ރައީސް ޑރ. މުހައްމަދު މުއިއްޒުގެ ސަރުކާރުން ހަރަދު ކުޑަކޮށްފައިވާ ކަމަށް ބުނާއިރު އެ މުއްދަތުގެ ތެރޭގައި ދައުލަތަށް ޑޮލަރުން ލިބޭ އާމްދަނީ އިތުރުވިއިރު ވެސް ތިޖޫރީގައި ހުރި ފައިސާ ހުސްވުން ދިރާސާކުރަން ޖެހޭ ކަމަށް ރައްޔިތުންގެ މަޖިލީހުގެ މައިނޯރިޓީ ލީޑަރު އިބްރާހިމް ނާޒިލް ވިދާޅުވެއްޖެ އެވެ.
އިދިކޮޅު މައި ޕާޓީ, މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ސިލްސިލާކޮށް ބާއްވަމުންދާ "ހަވަރުބެރު" ގެ ހަތްވަނަ ޕްރޮގްރާމްގައި ވާހަކަ ދައްކަވަމުން ނާޒިލް ވަނީ މި ސަރުކާރުގެ މާލީ ސިޔާސަތުތަކަށް ފާޑުވިދާޅުވެ އެކަންކަން ދިރާސާކުރަން ޖެހޭ ކަމަށް ވިދާޅުވެފަ އެވެ.
"ޑޮލަރުން ލިބޭ އާމްދަނީ އިތުރުވެއްޖެ, ހަރަދު ކުރަން ޖެހޭ އަދަދު ވެސް ކުޑަވެއްޖެ. އެހެން ނަމަވެސް ތިޖޫރީގައި ހުރި ލާރި ހުސްވެއްޖެ. މިކަން އެބަ ޖެހޭ ދިރާސާކުރަން. ޔުނިވާސިޓީއަކާ ހަވާލުކޮށްގެން ވެސް މިކަން ދިރާސާކުރަން އެބަ ޖެހޭ," ނާޒިލް ވިދާޅުވި އެވެ.
މިހާތަނަށް ދުނިޔޭގެ އެއްވެސް ގައުމެއްގައި އާމްދަނީ އިތުރުވެ ހަރަދުތައް ކުޑަ ކުރުމުން ތިޖޫރީ ހުސްވެފައި ނުވާ ކަމަށް ނާޒިލް ވިދާޅުވި އެވެ. އޭނާ އެ އިޝާރާތް ކުރެއްވީ ސަރުކާރުގެ މާލީ ސިޔާސަތުތަކަށެވެ.
މި ސަރުކާރުން ބުނަމުންދާ ގޮތުގައި ދައުލަތަށް ލިބޭ އާމްދަނީ އެހެން އަހަރުތަކަށް ވުރެ ވަނީ އިތުރުވެފަ އެވެ. އަދި, ހަރަދުތައް ވެސް ވަނީ އެތައް ބިލިއަން ރުފިޔާއަކުން ކުޑަކޮށްފަ އެވެ. ނަމަވެސް, ސަރުކާރުގެ މާލީ ހިސާބުތައް އާންމުނުކުރާތީ އެކަންކަން ޔަގީން ނުކުރެވެ އެވެ.
ފިޗު ރޭޓިންސްއިން ރާއްޖޭގެ ކްރެޑިޓު ރޭޓިން ދަށްކުރުމާ ގުޅިގެން ރާއްޖޭން ވިއްކާފައިވާ 500 މިލިއަން ޑޮލަރުގެ ސުކޫކުން އިންވެސްޓަރުން އަތްދޫކޮށްލައި، މުޅި ދުނިޔޭގައި ވެސް ސުކޫކެއް ޑީފޯލްޓުވާ ފުރަތަމަ ގައުމަކަށް ރާއްޖެ ވުމުގެ ބިރު ވަނީ ބޮޑުވެފަ އެވެ.
"ރާއްޖޭގެ ސުކޫކުގެ އަދު ދަށަށް މިދިޔައީ ސަރުކާރުން މި ގެންގުޅޭ ސިޔާސަތުގެ ތެރެއިން ހާއްސަކޮށް ޑޮލަރުގެ ރިޒާވު ދަށްވެގެންކަން ފާހަގަކުރެވިފައިވޭ. މި ނާގާބިލުކަމާއި ދޯހަޅި ސިޔާސަތުތަކުގެ ސަބަބުން އިގުތިސޯދަށް މި އަންނަ ބަދަލާއެކު ދުނިޔޭގެ ހުރިހާ އިދާރާއަކުން ވެސް, ހާއްސަކޮށް ސުކޫކުގެ އަގު ވެސް ދަށަށް ގޮސްފައި މިއޮތީ," އެކަމަށް އިޝާރާތް ކުރައްވައި ނާޒިލް ވިދާޅުވި އެވެ.
މި ހުރިހާ ކަންބޮޑުވުންތަކެއް ހުރި ނަމަވެސް، ސަރުކާރުން ބުނަނީ ދައުލަތުގެ ހަރަދު ކުޑަކުރުމުގެ ސިޔާސަތުތައް ތަންފީޒުކުރަން ފަށައި، އާމްދަނީ އިތުރުކުރަން ފަށާފައިވާ މަސައްކަތްތައް ކޮޅެއް ޖެހުމުގައި ޖެހުމުުން ރޭޓިން މަތި ވާނެ ކަމަށެވެ.
