ކޮރަޕްޝަނާއި ނުހައްގު މުއްސަނދިކަން ހޯދުމުގެ މައްސަލަތައް ތަހުގީގުކޮށް، ދައުވާކުރުމަށް ހުރި ގޮންޖެހުންތައް ނައްތާލަން ދިވެހިރާއްޖޭގެ ގާނޫނުލްއުގޫބާތަށް ގެންނަން ޖެހޭ އިސްލާހުތައް އަންނަ ހަފުތާގެ ތެރޭގައި ރައްޔިތުންގެ މަޖިލީހަށް ހުށަހަޅުއްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް އެކްސްގައި ކުރެއްވި ޕޯސްޓެއްގައި، ދައުލަތުގެ އިދާރާތަކުގެ ތެރޭގައި ކޮރަޕްޝަނާއި ނުހައްގު މުއްސަނދިކަން ހޯދުމުގެ މައްސަލަތައް އަަށަގެންފައިވާ ކަން ފާހަގަކުރައްވަމުން، ވިދާޅުވީ، ގާނޫނަށް ގެންނަ ބަދަލުތަކާއެކީ މިފަދަ މައްސަލަތައް ބެލުމަށް ފަސޭހަ ވެގެން ދާނެ ކަމަށެވެ.
ގާނޫނުލްއުގޫބާތަށް ގެންނަން ނިންމާފައިވާ އިސްލާހުތަކުގެ ތަފުސީލެއް ރައީސް ނުދެއްވަ އެވެ. ނަމަވެސް ގާނޫނަށް ހުށަހަޅާ އެއް އިސްލާހަކީ ނުހައްގު މުއްސަނދިކަން ހޯދާ ލިބިގަތުމުގެ ކުށުގެ މާއްދާ ކަމަށް އެމަނިކުފާނުގެ ޕޯސްޓުގައި ބަޔާންކުރެއްވި އެވެ.
"އެގޮތުން، ގާނޫނުލްއުގޫބާތުގެ 515 ވަނަ މާއްދާއަށް ގެނެވޭ އިސްލާހުގެ ސަބަބުން ރައީސުލްޖުމްހޫރިއްޔާ އާއި ވަޒީރުންނާއި ރައްޔިތުންގެ މަޖިލީހުގެ މެންބަރުންނާއި ފަނޑިޔާރުން ހިމެނޭގޮތުން، ދައުލަތުގެ މުވައްޒަފުންނާއި ދައުލަތުގެ މުވައްޒަފެއްގެ މަގާމު އަދާކޮށްފައިވާ ފަރާތްތަކުން ހޯދަމުންދާ ނުވަތަ ހޯދާފައިވާ ނުޙައްގު މުއްސަނދިކަމުގެ މައްސަލަތައް ބެލުމަށް ފަސޭހަވެގެންދާނެ،" ރައީސް ވިދާޅުވި އެވެ.
ސަރުކާރުން ބަދަލުކުރާ މާއްދާގައި އޮންނަނީ ހަތަރު ކަމެއް ކުށެއްގެ ގޮތުގައި ކަނޑައަޅާފަ އެވެ. އަދި އެ ކުށްތައް ދަރަޖަކުރުމުގައި އޮންނަނީ ރައީސް އާއި ވަޒީރުންނާއި މަޖިލިސް މެންބަރުންގެ އިތުރުން ފަނޑިޔާރެއް ނަމަ އެ ކުށަކީ ޖިނާޔަތުގެ ދެ ވަނަ ދަރަޖައިގެ ކުށެއް ކަމުގައި ކަމަށެވެ. އެ ނޫން މީހުން މި ކުށް ކޮށްފި ނަމަ ބަލަނީ އެއީ ޖިނާޔަތުގެ ތިން ވަނަ ދަރަޖައިގެ ކުށެއް ކަމަށެވެ.
titledesc
