ރައީސް ޑރ. މުހައްމަދު މުއިއްޒު ޗައިނާގެ ފޮރިން މިނިސްޓަރު ވަންގް ޔީއާ ބައްދަލުކުރައްވާ، ދެ ގައުމުގެ ދެމެދު ރަސްމީ މަޝްވަރާތަކެއް ބާއްވައިފި އެވެ.
މި މަޝްވަރާތައް ކުރިއަށް ގެންގޮސްފައިވަނީ މިހާރު އެމެރިކާގެ ނިއުޔޯކުގައި އދ. ގެ އާންމު މަޖިލީހުގެ 79 ވަނަ ސެޝަނުގެ ހަވާސާގަ އެވެ. ރައީސް މުއިއްޒުގެ އިތުރުން ދިވެހި ސަރުކާރުން މަޝްވަރާތަކުގައި ބައިވެރިވި ވަފުދުގައި ފޮރިން މިނިސްޓަރު މޫސާ ޒަމީރު އަދި ހާރިޖީ ވުޒާރާގެ އިސްވެރިން ހިމެނުނެވެ.
ޗައިނާގެ ފަރާތުން މި މަޝްވަރާތަކުގައި ބައިވެރިވީ އދ. ގެ އާންމު މަޖިލީހުގައި ބައިވެރިވުމަށް އެ ގައުމުގެ ސަރުކާރުން ފޮނުވި މަތީ ފަންތީގެ ވަފުދުންނެވެ. އެ ގައުމުގެ ވަފުދު ލީޑުކުރައްވަނީ ހާރިޖީ ވަޒީރު ވަންގް އެވެ.
އެ ގައުމުގެ ހާރިޖީ ވަޒީރުގެ އިތުރުން، ވަންގް އަކީ ޗައިނާގަ ވެރިކަންކުރާ ކޮމިއުނިސްޓު ޕާޓީގެ ލިޓިކަލް ބިއުރޯގެ މެމްބަރެކެވެ. އެ ޕާޓީއާއި ރައީސް މުއިއްޒުގެ ޕީއެންސީ ދަނީ ގުޅިގެން މަސައްކަތްތަކެއް ކުރަމުންނެވެ.
ރާއްޖެއާ ޗައިނާ އާ ދެމެދު މިއަދު އެމެރިކާގެ ނިއުޔޯކުގައި ބޭއްވި މަޝްވަރާ ބައްދަލުވުމުގެ ތެރެއިން ---- ފޮޓޯ: ރައީސް އޮފީސް
ރައީސް އޮފީހުން މިރޭ ބުނި ގޮތުގައި، މި ބައްދަލުވުމުގައި ދެ ގައުމުގެ މެދުގައި ވެފައިވާ އެއްބަސްވުންތަކާއި، ދެ ގައުމުން ގުޅިގެން ކުރިއަށްގެންދާ މަޝްރޫއުތަކާ ގުޅޭގޮތުން މަޝްވަރާކުރި އެވެ. އަދި ރާއްޖޭގެ ފަތުރުވެރިކަން ކުރިއެރުވުމުގައި ޗައިނާއިން ދޭ އެހީތެރިކަން ފާހަގަކުރައްވާ ރައީސް މުއިއްޒު ޗައިނާއަށް ޝުކުރު ދެންނެވި ކަމަށްވެ އެވެ.
މި ބައްދަލުވުމުގައި ޗައިނާގެ ވަފުދުން ވަނީ ދެ ގައުމުގެ ދެމެދު ގުޅުން އޮތް ހުރިހާ ދާއިރާއަކުން އެހީތެރިކަން ދޭނެ ކަމުގެ ޔަގީންކަން ދީފައި ކަމަށްވެސް ރައީސް އޮފީހުން ބުންޏެވެ. ހާއްސަކޮށް މޫސުމީ ބަދަލުތަކަށް އަހުލުވެރިވުމަށް ކުރާ މަސައްކަތްތަކުގައި އެއްބާރުލުން ދޭނެ ކަމުގެ ޔަގީންކަން ޗައިނާއިން ދިން ކަމަށްވެ އެވެ.
ރާއްޖެ-ޗައިނާ ބައްދަލުވުމާ ގުޅޭގޮތުން ދިވެހި ހާރިޖިއްޔާއިން ކުރި ސޯޝަލް މީޑިއާ ޕޯސްޓެއްގައި ބުނީ، ދެ ގައުމުގެ ގުޅުން އިތުރު ހަރުފަތަކަށް ގެންދިއުމާ ބެހޭގޮތުން މިއަދުގެ ބައްދަލުވުމުގައި ދެ ގައުމުގެ އިސްވެރިން މަޝްވަރާކުރި ކަމަށެވެ.
އދ. ގެ އާންމު މަޖިލީހާއި ސަލާމަތީ މަޖިލީހުގައި ބައިވެރިވެވަޑައިގަތުމަށް ރައީސް މުއިއްޒު އެމެރިކާއަށް ވަޑައިގެންނެވީ ހޮނިހިރު ދުވަހު އެވެ. މި ދަތުރުގައި ގިނަ ގައުމުގަތަކުގެ އިސްވެރިންނާ އެމަނިކުފާނު ބައްދަލުކުރައްވާނެ ކަމަށް ބެލެވޭއިރު މިއީ އެފަދައިން ބޭއްވި ފުރަތަމަ ބައްދަލުވުމެވެ.
