ވިލިމާލޭގައި ސިޓީ ކައުންސިލުން ގާއިމުކުރާ އޮފީސް އިމާރާތުގެ ގްރައުންޑް ފްލޯ ރައީސް އޮފީހުގެ އެންގުމަށް އިމިގްރޭޝަނާއި، ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރް) ގެ އޮފީސް ގާއިމު ކުރަން މާލެ ސިޓީ ކައުންސިލުން ދޫކޮށްލައިފި އެވެ.
މިއަދު މާލެ ސިޓީ ކައުންސިލްގެ ބޭއްވި ރަސްމީ ޖަލްސާގައި ބައިވެރި މެންބަރުންގެ އަގުލަބިއްޔަތުން ފާސްކުރީ ރައީސް އޮފީހުން އެންގި ގޮތަށް، އިމިގްރޭޝަނާއި، ޑީއެންއާރްއަށް ވިލިމާލޭގައި އިމާރާތްކުރާ 2000 އަކަފޫޓުގެ އޮފީސް އިމާރާތުގެ ގްރައުންޑް ފްލޯ ކުލި ނުނަގައި ހަވާލުކުރުމަށެވެ.
އެ ފަސް ބުރީގެ އިމާރާތުން ސިޓީ ކައުންސިލްގެ ބޭނުމަށް ހުންނާނީ އެއްވަނަ ފަންގިފިލާއިން ފެށިގެން ކަމަށް އެ ކައުންސިލުން ވަނީ ނިންމާފަ އެވެ.
އެ ނިންމުމާ ދެކޮޅަށް ވާހަކަ ދައްކަވާ ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު ވިދާޅުވީ ގްރައުންޑް ފްލޯ އެއްކޮށް ދިނުމުން ތިރީގައި ކައުންޓަރެއް ބަހައްޓާނެ ޖާގައެއް ވެސް ނުހުންނާނެ ކަމަށެވެ.
އޭގެއިތުރުން، އިމިގްރޭޝަން އަދި ޑީއެންއާރުގެ ބަޖެޓުގައި އޮފީސް ކުއްޔަށް ހިފާނެ ފައިސާ ނެތީތޯ ސައިފް ސުވާލު އުފެއްދެވި އެވެ.
ސައިފް ވިދާޅުވީ ސިޓީ ކައުންސިލްގެ ސާވިސް ސެންޓަރެއް ގާއިމުކުރަން، ކައުންސިލްގެ ހަރަދުގައި، ކައުންސިލުން އަޅާ އިމާރާތެއްގެ ގްރައުންޑް ފްލޯއިން ކައުންސިލަށް ސާވިސް ކައުންޓަރެއް ބަހައްޓާނެ ޖާގަވެސް ނެތި، އެކީއެކަށް މައި ސަރުކާރަށް ހިލޭ ދޫކޮށްލުމުން ސިޓީ ކައުންސިލުގެ އެކި ޑިޕާޓްމަންޓުތަކާއި، ސެކްޝަންތައް ހުރީ މާލޭގެ އެތައް މިތަނުގައި ކުއްޔަށް ނަގާފައިވާ އިމާރާތްތަކުގައި ކަމަށެވެ.
ވިލިމާލެ އޮފީސް އިމާރާތުން ހިލޭ އިމިގްރޭޝަނާއި ޑީއެންއާރްއަށް ޖާގަ ދޫކުރުމުގެ ބަދަލުގައި، ކައުންސިލުން މިހާރު ކުއްޔަށް ނަގާފައިވާ އިމާރާތްތަކަށް ކުރާ ހަރަދަށް ލުއި ހޯދަން ވިސްނަންޖެހޭކަން ވެސް ސައިފް ފާހަގަކުރެއްވި އެވެ.
"އަޅުގަނޑުމެން އެތައް ގޮތަކުން ހޯދައިގެން ތިބި ބިލްޑިންގް އެއްގެ އެެންމެ ތިރީ ފްލޯރވެސް ހިލޭ ދޭންވީ، އެކަމަކު އަޅުގަނޑުމެން މިތިބީ މިހާރު ވެސް މިތަން ވެސް ސަރުކާރު ހިއްސާވާ ކުންފުންޏެއް [އެމްޑަބްލިއުއެސްސީ] ގެ އަތުން ކުއްޔަށް ހިފައިގެންނޭ،" ސައިފް ވިދާޅުވި އެވެ.
މޭޔަރު އާދަމް އާޒިމާއި، ޑެޕިއުޓީ މޭޔަރު އަހްމަދު ނަރީޝް ރަސްމީ ދަތުރުފުޅެއްގައި އިންޑިޔާގައި ވަޑައިގެންފައިވާތީ، ރިޔާސަތުގައި އިންނެވީ ޕީއެންސީއަށް ނިސްބަތްވެވަޑައިންނަވާ މާފަންނު ހުޅަނގު އުތުރު ދާއިރާގެ ކައުންސިލަރު މުހައްމަދު އަރީޝް އެވެ.
އޭނާ ވިދާޅުވީ މިއީ ސަރުކާރުގެ ނިންމުމެއް ކަމަށާއި، ކައުންސިލުގެ ފަރާތުން ރައީސް ޑރ. މުހައްމަަދު މުއިއްޒުއަށް އެއްބާރުލުން ލިބެމުންދާނެ ކަމަށެވެ.
