ޓޫރިޒަމް ވިޔަފާރިތަކާއި ބޭރު ފައިސާއިން ބޮޑު އާމްދަނީ ލިބޭ ވިޔަފާރިތަކަށް ލިބޭ އާމްދަނީ ބޭންކުތަކަށް ޖަމާކުރުމާއި އެ ފައިސާއިން ބަޔެއް ބޭންކުތަކުން މާރުކުރަން މަޖުބޫރުކުރާ ބޭރު ފައިސާއާ ބެހޭ ގާނޫނަށް މިއަދު އަމަލު ކުރަން ފަށައިފި އެވެ.
ބޭރު ފައިސާއާ ބެހޭ ގާނޫނު އޮތް ގޮތުން "ކެޓެގަރީ އޭ" ގައި ހިމެނޭ ރިސޯޓުތަކަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު ނުވަތަ މީލާދީ މަހެއްގެ ތެރޭގައި ލިބޭ އާމްދަނީގެ 20 ޕަސެންޓު މާރުކުރަން މަޖުބޫރެވެ.
އަދި "ކެޓެގަރީ ބީ" ގައި ހިމެނޭ ސަފާރީތަކާއި ގެސްޓުހައުސްތަކާއި ހޮޓާތަކަށް އަންނަ ކޮންމެ ޓޫރިސްޓެއްގެ ބޮލަކަށް 25 ޑޮލަރު ނުވަތަ މީލާދީ މަހެއްގެ ތެރޭގައި ލިބޭ އާމްދަނީގެ 20 ޕަސެންޓު މާރުކުރަން ޖެހެ އެވެ.
ޓޫރިޒަމް ނޫން ވިޔަފާރިތަކުގެ ތެރެއިން ބޭރު ފައިސާ ޖަމާކުރުމާއި މާރުކުރުން މަޖުބޫރު ވަނީ 2022 ގެ ތެރޭގައި 15 މިލިއަން ޑޮލަރަށް ވުރެ މަތިން އާމްދަނީ ލިބޭ ވިޔަފާރިތަކަށް އެކަންޏެވެ. މި ވިޔަފާރިތަކަށް ވެސް މީލާދީ މަހެއްގެ ތެރޭގައި ލިބޭ އާމްދަނީގެ 20 ޕަސެންޓު މާރުކުރަން މަޖުބޫރެވެ.
މާލިއްޔަތު ކޮމިޓީން އެ ގާނޫނުގެ މަސައްކަތް ކުރި އިރު، ޓޫރިޒަމް ދާއިރާގެ ވިޔަފާރިތަކުން ހިންގާ ދެ ޖަމިއްޔާ ކަމުގައިވާ މޯލްޑިވްސް އެސޯސިއޭޝަން ފޯ ޓްރެވަލް އިންޑަސްޓްރީސް (މަޓީ) އާއި މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުވާ އޮޕަރޭޓާސް (މަޓާޓޯ) އާ ބައްދަލުކުރި އެވެ. ނަމަވެސް އެ ފަރާތްތަކުން ހުށަހެޅި ކަންކަން ކޮމިޓީ ރިޕޯޓުގައި ހިމަނާފައި ނެތެވެ.
ކޮމިޓީ ރިޕޯޓުގައި ހިމަނާފައި ނެތް ނަމަވެސް، ބޭރު ފައިސާ މާރުކުރަން ޖެހޭ މިންވަރު 20 ޕަސެންޓުން 10-15 ޕަސެންޓާ ދޭތެރޭގެ އަދަދަކަށް ކުޑަކޮށްދިނުމަށް މަޓީން އެދުނު ކަމަށް، އެ ޖަމިއްޔާއާ ހަވާލާދީ ނޫސްތަކުން ރިޕޯޓުކޮށްފައި ވެ އެވެ. މަޖިލީހުގައި މިހެން އެދުނު ނަމަވެސް، ގާނޫނުގައި ހިމަނާފައި ހުރި އަދަދުތަކަށް ރިސޯޓުތަކުން ރުހޭ ކަމަށް އެމްއެމްއޭއިން ބުނެފައިވެ އެވެ.
