އިޒްރޭލުގެ ޕާސްޕޯޓު މަނާ ކުރަން ރާއްޖެއިން މަސައްކަތް ކުރަނީ ޔަހޫދީންނާ ދެކޮޅުވެގެން ނޫން ކަމަށާއި ހުރިހާ ދީނެއްގެ މީހުންނަށް ވެސް ރާއްޖެއިން މަރުހަބާ ކިޔާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމެރިކާގެ ޕްރިންސްޓަން ޔުނިވާސިޓީގެ ޑީންސް ލީޑާޝިޕް ސީރީޒްގައި ބުރާސްފަތި ދުވަހު ވާހަކަ ދައްކަވަމުން ރައީސް ވިދާޅުވީ އިޒްރޭލު ޕާސްޕޯޓު މަނާ ކުރުމުގެ ބޭނުމަކީ، އެ ގައުމުން ފަލަސްތީނުގައި ހިންގާ ޖަރީމާތައް ބަލައިނުގަނެ އެކަން ކުށްވެރި ކުރުން ކަމަށެވެ.
"ރާއްޖޭގެ މަގުސަދަކީ އިޒްރޭލުން ފަލަސްތީނާ ދެކޮޅަށް މި ހިންގާ ޖަރީމާތައް، މި ކުށްތައް ބަލައިނުގަނެ، ކިތަންމެ ކުޑަ ގައުމެއް ނަމަވެސް ރާއްޖެއަށް ކުރެވޭނެ ކަމެއް ކުރުން. ރައްޔިތުންގެ މަޖިލީހުން ފާސްވާހާ އަވަހަކަށް އިޒްރޭލުގެ ޕާސްޕޯޓު މަނާވާނެ،" އެ ޔުނިވާސިޓީގެ ދަރިވަރަކު ކުރި ސުވާލަކަށް ޖަވާބު ދެއްވަމުން ރައީސް މުއިއްޒު ވިދާޅުވި އެވެ.
އެހެން ސުވާލަކަށް ޖަވާބު ދެއްވަމުން ރައީސް ވިދާޅުވީ، އިޒްރޭލުގެ ޕާސްޕޯޓު މަނާ ކުރަނީ އެއްވެސް ހާލެއްގައި ޔަހޫދީންނާ ދެކޮޅުވެގެން ނޫން ކަމަށެވެ. އަދި ހުރިހާ ދީނެއްގެ މީހުންނަށް ވެސް ރާއްޖެއިން މަރުހަބާ ކިޔާނެ ކަމަށް ރައީސް ވިދާޅުވި އެވެ.
"އަޅުގަނޑު މި ވާހަކަ މި ދަންނަވަނީ ވަރަށް ސާފުކޮށް. އިޒްރޭލު ޕާސްޕޯޓު މަނާ ކުރުމުގެ މަގުސަދަކީ އިޒްރޭލުން ފަލަސްތީނުގައި ހިންގާ ކަންތައްތައް ބަލައިނުގަތުން. އެއީ ޔަހޫދީން ނުވަތަ އެހެންވެސް ދީނަކާ ގުޅުން ހުރި ކަމެއް ނޫން. ހެވާއި ނުބަޔަކީ ވަކި ދީނަކަށް ނިސްބަތްވާންޖެހޭ ކަމެއް ނޫން. ޔަހޫދީއެއް ވިޔަސް، ނަސާރާއެއް ވިޔަސް މުސްލިމެއް ވިޔަސް، އެންމެންނަށް ވެސް ރާއްޖެއިން މަރުހަބާ ކިޔާނެ،" އެމަނިކުފާނު ވިދާޅުވި އެވެ.
އޭގެ އިތުރުން، އެމަނިކުފާނަކީ އަދި ރާއްޖެއަކީ އެންޓި-ސެމިޓިކް ބައެއް ނޫން ކަމަށް ރައީސް ވިދާޅުވި އެވެ. އެމަނިކުފާނު ގަބޫލު ކުރައްވާ ގޮތުގައި ހުރިހާ އިންސާނުން ވެސް ހަމަހަމަ ކަމަށް ރައީސް ވިދާޅުވި އެވެ.
"އަޅުގަނޑުމެންނަކީ އެންޓި-ސެމިޓިކް ބައެއް ނޫން. އަޅުގަނޑުންނަކީ ހުރިހާ ގައުމަކާ ވެސް ރަހުމަތްތެރި ބައެއް. އަޅުގަނޑު ގަބޫލު ކުރަނީ އެންމެންނަކީ ވެސް ހަމަހަމަ ބައެއް ކަމަށް. ހުރިހާ އިންސާނުންނަކީ ވެސް ހަމަހަމަ ބައެއް. އެންމެންނަށް ވެސް ދިރި ހުރުމުގެ ހައްގު ލިބިގެންވޭ. ކޮންމެ އިންސާނަކީ ވެސް އަބުރުވެރި މީހެއް،" ރައީސް ވިދާޅުވި އެވެ.
އިޒްރޭލުގެ ޕާސްޕޯޓުގައި ރާއްޖެ އެތެރެވުން މަނާ ކުރަން އިދިކޮޅު މޯލްޑިވިއަން ޑިމޮކްރެޓިކް ޕާޓީން އޮތީ ހުށަހަޅައިފަ އެވެ. ރައްޔިތުންގެ މަޖިލީހުގެ ކޮމިޓީއަކަށް މިހާރު ފޮނުވައިގެން އުޅެނީ އެ ބިލެވެ. އެ ބިލު އެހެން އޮއްވައި، ގާނޫނުތަކަށް އިސްލާހު ގެނެސްގެން، އިޒްރޭލުގެ ޕާސްޕޯޓު މަނާ ކުރާނެކަން ސަރުކާރުން އިއުލާނު ކުރީ ޖޫން 2، 2024، ގަ އެވެ.
ނަމަވެސް އެއަށްފަހު އެންމެ ދެ މަސް ދުވަސް ވެސް ނުވަނީސް ސަރުކާރުން ވަނީ އިޒްރޭލުގެ ޕާސްޕޯޓު މަނާ ކުރުމާ ގުޅޭ ގޮތުން ތަފާތު ވާހަކައެއް ދައްކައި، ވާހަކަ ބަދަލުކޮށްގަ އެވެ.
"ބައެއް ބޭފުޅުންގެ ހަމަ ވަރަށް ބޮޑު ކަންބޮޑުވުމެއް އެއީ މިހާރު ބިލު ހުށަހެޅިފައި އޮތް ގޮތުން، އިޒްރޭލުގެ ޕާސްޕޯޓް ހޯލްޑްކުރާ ފަލަސްތީނުގެ ވަރަށް ބައިވަރު ރައްޔިތުން ވެސް އެބަތިބި، މިލިޔަނުން ގުނައިލެވޭ، އެހެންވީމާ ބްލެންކެޓް ބޭންއެއް އަޅުގަނޑުމެން އެހެން ކޮށްފިކަމުގައި ވަނީ ނަމަ ކިހިނެތްތޯ ވާނީ، މިއީ ކުޑަކޮށް ވިސްނައިލަން ޖެހޭ ކަހަލަ ކަންކަން،" ޖުލައި 13، ގައި ބަންޑާރަ ނައިބު އަހުމަދު އުޝާމް ވިދާޅުވެފައިވެ އެވެ.
