މާލީ ތާށިކަން އިންތިހާއަށް ބޮޑުވެ ސަރުކާރުގެ ހަރަދުތައް ކުޑަކުރުން ނޫން ގޮތެއް ނެތް ކަމަށް ބައިނަލްއަގުވާމީ މާލީ އިދާރާތަކުން ބުނެ ކަންބޮޑުވުން ފާޅުކުރަމުންދާ ދަނޑިވަޅެއްގައި އެޑިއުކޭޝަން މިނިސްޓަރީއަށް ސީނިއާ ޕޮލިޓިކަލް ޑިރެކްޓަރެއް އައްޔަނުކޮށްފި އެވެ.
"އަދަދު" އަށް އެނގިފައި ވާގޮތުގައި އެޑިއުކޭޝަނަށް ސީނިއާ ޕޮލިޓިކަލް ޑިރެކްޓަރެއްގެ ގޮތުގައި އައްޔަނު ކުރީ ހަބީބު މުހައްމަދު އެވެ. އެޑިއުކޭޝަނުގެ ސީނިއާ ޕޮލިޓިކަލް ޑިރެކްޓަރުގެ މަގާމަށް ހަބީބު އައްޔަނު ކޮށްފައިވާކަން އެ މިނިސްޓަރީގެ މީޑިއާ އޮފިސަރު ވަނީ "އަދަދު" އަށް ކަށަވަރު ކޮށްދީފަ އެވެ.
އެޑިއުކޭޝަން މިނިސްޓަރީގެ ސީނިއާ ޕޮލިޓިކަލް ޑިރެކްޓަރެއްގެ މަގާމަށް ހަބީބު އައްޔަނު ކުރިކަން އޭނާ ވަނީ ސޯޝަލް މީޑިއާގައި އިއުލާނު ކޮށްފަ އެވެ. އެކަން އިއުލާނު ކުރުމާއެކު އެނާގެ ގާތް ރަހުމަތްތެރިން ދަނީ އޭނާއަށް މަރުހަބާ ކިޔައި މެސެޖުތައް ކުރަމުންނެވެ.
ރާއްޖޭގެ މާލީ ހާލަތު ގޯސްވެ، ޑޮލަރުގެ ތާށިކަން އިންތިހާއަށް އޮތް ދަނޑިވަޅުގައި ސިޔާސީ މުވައްޒަފުންގެ އަދަދު މަދުނުކޮށް، އަދިވެސް އިތުރަށް ސިޔާސީ މުވައްޒަފުން ނަގަމުންދާތީ ގިނަ ބަޔަކު އަންނަނީ ފާޑު ކިޔަމުންނެވެ.
އެޑިއުކޭޝަނުގެ ސިޔާސީ މަގާމަކަށް ހަބީބު އައްޔަނު ކުރިއިރު، މިދިޔަ މެއި 1 އާ ހަމައަށް އެ މިނިސްޓަރީގައި 32 ސިޔާސީ މުވައްޒަފުން ތިބިކަމަށް މި ނޫހަށް މައުލޫމާތު ދީފައިވެ އެވެ.
އެ ހުރިހާ ސިޔާސީ މުވައްޒަފުންގެ މުސާރައަށް ކޮންމެ މަހަކަށް އެއް މިލިއަނަށްވުރެ ގިނަ ރުފިޔާ ހަރަދު ކުރެ އެވެ. އަހަރެއްގެ މައްޗަށް ބަލާނަމަ، އެ މުވައްޒަފުންނަށް މުސާރަ ދިނުމަށް 12.2 މިލިއަން ރުފިޔާ ހަރަދު ކުރެ އެވެ. ފަސް އަހަރަށް ހިސާބުކުރާ ނަމަ އެއީ 61.2 މިލިއަން ރުފިޔާ އެވެ.
ވެރިކަމަށް ވަޑައިގަތުމުގެ ކުރިން ރައީސް ޑރ. މުހައްމަދު މުއިއްޒު ވައުދުވީ ސިޔާސީ މުވައްޒަފުންގެ އަދަދު 700 އަށްވުރެ އިތުރު ނުކުރާށެވެ. ނަމަވެސް އެ އަދަދު އެއަށް ވުރެ ބޮޑު ތަނުން ވަނީ އިތުރުވެފަ އެވެ.
