އިންޑިއާގެ އެހީގައި ހދ. އަތޮޅުގައި އެގްރިކަލްޗާ އިކޮނޮމިކް ޒޯނެއް ތަރައްގީކުރުމަށާއި ހއ.އަތޮޅުގައި މަސްބަންދުކުރާ ކާރުހާނާއެއް އަޅަން ސަރުކާރުން އެއްބަސްވެއްޖެ އެވެ.
ރައީސް ޑރ.މުހައްމަދު މުއިއްޒު އިންޑިއާއަށް ކުރައްވާ ރަސްމީ ދަތުރުގައި އެގައުމުގެ ބޮޑުވަޒީރު ނަރެންދުރާ މޯދީއާ އެކު ބޭއްވެވި މަޝްވަރާތަކަށް ފަހު ރައީސް އޮފީހުން އިއްޔެ ނެރުނު ބަޔާނުގައިވާ ގޮތުން ހދ. އަތޮޅުގައި ދަނޑުވެރިކަމުގެ އިގުތިސާދީ ސަރަހައްދު ތަރައްގީކުރުމުގެ އިތުރުން، އެ އަތޮޅުގައި ޓޫރިޒަމް ދާއިރާއިން ވެސް އިންޑިއާއިން އިންވެސްޓްކުރާނެ އެވެ.
އެގްރިކަލްޗާ އިކޮނޮމިކް ޒޯނަކީ އެކަމަށް ރަށެއް ނުވަތަ ރަށްތަކެއް ހާއްސަކޮށްގެން ކުރާ ކަމަަކަށް ވާ އިރު އެކަމަށް ދޫކުރަނީ ކިތައް ރަށްކަމެއް އަދި އެއީ ކޮންކޮން ރަށްތަކެއް ކަމެއް އަދި ނޭނގެ އެވެ. ޓޫރިޒަމަށް އިންޑިއާއިން އިންވެސްޓްކުރާ އިރު އެކަމަށް ދޫކުރާނީ ކިތައް ރަށް ކަމެއް ވެސް ނޭނގެ އެވެ.
މަސްބަންދުކުރާ ކާރުހާނާއެއް އަޅަން ހއ. އިން ދޫކުރާނީ ކޮން ރަށެއް ކަމެއް ވެސް އަދި ނޭނގެ އެވެ.
އިއްޔެ ނެރުނު ބަޔާނުގައިވާ ގޮތުން ، އިންޑިއާގެ އެހީތެރިކަމާ އެކު ތަރައްގީކުރާ ހަނިމާދޫ އިންޓަނޭޝަނަލް އެއާޕޯޓާއި ގަން އިންޓަނޭޝަނަލް އެއާޕޯޓްގެ ބޭނުން އެންމެ ފުރިހަމައަށް ހިފަން، ގުޅިގެން މަސައްކަތް ކުރަން ވެސް އިއްޔެ ގެ މަޝްވަރާތަކުގައި އެއްބަސްވި އެވެ.
ދަނޑުވެރިކަމުގެ އިގުތިސާދީ ސަރަހައްދެއް ތަރައްގީކުރަން އިންޑިއާއާ އެކު އެއްބަސްވި އިރު، ހަމަ އެފަދަ މަޝްރޫއެއް ހިންގަން ޗައިނާގެ ކުންފުންޏަކާ އެއްކޮށް ވެސް ސަރުކާރުން މީގެ ކުރިން ސޮއިކުރި އެވެ.
