ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މަސައްކަތްތައް ޑިޖިޓަލައިޒް ކުރުމަށްޓަކައި މައިކްރޯސޮފްޓް ޑައިނަމިކްސް އީއާރުޕީ ސިސްޓަމެއް ގާއިމުކުރުމުގެ މަޝްރޫއު ޕައިނެޓްވޯކް ކުންފުންޏަށް މަންފާވާ ގޮތަށް ބޮޑު އަގުގައި ހަވާލުކުރަން އެ ކުންފުނީގެ އިސްވެރިންތަކެއް މަސައްކަތް ކުރަމުންދާކަމުގެ ތުހުމަތުތަކެއް ފެންމަތިވެއްޖެ އެވެ.
އަދަދު އަށް އެނގިފައިވާ ގޮތުގައި މި މަޝްރޫއުގެ ކަންކަމުގައި އެޗްޑީސީން އެންމެ އިސްކޮށް ހަރަކާތްތެރިވަނީ އެ ކުންފުނީގެ ޑެޕިއުޓީ މެނޭޖިން ޑިރެކްޓަރު މުހައްމަދު އަސްބާހު އަލީ ނަސީރު އާއި އައިޓީ ހެޑް ޒާހިދު އެވެ. އަސްބާހު އާއި ޕައިނެޓްވޯކުގެ ވެރިންގެ ތެރޭގައި ހިމެނޭ އިސްމާއިލް ނަދީމަކީ މީގެ ކުރިން އާރްޑީސީގައި އެކުގައި މަސައްކަތްކުރެއްވި ދެ އެކުވެރިން ކަމަށް މައުލޫމާތު ލިބެ އެވެ.
މި މަޝްރޫއަށް އެންމެ ފުރަތަމަ ތިން މިލިއަން އެމެރިކާ ޑޮލަރު ނުވަތަ 46 މިލިއަން ދިވެހި ރުފިޔާ ކަނޑައެޅި ނަމަވެސް، މަޝްރޫއު ފެށުމުގެ މަރުހަލާގައި އެ އަދަދު ވަނީ ފަސް މިލިއަން ޑޮލަރަށް (77 މިލިއަން ރުފިޔާއަށް) އިތުރުކޮށްފަ އެވެ.
މީގެ އިތުރުން، ޑޮލަރުގެ ދަތިކަން ކުރިމަތިވެފައިވާ ކަމަށް ބުނެ، މަޝްރޫއުގެ އަގަށް އަންނަ ބަދަލުތަކާއެކު 98 މިލިއަން ރުފިޔާއާ ހަމައަށް ހަރަދު ކުރުމުގެ ހުއްދަ ދިނުމަށް ޑީއެމްޑީ އަސްބާހު ވަނީ ޕްރޮކިއުމަންޓް ޑިޕާޓްމަންޓަށް އަންގާފައި ކަމަށް މައުލޫމާތު ލިބެ އެވެ. އެއީ އަސްލު ބަޖެޓުގެ ދެގުނައަށްވުރެ ބޮޑު އަދަދެކެވެ.
މި މަޝްރޫއުގެ ޓާމްސް އޮފް ރިފަރެންސް (ޓީއޯއާރު) ތައްޔާރުކުރީ ޕައިނެޓްވޯކްގެ އެހީތެރިކަމާއެކު، ހަމައެކަނި އެ ކުންފުންޏަށް ކުރިމަތިލެވޭނެ ގޮތަށް ބައްޓަންކޮށްގެން ކަމަށް މައުލޫމާތު ލިބެ އެވެ. އެ ބިޑްގައި ބައިވެރިވީ ވެސް ހަމައެކަނި ޕައިނެޓްވޯކުންނެވެ. މަޝްރޫއުގެ އަގު 98 މިލިއަން ރުފިޔާއަށް ބޮޑުކުރަން ޒާހިދު ވެސް ބާރުއަޅަމުންދާ ކަމަށް މައުލޫމާތު ލިބެ އެވެ.
ޕައިނެޓްވޯކް މެދުވެރިކޮށް މި ސިސްޓަމް ގާއިމުކުރުމަށް ހިނގާނެ އަސްލު ހަރަދަކީ ގާތްގަނޑަކަށް ތިން މިލިއަން ޑޮލަރު ކަމަށްވެ އެވެ. މަޝްރޫއުގެ އަގު 98 މިލިއަން ރުފިޔާއަށް ބޮޑުކުރުމުން، ގާތްގަނޑަކަށް 3.3 މިލިއަން ޑޮލަރު ނުވަތަ 51 މިލިއަން ރުފިޔާގެ ނާޖާއިޒު ފައިދާއެއް ހޯދުމުގެ ފުރުސަތު ހުޅުވެ އެވެ.
މި މުއާމަލާތް ކާމިޔާބުވެއްޖެ ނަމަ އެޗްޑީސީގެ ބޯޑު މެންބަރުންނާއި މެނޭޖިން ޑިރެކްޓަރު އަލީ ޒުހައިރަށް ވެސް ފައިދާތަކެއްވާކަމުގެ ތުހުމަތު ވަނީ އަމާޒުވެފަ އެވެ.
މި މައްސަލައިގައި އެޗްޑީސީގެ ބަހެއް ހޯދަން އެ ކުންފުނީގެ އެމްޑީ ޒުހައިރަށް މި ނޫހުން ގުޅުމުން އޭނާ ވަނީ އެކަމާ ބެހޭ ގޮތުން ވާހަކަ ދައްކަން ދެކޮޅު ހަދައިފަ އެވެ. ޒުހައިރު ވިދާޅުވީ އެޗްޑީސީގެ މީޑިއާއަށް ގުޅައިގެން މައުލޫމާތު ހޯދުމަށެވެ. ނަމަވެސް އެޗްޑީސީގެ މީޑިއާއިން ވެސް އެކަމާ ގުޅިގެން މިހާތަނަށް މައުލޫމާތު ލިބިފައެއް ނުވެ އެވެ.
އެޗްޑީސީގެ ކޮރަޕްޝަންގެ މައްސަލަތަކެއް އެ ކުންފުނީގެ އެމްޑީގެ މަގާމުގައި އިބްރާހިމް ފަޒުލް ރަޝީދު ހުންނެވިއިރު ވެސް ފެންމަތިވި އެވެ. އެއާއެކު، އޭނާގެ އިތުރުން އެޗްޑީސީގެ ބައެއް ވެރިންގެ މައްސަލަތައް އެކި އިދާރާތަކަށް ވެސް ހުށަހެޅި އެވެ. އެކަމާ ގުޅިގެން ކުރިމަތިވި ޕްރެޝަރާ ގުޅިގެން އެމްޑީގެ މަގާމުން ފަޒުލް އިސްތިއުފާ ދެއްވި އެވެ.
