ރާއްޖޭގެ އިގްތިސާދަށް ކުރިމަތިވަމުންދާ ގޮންޖެހުންތައް ދުވަހުން ދުވަހަށް ގޯސްވެ، އަރައިގަނެވޭނެ މަގުތައް ބަންދުވާތީ ކަންބޮޑުވާ ކަމަށް މޯލްޑިވްސް ޓްރޭޑް އެސޯސިއޭޝަން (އެމްޓީއޭ) އިން މިއަދު ބުނެފި އެވެ.
އެމްޓީއޭއިން ނެރުނު ނޫސް ބަޔާނެއްގައި ބުނީ ރާއްޖޭގެ އިގްތިސާދު ބަނގުރޫޓު ވަމުންދާކަމުގެ ހުރިހާ އަލާމާތެއް މިހާރު ފެންނަން ފަށާފައިވާ ކަމަށާއި ނަމަވެސް އެ ހުރިހާ އިންޒާރުތަކަށް ސަރުކާރުގެ އިސްވެރިން ތިބީ ދެލޯ މަރާލައިގެން ކަމަށެވެ.
"ރާއްޖޭގެ މިއަދުގެ ހާލަތަކީ ގައުމުގެ ދަރަނި އިގްތިސާދީ ރަތް ރޮނގު ހުރަސްކޮށްފައިވުން. ބަޖެޓް ސަޕޯޓަށް ފައިސާ ލިބޭތޯ ކޮންމެ ދުވަހަކު ވެސް މި ވަނީ އެހެން ގައުމުތަކުގައި ސަލާން ޖަހަން ޖެހިފައި. ކޮންމެ މަހެއް ވެސް ނިމިގެން މިދަނީ ދައުލަތުގެ މުވައްޒަފުންނަށް މުސާރަ ދެވިދާނެތޯ ހިތާހިތާ ސުވާލުކޮށްލަން ޖެހޭ ހާލަތުގައި،" އެމްޓީއޭއިން ބުންޏެވެ.
ކުދި އަދި މެދު ފަންތީގެ ވިޔަފާރިތައް ބަނގުރޫޓުވެ، ރައްޔިތުން ހާލުގައި ޖެހި އިގްތިސާދީ ބޮޑު ކާރިސާއެއްގެ ވިލާގަނޑު ބޯމަތިވެފައިވީ ނަމަވެސް، ސަރުކާރުން މި ހާލަތު ސިއްރުކޮށް ގައުމުގެ ހާލަތު ހާލަތު ހޭރިޔާ ކޮށްފައި ހުރީ އެންމެ ރަނގަޅު މިސްރާބަށް ކަމަށް ދައްކާތީ ކަންބޮޑުވާ ކަމަށް ވެސް އެމްޓީއޭއިން ބުންޏެވެ.
އެމްޓީއޭއިން ބުނީ ހާލަތު ސިއްރުކޮށް ރައްޔިތުންނަށް ހުވަފެން ދައްކަމުން ދިޔުމަކީ ގައުމުގެ އިގްތިސާދީ ސިޔާސަތު ރޭވުމުގެ ޒިންމާ ރައްޔިތުން ހަވާލުކޮށްފައި ތިބި އިސް ފަރާތްތަކުން ރައްޔިތުންނަށްވާ ވަރަށް ބޮޑު ހިޔާނާތެއް ކަމަށެވެ.
"ރާއްޖޭގެ އިގްތިސާދީ އަސްލު ހާލަތު އާންމު ރައްޔިތުންނަށް ފުރިހަމައަށް ބަޔާންކޮށްދީ ސަރުކާރުން ސިޔާސީ މަގުސަދު ހާސިލު ކުރުމަށް ކުރަމުންދާ އިސްރާފުތައް ކުޑަކޮށް، ސިޔާސީ މަގާމުތައް މަދުކޮށް، ދައުލަތުގެ މުއައްސަސާތަކުގައި ރޯމާދުވާލު ހިންގަމުންދާ ކޮރަޕްޝަންގެ އަމަލުތައް ހުއްޓުވައި ދެއްވުމަށް ގައުމުގެ ވަލިއްޔުލް އަމުރަށް ގޮވާލަން،" އެމްޓީއޭއިން ބުންޏެވެ.
އޭގެ އިތުރުން، ރާއްޖޭގެ ކުދި އަދި މެދުފަންތީގެ ވިޔަފާރިވެރިންނަށް ކުރިމަތިވަމުންދާ ގޮންޖެހުންތައް ކުޑަކޮށް، ގައުމަށް ކުރިމަތިވަމުންދާ އިގްތިސާދީ ކާރިސާއިން އަރައިގަނެވޭނެ މަގުފަހިކޮށް އިގްތިސާދު އަލުން ހަމަ މަގަށް އަޅުވަން ސަރުކާރުން ކަމާ ގުޅުންހުރި ޖަމިއްޔާ ޖަމާއަތްތަކާއި ސިޔާސީ ހުރިހާ ފިކުރާއެކީ ވެސް މަޝްވަރާގެ މޭޒަށް އައުމަށް އެ ޖަމިއްޔާއިން ވަނީ ގޮވާލާފަ އެވެ.
