އިސްކަންދަރު ސްކޫލުގެ ގްރެޖުއޭޝަނަށް ދިޔަ ދަރިވަރުންތަކެއްގެ ބެލެނިވެރިންނަށް ނާންގައި ސްކޫލްގެ މެނޭޖުމެންޓުން މަޖުބޫރުކުރުވައިގެން އެ ކުދިންގެ ބޮލާއި ތުނބުޅި މަތިމަސް ގަދަކަމުން ކޮށުވި މައްސަލަ ބަލަމުންދާ ކަމަށް ހިއުމަން ރައިޓްސް ކޮމިޝަނު (އެޗުއާރުސީއެމް) އިން ބުނެފި އެވެ.
މީޑިއާތަކަށް އެ ކޮމިޝަނުން ފޮނުވި މެސެޖެއްގައި ބުނީ ދަރިވަރުންތަކެއްގެ ބޯ ގަދަކަމުން ކޮށުވި މައްސަލަ އެޗްއާރުސީއެމްގެ ސަމާލުކަމަށް އައިސްފައިވާ ކަމަށެވެ.
"އިސްކަންދަރު ސްކޫލުގެ ދަރިވަރުންތަކަކަށް މަޖުބޫރު ކުރުވައިގެން ބޯކޮށުވިކަން ކޮމިޝަނުގެ ސަމާލުކަމަށް އައުމާ ގުޅިގެން ކަމާ ގުޅުންހުރި އިދާރާތަކުން އަމަލުކުރާ ގޮތް ކޮމިޝަނުން ބަލަމުން އަންނަކަން ދަންނަވަމެވެ،" އެޗްއާރުސީއެމުން ބުންޏެވެ.
އިސްކަންދަރު ސްކޫލުގެ ދަރިވަރުންތަކެއްގެ ބޯ ގަދަކަމުން ކޮށުވީ މިދިޔަ ހޮނިހިރު ދުވަހުގެރޭ އޮތް އެ ސްކޫލުގެ ގްރެޖުއޭޝަން ފެށެން ބައިގަޑިއެއްހާއިރަށްވެފައި ހުއްޓަ އެވެ.
އޭގެ ތެރެއިން ގިނަ ކުދިންގެ ބޯ ސްކޫލުގެ މެނޭޖުމެންޓުން ކޮށުވާފައި ވަނީ އެ ކުދިންގެ ބެލެނިވެރިންނަށް ވެސް ނާންގަ އެވެ. އޭގެތެރެއިން އެއް ކުއްޖެއްގެ ބޯ އިސްކަންދަރު ސްކޫލުގެ މެނޭޖުމެންޓުން ކޮށުވީ އެ ސްކޫލުގެ ފާހާނާ ތެރޭގައި ބަހައްޓައިގެންނެވެ.
ސްކޫލް ފާހާނާގައި ބަހައްޓައިގެން ގަދަކަމުން ބޮލާއި ތުނބުޅި މަތިމަސް ކޮށުވި ދަރިވަރުގެ މަންމަ އަދަދު އާ ވާހަކަދައްކަމުން ބުނީ އޭނާގެ ދަރިފުޅުގެ ބޯ ކޮށުވީ ގްރެޖުއޭޝަން ޖަލްސާ ފެށެން ބައި ގަޑިއެއްހާއިރަށް ވެފައި ހުއްޓައި ސްކޫލުގެ ފާހާނާ ތެރެއަށް ވައްދައި މަޖުބޫރު ކުރުވައިގެން ދަރިފުޅު ލައްވައި ކަމަށެވެ.
"ފުރަތަމަ ގެންދިޔައީ ޝޭޑީކެބިން ކައިރީގައި ހުރި ވީ ސެލޫންއަށް، ގެންގޮސް އެތަނުން ތުނބުޅި މަތިމަސް ކޮށުވަން އުޅުނީ ސްކޫލުގެ ލީޑިން ޓީޗަރެެއް، އެ މީހުންނަށް އެތަނުން ކޮށުނީ ހަމައެކަނި ދަރިފުޅުގެ މަތިމަސް، ދެން ދަރިފުޅު ބުނީ ބޮލެއް ނުކޮށާނަމޭ އެތަނަކުން، ކިޔާފައި ދެކޮޅު ހަދާފައި ސްކޫލަށް ދިޔައީ،" މި ނޫހާ ވާހަކަދެއްކި ބެލެނިވެރިޔާ ބުންޏެވެ.
އޭނާ ބުނީ ބޯކޮށަން ދެކޮޅު ހެދުމަށްފަހު އޭނާގެ ދަރިފުޅު ސްކޫލަށް ގޮސް ގެއަށް ފޮނުވައިދޭން ލީޑިން ޓީޗަރުންގެ ގާތުގައި އެދުނު ކަމަށެވެ.
ނަމަވެސް އެވަގުތު އެތަނުގައި ހާޒިރުވެ ތިބި ލީޑިން ޓީޗަރުން އެކަމަށް ދެކޮޅު ހަދައި ގެއަށް ވެސް ނުދެވޭނެ ކަމަށް ދަރިވަރު ގާތުގައި ބުނި ކަމަށެވެ. އަދި ގްރެޖުއޭޝަންގައި ވެސް ބައިވެރިވާން ޖެހޭނެކަމަށް ބުނެ އެ ކުއްޖާއަށް ބޯ ކޮށަން މަޖުބޫރު ކުރިވި ކަމަށް ބެލެނިވެރިޔާ ބުންޏެވެ.
"ދެން ދަރިފުޅު ކައިރީގައި ބުނީ އަމިއްލައަށް އެހެންވިއްޔާ ބޯ ކޮށާށޭ ކަތުރެއް ދީފައި، ދެން ވެސް ދަރިފުޅު ދެކޮޅު ހެދީމަ އެތަނުގައި ހުރި ޓީޗަރެއް ބުނީ ދަރިފުޅު ގާތުގައި ބޯ ކޮށާށޭ، ލީޑިން ޓީޗަރުން އެތިބީ ދޫކުރާ ގޮތަކަށް ނޫނޭ، ބުނީމަ ފާހާނާއަށް ވަދެ އަމިއްލައަށް ދަރިފުޅު ބޯކޮށީ،" ބެލެނިވެރިޔާ ބުންޏެވެ.
އެ ކުއްޖާއަކީ ދުވަހަކު ވެސް އަމިއްލަ ނަފުސަށް ގެއްލުމެއް ދިން ކުއްޖެއް ނޫންކަން ފާހަގަކޮށް ބެލެނިވެރިޔާ ބުނީ ބެލެނިވެރިޔާއަށް ނާންގައި މަޖުބޫރު ކުރުވައިގެން އަމިއްލަ އަތުން ދަރިފުޅުގެ ބޯ ކޮށަން މަޖުބޫރު ކުރުމަކީ ދިން އަނިޔާއެއް ކަމަށެވެ. އަދި ޖީސީއީ އޯލެވަލް ފެށެން ކުޑަ ދުވަސްކޮޅަކަށްވެފައި އޮއްވައި އެފަދަ އަނިޔާއެއް ދިނުމުން ކުއްޖާއަށް ވަރަށް ބޮޑަށް އަސަރު ކޮށްފައިވާ ކަމަށް ބެލެނިވެރިޔާ ބުންޏެވެ.
"އަޅުގަނޑު ޕްރިންސިޕަލް ގާތުގައި ބުނިން ކިހާ ބޮޑު އަނިޔާއެއްހެއްޔޭ ތިޔަ ދިނީ، މުޅި ހަޔާތުގައި ތައްޔާރު އެވީ ޖީސީއީ އޯލެވެލްއަށޭ، އެކަމަކު ޓެސްޓު ފެށެން މިހާ ކައިރިވެފައި އޮއްވައި ދަރިފުޅުގެ މުޅި ކިޔެވުން ހަލާކު ކޮށްލީނުންހެއްޔޭ ބޯ ކޮށުވަންށޭ ކިޔާފައި،" ބެލެނިވެރިޔާ ބުންޏެވެ.
މި ނޫހަށް ވަނީ ކުދިންގެ ބޯ ކޮށުވަން ގެންދިޔަ ސެލޫންއަށް އިސްކަންދަރު ސްކޫލުގެ ޓީޗަރެއްގެ އެކައުންޓުން އެރޭ ފައިސާ ޓްރާންސްފާ ކޮށްފައި ހުރި ސްލިޕްތަކެއް ލިބިފަ އެވެ. އެ ސްލިޕްތަކުން އެނގޭ ގޮތުގައި މިދިޔަ ހޮނިހިރު ދުވަހުގެރޭ 7:50 ހާއިރުން ފެށިގެން ގޮސް 9:00 އާ ދޭތެރޭގައި އެ ސްކޫލުގެ ލީޑިން ޓީޗަރެއްގެ އެކައުންޓުން އެ ސެލޫންއަށް އެކު ޖުމުލަ 600ރ. އެކި ފަހަރު މަތިން ފޮނުވާފައިވެ އެވެ.
މި މައްސަލައާ ގުޅިގެން އެޑިއުކޭޝަނުން މިހައިތަނަށް އަދި ބަހެއް ނުބުނެ އެވެ.
