ސްރީލަންކާގެ ރިޔާސީ އިންތިހާބު ކާމިޔާބު ކުރެއްވި އަނޫރާ ކުމާރާ ޑިސަނަޔަކެއަށް ރައީސް ޑރ. މުހައްމަދު މުއިއްޒު ތަހުނިޔާ ވިދާޅުވެއްޖެ އެވެ.
ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ ގާތް އަވައްޓެރިއެއްގެ ގޮތުން ދެގައުމުގެ ދެމެދުގައި ޒަމާނުއްސުރެއް އޮންނަ ގުޅުން އިތުރަށް ވަރުގަދަ ކުރަން ތައްޔާރަށް ހުންނެވި ކަމަށެވެ.
"[ސްރީލަންކާގެ] ރިޔާސީ އިންތިހާބު ކާމިޔާބު ކުރެއްވި އިންތިހާބީ ރައީސް، އަނޫރާ ކުމާރާ ޑިސަނަޔަކެއަށް ހިތުގެ އެންމެ ފުންމިނުން ތަހުނިޔާ ދަންނަވަން، ގާތް އަވައްޓެރިންގެ ހައިސިއްޔަތުން ދިވެހިރާއްޖެ އާއި ސްރީލަންކާ އާ ދެމެދު އޮތް ތާރީހީ ރަހުމަތްތެރިކަން އިތުރަށް ހަރުދަނާ ކުރުމަށް މަނިކުފާނާއެކު މަސައްކަތް ކުރުމަށް އަޅުގަނޑު އުއްމީދު ކުރަން،" ރައީސް މުއިއްޒުގެ ޕޯސްޓުގައި ލިޔުއްވާފައިވެ އެވެ.
އެމަނިކުފާނުގެ ޕޯސްޓު ނިންމަވައިލައްވަމުން ވިދާޅުވީ ޑިސަނަޔަކެގެ ވެރިކަމުގައި ސްރީލަންކާއަށް ފާގަތި ދުވަސްތަކެއް ލިބުން އެދިވަޑައިގަންނަވާ ކަމަށެވެ.
ސްރީލަންކާގެ އާ ރައީސްއަކު ހޮވަން އިއްޔެ ބޭއްވި އެ ގައުމުގެ ރިޔާސީ އިންތިހާބު އަނޫރާ ކުމާރާ ޑިސަނަޔަކެ ކާމިޔާބު ކުރެއްވީ ޕްރިފަރެންސް ވޯޓުތަކުން ކުރި ހޯއްދަވައިގެންނެވެ. ސްރީލަންކާގެ ރިޔާސީ އިންތިހާބުގައި ވޯޓުލުން ހަމަޖެހިފައި އޮންނަނީ ކޮންމެ މީހަކަށް ވެސް ވެރިކަމަށް ގެންނަން އެންމެ ބޭނުންވާ ތަރުރީބަކުން ތިން ކެންޑިޑޭޓަކަށް ވޯޓު ދޭ ގޮތަށެވެ.
ފުރަތަމަ ބުރުގައި ގުނާނީ ކޮންމެ ވޯޓެއްގެ ވެސް އެއްވަނައިގައި އޮންނަ ނަމަށް ބަލައިގެންނެވެ. އެގޮތަށް ގުނާއިރު، އެއްވެސް ކެންޑިޑޭޓަކަށް 50 އިންސައްތަ ކާމިޔާބު ނުކުރެވިއްޖެ ނަމަ އިންތިހާބު ކާމިޔާބު ކުރާ ކެންޑިޑޭޓަކު ހޮވަން ދެވަނަ އަދި ތިންވަނައަށް ދީފައި ހުރި ވޯޓުތައް ގުނަ އެވެ.
ޕްރިފަރެންސް ވޯތުތައް ގުނާއިރު، ނަތީޖާ ބަލާނީ ފުރަތަމަ ގުނިއިރު، އެންމެ ކުރީގައި އުޅޭ ދެ ކެންޑިޑޭޓުންނަށް ލިބިފައިވާ ވޯޓުން 50 އިންސައްތަ ލިބޭ ކެންޑިޑޭޓަކަށް ބަލައިގެންނެވެ.
ޑިސަނަޔަކެ ހުވާ ކުރެއްވުމުގެ ރަސްމިއްޔާތު އޮންނާނީ މާދަމާގެ ވަގުތެއްގައި ކަމަށް އެ ގައުމުގެ މީޑިއާތަކުން ރިޕޯޓު ކުރެ އެވެ. ނަމަވެސް އެ ރަސްމިއްޔާތުގެ ތަފުސީލެއް ރަސްމީކޮށް އަދި އާންމެއް ނުކުރެ އެވެ.
