ޔުނިފޯމު އެޅި ހިދުމަތްތަކުގައި މަސައްކަތް ކުރުމަށް ޝައުގުވެރިވާ ޒުވާނުން ތަމްރީނު ކުރުމަށް ހާއްސަކޮށް ވަތަނީ ހިދުމަތުގެ ޕްރޮގްރާމެއް ހިންގުމުގެ އުސޫލުތައް ބަޔާންކޮށް މަޖިލީހަށް ބިލެއް ހުށަހަޅައިފި އެވެ.
ސަރުކާރުގެ ފަރާތުން އެ ބިލު މަޖިލީހަށް ހުށަހެޅުއްވީ ކުޅުދުއްފުށި ދެކުނު ދާއިރާގެ މަޖިލިސް މެންބަރު، ފަރުހަތު މުހައްމަދު އެވެ. މިއަދު އޮތް މަޖިލީހުގެ ޖަލްސާގައި، ވޯޓުގައި ބައިވެރިވި މެންބަރުންގެ އިއްތިފާގުން އެ ބިލު ވަނީ މަޖިލީހަށް ބަލައިގަނެފަ އެވެ.
މަޖިލީހަށް ހުށަހަޅުއްވާފައިވާ ވަތަނީ ހިދުމަތުގެ ބިލުގައި ވަނީ އެ ޕްރޮގްރާމުގައި ބައިވެރިވެވޭނެ ފަރާތްކާއި އެ ޕްރޮގްރާމުން ވަކިކުރެވޭނެ ހާލަތްތައް ބަޔާންކޮށްފަ އެވެ.
އެ ގޮތުން އެ ބިލުގެ ފަސްވަނަ މާއްދާގައި ބަޔާން ކޮށްފައި ވަނީ އުމުރުން 16 އަހަރާއި 28 އަހަރާ ދެމެދުގެ ކޮންމެ ދިވެހިރައްޔިތަކަށް ވެސް ވަތަނީ ހިދުމަތުގް ޕްރޮގްރާމުގައި ބައިވެރިވެވޭނެ ކަމަށެވެ. އެ މާއްދާގައި އެހެން ބަޔާން ކޮށްފައި އޮތް ނަމަވެސް، އުމުރުން 18 އަހަރުން ދަށުގެ ކުއްޖަކަށް އެ ޕްރޮގްރާމުގައި ބައިވެރިވެވޭނީ އެ ކުއްޖާ އަމިއްލައަށް އެކަމަށް އެދުމުގެ އިތުރުން، އެ ކުއްޖާގެ ބެލެނިވެރިންގެ ހުއްދައާއެކު ކަމަށް އެ ބިލުގައި ބަޔާން ކޮށްފައިވެ އެވެ.
އެ ބިލުގައިވާ ގޮތުން، ވަތަނީ ހިދުމަތުގެ ޕްރޮގްރާމުގައި ބައިވެރިވެވޭނީ، މެޑިކަލް އެސެސްމެންޓެއް ފުރިހަމަކޮށް، އެ އެސެސްމެންޓުން ފާސްވެގެންނެވެ.
އޭގެ އިތުރުން ވަތަނީ ހިދުމަތުގެ ޕްރޮގްރާމަށް އެންރޯލްވާ މީހުންނަށް، ޔުނިފޯމު އެޅި ހިދުމަތްތަކުގައި މަސައްކަތް ކުރުމަށް ބޭނުންވާ އަސާސީ ތައުލީމާއި ތަމްރީނުގެ ކޯހެއް ކުރިއަށް ގެންދަން ވެސް އެ ބިލުގައި ހިމަނާފައިވެ އެވެ.
އެ ކޯސް ފުރިހަމަ ކުރާ މުއްދަތުގައި އެ މީހެއްގެ ކެއުމާއި ހުރުމުގެ އިތުރުން ބޭސްފަރުވާ އާއި ދަތުރުފަތުރުގެ ހަރަދު އަދި ކޯހުގެ މުއްދަތުގައި ބޭނުންކުރަންޖެހޭ ޔުނިފޯމާއި އެ ނޫން ވެސް އަސާސީ ތަކެތި މިނިސްޓްރީން ފޯރުކޮށްދޭން ޖެހޭނެ ކަމަށް ބިލުގައި ބަޔާން ކޮށްފައިވެ އެވެ. އަދި، ވަތަނީ ހިދުމަތުގެ ޕްރޮގްރާމުގައި ބައިވެރިވާ ކުދީންނަށް، އެ ޕްރޮގްރާމު ކުރިއަށް ގެންދާ މުއްދަތުގައި އިނާޔަތެއް ދިނުމަށް ވެސް އެ ބިލުގައި ހިމަނާފައިވެ އެވެ.
ވަތަނީ ހިދުމަތުގެ ޕްރޮގްރާމަށް އެންރޯލްކުރާ ފަރާތްތަކުން، ފުރިހަމަކުރަންޖެހޭ ތައުލީމާއި ތަމްރީނުގެ ކޯސް ފުރިހަމަ ކުރުމަށްފަހު، މިނިސްޓްރީން ކަނޑައަޅާ ޔުނިފޯމު އެޅި ހިދުމަތެއްގައި ގިނަވެގެން އެއް އަހަރު މަސައްކަތް ކުރަން އެ ބިލުގައި ލާޒިމުކޮށްފައިވެ އެވެ. އެ ގޮތަށް، މަސައްކަތް ކުރާ މުއްދަތު ފުރިހަމަ ކުރާ ފަރާތްތަކަށް އެ ހިދުމަތަކުން ވަޒީފާއެއް ހުށަހެޅުމުގެ އިހުތިޔާރު އެ މީހަކު މަސައްކަތް ކުރި ހިދުމަތަކަށް ދީފައިވެ އެވެ.
އެ ބިލު ގާނޫނަކަށް ވާނީ، އެ ބިލު ގާނޫނަކަށްވާ ތާރީހުން ފެށިގެން ހަ މަސްދުވަސްފަހުންނެވެ.
