންތަކެއް ގޮސް އޭތި އަޅާފައި މިއިނީ. އޭގެ ތެރެއިން ތިން ޕެކް އަޅާފައި،" އޭނާވިދާޅުވި އެވެ.
ލޭ ރައްކާކުރާ ފްރިޖްތަކަށް މައްސަލަތަ ދިމާވާތީ އައު ފްރިޖްތަކެއް ބޭރުން ގެނައުމުގެ މަސައްކަތް ކުރަމުންދާ ކަމަށާއި ވަގުތީ ގޮތުން އައްޑޫ ސިޓީ އިކުއެޓޯރިއަލް ހޮސްޕިޓަލުގައި ބޭނުންނުކޮށް ހުރި ފްރިިޖެއްވެސް ގެނައުމަށް މަސައްކަތް ކުރަމުންދާ ކަމަށް އޭނާ ވިދާޅުވި އެވެ.
މި ހާދިސާގައި ކުނިވެފައި ހުރި ލޭ އެޅި ތެލެސީމިއާ ތިން ކުދިންގެ ހާލުވެސް ރަނގަޅު ކަމަށް އަހްމީމް ފާހަގަކުރެއްވި އެވެ.
