އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ވަގުތީ ޗެއާޕާސަންގެ މަގާމުގައި ހުންނެވި، އަބްދުލްޣަފޫރު މޫސާގެ އިތުބާރު ނެތްކަމުގެ މައްސަލަ އަނބުރާ ގެންގޮސް, ޑެޕިއުޓީ ލީޑަރުގެ ނައިބުގެ (އިދާރީ) މަގާމުގައި ހުންނެވި އިބްރާހިމް ވަހީދު (އިބުރޭ) އާއި އެ ޕާޓީގެ ލީގަލް ޑިރެކްޓަރުގެ މަގާމުގައި ހުންނެވި އަހުމަދު މައުރޫފްގެ މަގާމު އަލުން އިޔާދަކޮށްފި އެވެ.
ޣަފޫރުގެ އިތުބާރު ނެތްކަމުގެ މައްސަލަ އެމްޑީޕީ ގައުމީ މަޖިލީހުގެ 55 މެންބަރުންގެ ސޮޔާއެކު މިދިޔަ ބުދަ ދުވަހު ހުށަހެޅީ އިބުރޭ އާއި މައުރޫފް މަގާމުން ވަކިކުރުމާ ގުޅިގެން ޕާޓީ ތެރޭގައި އުފެދުނު ހިޔާލުތަފާތުވުންތަކާ އެކުގަ އެވެ.
މީގެއިތުރުން އިބުރޭ އާއި މައުރޫފް މަގާމުން ވަކިކުރީ، ލޯކަލް ކައުންސިލް އިންތިހާބުން އެމްޑީޕީއަށް ލިބުނު ކާމިޔާބީ ފާހަގަކުރުމަށް އާޓިފިޝަލް ބީޗުގައި އޭޕްރިލް 6، ގައި ބޭއްވި ޖަލްސާގައި ވާހަކަދެއްކުމުގެ ފުރުސަތު ކުރީގެ ރައީސް މުހައްމަދު ނަޝީދުއަށް ނުދިނުމުން އުފެދުނު ނުތަނަވަސްކަމުގެ ތެރެެއިންނެވެ.
ނަމަވެސް އެކަމާ ގުޅިގެން ޕާޓީގެ ލީޑަރުންގެ މެދުގައި އުފެދުނު ހިޔާލުތަފާތުވުންތައް މަޝްވަރާކޮށްގެން މިހާރު ވަނީ ހައްލުކޮށްފަ އެވެ. ޣަފޫރުގެ އިތުބާރު ނެތްކަމަށް ނުނަގަން ނިންމައި، އިބުރޭ އާއި މައުރޫފްގެ މަގާމު އަލުން އިޔާދަކުރީ އެ މަޝްވަރާތަކަށްފަހު އެވެ.
އެމްޑީޕީގެ ފެކްޝަންތަކުން ކުރި މަޝްވަރާތަކަށް ފަހު އެއްބަސްވެވުނު ގޮތަށް އެމްޑީޕީގެ ޗެއާޕާސަނަށް ލަފާ ދޭން ކޮމިޓީއެއް ރޭ ބޭއްވި ގައުމީ މަޖިލިސް ޖަލްސާއެއްގައި ވަނީ އެކުލަވާލާފަ އެވެ. އޭގެއިތުރުން ކުރީގެ ރައީސް ނަޝީދަށް އެމްޑީޕީގެ އެޑްވައިޒަރެއްގެ ރޯލާއެކު ގައުމީ މަޖިލީހުން ވަނީ ޖާގައެއް ދެއްވަން ވެސް ގައުމީ މަޖިލީހުން ރޭ ނިންމި އެވެ.
ޗެއާޕާސަނަށް ލަފާދޭ ކޮމިޓީގައި ތިއްބަވަނީ ވަގުތީ ޗެއާޕާސަން ޣަފޫރު އާއި ނަޝީދުގެ އިތުރުން، ކުރީގެ ރައީސް އިބްރާހިމް މުހައްމަދު ސޯލިހާއި، އެމްޑީޕީގެ ރައީސް އަބްދުﷲ ޝާހިދާއި، ކުރީގެ ޗެއާޕާސަން ފައްޔާޒު އިސްމާއިލާއި އަދި އެމްޑީޕީގެ ޕީޖީ ލީޑަރު އިބްރާހިމް ނާޒިލެވެ.
