ރައީސް ޑރ. މުހައްމަދު މުއިއްޒުގެ ފަރާތުން ޕީއެންސީގެ މެންބަރުންނަށް ފައިސާ ބަހާ ވާހަކައާ ގުޅޭ ގޮތުން "ބައިލައްކަ" ނަމުގައި އަދަދު ނޫހުން ގެނެސްދިން ޑޮކިއުމެންޓްރީއާ ގުޅިގެން ޕީއެންސީގެ ވެރިން ކަންބޮޑުވެ، އެހާ ވަރަށް "ތުރުތުރު" އެ އަޅަނީ އެކަމުގައި ހަގީގަތެއް އޮތުމުން ކަމަށް، ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޔާމީންގެ އަމިއްލަ ގެ، ހ. ދޫވެހީގައި ހުންނަ ޕީއެންއެފްގެ އޮފީހުގައި ރޭ ބޭއްވި ޖަލްސާގައި އެ މަނިކުފާނު ވިދާޅުވީ ނޫސްވެރިންނަކީ އެ މީހުންނަށް ގަބޫލު ކުރެވޭ ވާހަކަތަކެއް ރައްޔިތުންގެ ސަމާލުކަމަށް އަދި ސަރުކާރުގެ ސަމާލު ކަމަށް ގެންނަ ބައެއް ކަމަށެވެ.
"ބައިލައްކަ" ޑޮކިއުމެންޓްރީގައި ފެންނަނީ މިދިޔަ އާދީއްތަ ދުވަހުގެ ރޭ ރައީސް މުހައްމަދު މުއިއްޒުގެ އަމިއްލަ ގެއަށް، ދުވާފަރު ދާއިރާގެ މެންބަރު މުހައްމަދު އަލީ ވަންނަ ތަނާއި، އެއަށް ފަހު ބަރުކަޅު ދަބަހެއް ނެރެގެން ދާތަނާއި، އެ ދަބަސް މުހައްމަދު އަލީ ޕީއެންސީ އޮފީހަށް ވައްދާ މަންޒަރެވެ. އަދި އެ ވަގުތާ އިއްތިފާގުވެ، ޕީއެންސީ އަށް ނިސްބަތްވާ މަޖިލީހުގެ ގިނަ އަދަދެއްގެ މެންބަރުންތަކެއް ވަކިވަކިން ޕީއެންސީގެ އޮފީހަށް ކުޑަ ހިނދުކޮޅަކަށް ވަދެނުކުންނަ މަންޒަރެވެ.
އެ ރެޔަކީ ރައީސް އޮފީހުން ޕީއެންސީގެ މެންބަރުންނަށް ފައިސާ ވެސް ބެހި ރޭ ކަމަށް މަސްދަރުތަކުން އަދަދު ނޫހަށް މައުލޫމާތު ދީފައިވެ އެވެެ.
"ބައިލައްކަ" ޑޮކިއުމެންޓްރީ ވައިރަލްވާން ފެށުމުން، ރައީސްގެ ފަރާތުން މެންބަރުންނަށް ފައިސާ ދޭ ވާހަކައަކީ ދޮގެއް ކަމާއި އަދަދު ނޫހާމެދު ފިޔަވަޅު އަޅާނެ ކަމުގެ އިންޒާރު ރައީސް އޮފީހުން ދިނެވެ.
"އަދަދު ނޫހުގައި މި ވާހަކަތައް ދައްކަން ފެށީމަ ދައުލަތުން މި ދެއްވީ ވަރުގަދަ އިންޒާރެއް. މިއީ ހަމަ އިންޒާރުގެ ސަރުކާރަކަށް މި ވަނީ،" ޕީއެންއެފްގައި ބޭއްވި ޖަލްސާގައި ޔާމީން ވިދާޅުވި އެވެ.
އެ ވާހަކަތަކުގައި "އޮއްޓަރެއް ނެތް ކަމަށް ވަންޏާ ކީއްވެތޯ އެހޭ ތުރުތުރު އަޅަންވީ،" ޔާމީން ވިދާޅުވި އެވެ.
"އޭގައި ކޮންމެވެސް ވަރެއްގެ ތެދެއް އޮތީމަ އެހާވަރަށް ތުރުތުރު އެ އަޅަނީ. އެހެން ނޫނީ ކޮންކަމަކާތޯ ކަންބޮޑުވާންވީ."
ވެރިކަމުގައި ހުންނަވާއިރު، ރައީސްއާބެހޭ ގޮތުން މީހުން ލައްކަ ވާހަކަ ދައްކާނެ ކަމަށާއި ބާޒާރުމަތީގައި ދައްކާ ހުރިހާ ވާހަކައެއްގައި ރައީސުލްޖުމްހޫރިއްޔާގެ ނަން ގެނެވިއްޖެ ކަމަށްވަންޏާ ދެން ފިޔަވަޅު އަޅަންވީތޯ ޔާމީން ސުވާލު އުފެއްދެވި އެވެ.
"އެއީތޯ ޑިމޮކްރަސީއަކީ، އެއީތޯ ފްރީޑަމް އޮފް އެކްސްޕްރެޝަންއަކީ. ފްރީޑަމް އޮފް އެކްސްޕްރެޝަން އެބަ އޮތް ދިވެހިރާއްޖޭގައި ރައްޔިތުންގެ މަޖިލީހުގެ މެންބަރުންނަށް ގާނޫނުއަސާސީގައި ދޭ މިންވަރަށް ހަމަ ރައްޔިތުންނަށް ވެސް މިހާރު އެ ވާހަކަ ދެއްކެން އެބަ އޮތް. އެ ފްރީޑަމް އޮންނަން ޖެހޭނެ. އެ ފްރީޑަމްއާއެކީ ޑިމޮކްރަސީގައި ވެރިޔަކަށް ކުރިޔަށްދާން ކެރެންވާނެ،" ޔާމީން ވިދާޅުވި އެވެ.
އަދަދު ނޫހާމެދު ފިޔަވަޅު އަޅަން ބަޔާން ނެރުނީ ކިހައި މިންވަރަކަށް ފުދިގެންތޯ ވެސް ޔާމީން ސުވާލު އުފެއްދެވި އެވެ. ފިޔަވަޅު އަޅާ ވާހަކަ އެ ދައްކަނީ ބިރު ގެންނެވުމާއި އަދަދު ނޫހުން ގެނެސްދީފައި ވަނީ ދޮގު ވާހަކައެއެއް ކަން ދެއްކުމަށް ކަމަށް ވެސް ޔާމީން ވިދާޅުވި އެވެ.
"އެކަމަކު ހިނގަހިނގާ އޮތް ނޫހަކާ ދޭތެރޭގައި މިހެން ކުރާ ކޮންމެ ކަަކާމެދު ފިޔަވަޅު އަޅާކަމުގައި ވަންޏާ، އެ ބުނެދެނީ ލައްކަ ވާހަކަ،" ޔާމީން ވިދާޅުވި އެވެ.
"ބައިލައްކަ" ޑޮކިއުމެންޓްރީއާ ގުޅިގެން ޕީއެންސީގެ މަޖިލީހުގެ މެންބަރުންނާއި ބައެއް ސަޕޯޓަރުން ވެސް ދަނީ އަދަދު ނޫހަށް އިންޒާރުތައް ދެމުންނެވެ.
