ނޮވެމްބަރު 11، އިން ފެށިގެން ބޭންކް އޮފް މޯލްޑިވްސްގެ ޑެބިޓު ކާޑު ބޭނުންކޮށްގެން ބޭރު ގައުމުތަކުގައި ވިޔަފާރި ކުރެވޭ އަދަދު އިތުރުވާނެ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
އަތޮޅު ތެރެއަށް ކުރައްވަމުން ގެންދަވާ ދަތުރުގެ ތެރެއިން މިރޭ މ. މުލީގައި ހުންނަވާ ވާހަކަދައްކަވަމުން މުއިއްޒު ވިދާޅުވީ ޑެބިޓު ކާޑު ބޮޑުކުރަނީ ބީއެމްއެލްގެ އަހަރީ ދުވަހުން ފެށިގެން ކަމަށެވެ. އެއީ ޖުމްހުރީ ދުވަސް ކަން ވެސް އެމަނިކުފާނު ފާހަގަކުރެއްވި އެވެ.
އެ ދުވަހުން ފެށިގެން ބޮޑުވާނެ ކަމަށް މުއިއްޒު މިރޭ އިއުލާނުކުރައްވާފައިވަނީ މައިގަނޑު ތިން ބޭނުމަކަށް ވިޔަފާރި ކުރެވޭ އަދަދެވެ.
އެގޮތުން ބޭރު ގައުމުތަކުގައި ހުންނަ ޕީއޯއެސް މެޝިންތަކުން ވިޔަފާރި ކުރެވޭ އަދަދު 1،000 ޑޮލަރަށް، އަދި އެއާލައިން ޓިކެޓާއި ހޮޓާތަކަށް ލާރި ދެއްކުމާށް ކާޑުން ދެއްކޭ އަދަދު 3,000 ޑޮލަރަށް އިތުރުވާނެ ކަމަށް މުއިއްޒު މިރޭ ވިދާޅުވި އެވެ.
މީގެ އިތުރުން، ބޭސްފަރުވާއަށް ބޭރަށް ދާ ފަރާތްތަކުން ހޮސްޕިޓަލަށް ދައްކަން ޖެހޭ ފައިސާ ޑެބިޓު ކާޑު މެދުވެރިކޮށް ދެއްކުމަށް ބޭންކުގައި އެދުމުން، އެ ތާރީހުން ފެށިގެން އެކަން ވާނެ ކަމަށް ވެސް މުއިއްޒު ވިދާޅުވި އެވެ.
"މިކަންކަމުގެ ސަބަބުން އަގުބޮޑުކޮށް ބްލެކް މާކެޓުން ޑޮލަރު ގަނެގެން މި ކުރަން ޖެހޭ ކަންތައްތައް. މި އަޅުވެތިކަމުން އިރާދަކުރެއްވިއްޔާ ރައްޔިތުން އަރައިގަތުމަށް އެޅޭ މުހިންމު ފިޔަވަޅު ތަކަކަށް ވާނެ،" އެމަނިކުފާނު ވިދާޅުވި އެވެ.
މިކަން މުއިއްޒު އިއުލާނު ކުރައްވާފައިވާއިރު ގެ ރުފިޔާ ޑެބިޓު ކާޑުތައް ބޭނުންކޮށްގެން ރާއްޖެއިން ބޭރުގެ އޭޓީއެމްތަކުން ނެގޭ ޑޮލަރުގެ ލިމިޓު ޖޫން 30، ގައި ވަނީ ކުޑަކޮށްފަ އެވެ. ހަމަ އެ ދުވަހު ރުފިޔާ ޑެބިޓު ކާޑުތަކުން ކުރާ ބޭރު މުއާމަލާތްތަކުގެ ލިމިޓު އަންނަ މަހުން ފެށިގެން 500 ޑޮލަރަށް ބޮޑުކުރި އެވެ.
ޑޮލަރު ލިމިޓު 500 އަށް ބޮޑުކުރަން ބޭންކުން ނިންމީ ބައެއް މީހުން ވިޔަފާރިކުރަން މުދާ ގެންނަން ބީއެމްއެލް ޑެބިޓު ކާޑުތަކުން ފައިސާ ދެއްކުން ހުއްޓުވަން ކަމަށް ބުނެ، ދިވެހިންގެ ތެރޭގައި ވިޔަފާރިކުރަން މަގުބޫލު ބައެއް ސައިޓުތަކަށް ފައިސާ ދައްކާ ކޮންމެ ފަހަރަކު 30 ޕަސެންޓުގެ ފީއެއް ނަގަން ނިންމުމާއެކު ކުރިމަތިވި ފާޑުކިޔުންތަކާއެކު އެވެ.
ބައެއް މަސްދަރުތަކުން ބުނާ ގޮތުގައި ފީ ނަގަން ނިންމާފައިވާ ލިސްޓުގައި ހިމެނޭ ސައިޓުތަކަށް ބޭންކުން މަހެއްގެ މައްޗަށް 20 މިލިއަން ޑޮލަރު ދައްކަން ޖެހެ އެވެ. މި އަދަދުން ހިސާބުކުރާއިރު، މި ސައިޓުތަކަށް އެކަނި އަހަރެއްގެ މައްޗަށް 240 މިލިއަން ހަރަދު ވާނެ އެވެ.
