ބާސެލޯ ނަސަންދުރާގައި މިހާރު ކުރިއަށްދާ ހަތް ވަނަ ކެރަމް ވޯލްޑް ކަޕަކީ މިހާތަނަށް ބާއްވާ އެންމެ ފުރިހަމަ އެއް ކެރަމް ވޯލްޑް ކަޕް ކަމަށް އިންޓަނޭޝަނަލް ކެރަމް ފެޑެރޭޝަން (އައިސީއެފް)ގެ ރައީސް، ޖޯސެފް މޭޔާ ވިދާޅުވެއްޖެ އެވެ.
ރާއްޖޭގައި ކެރަމް ވޯލްޑް ކަޕް މި ބާއްވަނީ 11 އަހަރަށް ފަހު އެވެ. މީގެ ކުރިން 2014 ވަނަ އަހަރު ސަން އައިލެންޑް ރިސޯޓުގައި ކެރަމް ވޯލްޑް ކަޕް ވަނީ ބާއްވައިފަ އެވެ. އެ އަހަރު ރާއްޖޭގައި، އައިސީއެފްގެ ރައީސަކަށް ސްވިޒަލެންޑުގެ މޭޔާ އިންތިހާބުވިއިރު، އޭނާ ބުނީ، އެނބުރި ރާއްޖެ އައުމަކީ އޭނާ އަށް ވެސް ލިބުނު ވަރަށް ބޮޑު އުފަލެއް ކަމަށެެވެ.
ރޭ ބާސެލޯ ނަސަންދުރާ ހޮޓަލުގައި ބޭއްވި ކެރަމް ވޯލްޑް ކަޕްގެ ހުޅުވުމުގެ ރަސްމިއްޔާތުގައި ވާހަކަ ދައްކަަވަމުން މޭޔާ ވިދާޅުވީ، ރާއްޖެ އަކީ އޭނާ އަށް ފެންނަ ގޮތުގައި ކެރަމް އެސޯސިއޭޝަނާއި ކުޅިވަރު މިނިސްޓްރީ ގުޅިގެން އެކުއެކީގައި ފެނިގެންދާ ހަމައެކަނި ގައުމު ކަމަށެވެ. އަދި، ރާއްޖޭގައި ކެރަމް ވޯލްޑް ކަޕެއް މިހާ ފުރިހަމަކޮށް ރޭވިފައިވާތީވެ، މޭޔާ ވަނީ އެ ކަމަށްޓަކައި، ސްޕޯޓްސް މިނިސްޓްރީ، ކެރަމް އެސޯސިއޭޝަން އޮފް މޯލްޑިވްސް އަދި ބާސެލޯ ނަސަންދުރާ އަށް ޝުކުރު އަދާކޮށްފަ އެވެ.
ހަތް ވަނަ ކެރަމް ވޯލްޑް ކަޕްގެ ހުޅުވުމުގެ ރަސްމިއްޔާަތަށް ފަހު ރޭ ނެގި ގްރޫޕް ފޮޓޯ.--- ފޮޓޯ: އަދަދު ސްޕޯޓްސް / އިމޭޖަސް.އެމްވީ
"ހުރިހާ ކަމެއް ގުޅިފައި އޮންނާނީ ފައިސާއާ. ވަރަށް އުނދަގޫކަމެއް ފައިސާ ހަމަޖައްސައިގެންި ވަރުގެ ކަމެއް ކުރުމަކީ، ވަރަށް ފުރިހަމަ ވޯލްޑް ކަޕެއް މިއީ. އަހަރެމެންނަށް ކުރެވޭނެ ކަމަކީ ވަރަށް ވާދަވެރި ކެރަމް މެޗުތަކެއް ފެނިގެންދާ ފަދަ ކުޅުމެއް ދެއްކުން، ހުރިހާ ބައިވެރިންނަށް ކާމިޔާބު މުބާރާތަކަށް އަހަރެން އެދެން،" މޭޔާ ވިދާޅުވި އެވެ.
މޭޔާ ވަނީ ހަމައެކަނި އެއް ދުވަހެއް ނޫނީ ދެ ދުވަހެއްގައި ކެރަމް ކުޅެލުމަށްޓަކައި ވަރަށް ދިގު ދަތުރުތަކެއް ކޮށްގެން ރާއްޖެ އައިސްފައިވާ ކުޅުންތެރިން ވެސް އެބިތިބި ކަމަށެވެ. އަދި، މީގެއިން ވެސް އެގޭ ކަމަކީ، ކުޅިވަރެއްގެ ގޮތުގައި ކެރަމް ކުރިއަރައިގެން އަންނަ މިންވަރު ކަމަށާއި މިއީ ކެރަމްގެ ކުރިއެރުމަށްޓަކައި ބެލިކަމުގައި ވިޔަސް މުހިންމު ކަންކަން ގޮތުގައި މޭޔާ ފާހަގަކުރެއްވި އެވެ.
ސަތާރަ ގައުމަކުން 150 އަށް ވުރެން ގިނަ ކުޅުންތެރިން ކެރަމް ވޯލްްޑް ކަޕްގައި ކުޅޭއިރު، އޭގެ ތެރޭގައި ސްރީ ލަންކާ ވެސް ހިމެނެ އެވެ. ރޭގެ ރަސްމިއްޔާުތުގައި ވަނީ ދާދި ފަހުން ކުރިމަތިވި ޑިޓްވާ ތޫފާނުގައި ބޮޑު ގެއްލުންތަކެއް ކުރިމަތިވެފައިވާ ސްރީ ލަންކާއާ އެކު ތިބިކަމުގެ ޝުއޫރުފާޅުކުރުމުގެ ގޮތުން ސުކޫތެއް ގެނެސްފަ އެވެ.
ރޭ ބޭއްވި ކެރަމް ވޯލްޑް ކަޕްގެ ހުޅުވުމުގެ ރަސްމިއްޔާތުގެ ތެރެއިން މިނިސްޓަރު ރާފިއު (ކ) އައިސީއެފްގެ ރައީސް މޭޔާ އަދި ކެރަމް އެސޯސިއޭޝަންގެ ރައީސް އިބްރާހިމް.--- ފޮޓޯ: އަދަދު ސްޕޯޓްސް / އިމޭޖަސް.އެމްވީ
މި ރަސްމިއްޔާތުގައި ވާހަކަ ދައްކަވަމުން ސްޕޯޓްސް މިނިސްޓަރު އަބްދުﷲ ރާފިއު (ރާއްޕެ) ވިދާޅުވީ، ސަރުކާރުން މިދިޔަ ދެ އަހަަރަށް ބަލާއިރު ރާއްޖޭގައި ކެރަމްގެ ބޮޑު ދެ މުބާރާތް ހޯސްޓްކުރުމުގެ މަގުފަހިކޮށްދިނުމުން މީގެއިން އެނގިގެންދާ ކަމަކީ އެއްވެސް ކުޅިވަރެއް ތަފާތުނުކޮށް ޖުމްލަކޮށް ކުޅިވަރުގެ ކުރިއެރުމަށް ރައީސް، ޑރ. މުހައްމަދު މުއިއްޒުގެ ސަރުކާރުން ދޭ އަހައްމިއްޔަތުކަން ކަމަށެވެ.
ރާފިއު ވިދާޅުވީ، މި ފަދަ އިންޓަނޭޝަނަލް މުބާރާތް ރާއްޖޭގައި ބޭއްވުމުގެ މަގުސަދުތައް ބޮޑެތި ކަމަށާއި ސްޕޯޓްސް ޓޫރިޒަމް ފުޅާކުރުމާއި ރާއްޖެ އަކީ ބައިނަލްއަގުވާމީ ލެވަލް މަތި މުބާރާތް ބޭއްވޭނެ ތަނެއްގެ ގޮތުގައި މި ސަރަހައްދުން ފެންނަން އޮތުން ވެސް މުހިންމު ކަމަށް ރާފިއު ފާހަގަކުރެއްވި އެވެ.
ކެރަމް އެސޯސިއޭޝަންގެ ރައީސް އިބްރާހިމް ރަޝީދު ވަނީ ކެރަމް ވޯލްޑް ކަޕްގެ ކަންކަން އިންތިޒާމްކޮށް ހަމަޖައްސުމަށްޓަކައި، އެކި ފަރާތްތަކުން ދޭ އެއްބާރުލުމާ އެހީތެރިކަމަށް ޝުކުރު އަދާކޮށްފަ އެވެ. އަދި، މި ކަމުގައި ކާމިޔާބު ހޯދުމަށް ސަރުކާރުން ދޭ އެއްބާރުލުމަށްޓަކައި، އޭނާ ވަނީ ޝުކުރު އަދާކުރައްވައިފަ އެވެ.
އިއްޔެ ފެށި ކެރަމް ވޯލްޑް ކަޕް އަންނަ ހޮނިހިރު ދުވަހުގެ ނިޔަލަށް ބާސެލޯ ނަސަންދުރާގައި ކުރިއަށްދާނެ އެވެ.
