އިންޑިއާގެ ނެޝަނަލް ކޮލެޖު އޮފް ޑިފެންސްގެ ވަފުދަކުން ރާއްޖެއަށް މިހާރު ކުރަމުންދާ ދަތުރުގެ ތެރެއިން ފޮރިން މިނިސްޓްރީގެ އިސްވެރިންނާ މިއަދު ބައްދަލުކޮށްފި އެވެ.
ފޮރިން މިނިސްޓްރީން ބުނީ އެ ބައްދަލުވުމުގައި މައުލޫމާތު ދިނީ އެ މިނިސްޓްރީގެ ދަށުން ހިންގަމުން އަންނަ ފޮރިން ސާވިސް އިންސްޓިޓިއުޓް އޮފް މޯލްޑިވްސް (ފޮސިމް) އިންނެވެ. މި ބައްދަލުވުމުގައި ރާއްޖޭގެ ފަރާތުން އިސްކޮށް ބައިވެރިވެވަޑައިގަތީ ފޮރިން ސެކްރެޓަރީ ފާތިމަތު އިނާޔާ އެވެ.
ރާއްޖޭގެ ހާރިޖީ ސިޔާސަތާ ގުޅޭ ގޮތުން އެ ވަފުދަށް މައުލޫމާތު ދިންއިރު ދޭދޭ ގައުމުތަކާއި އެކިއެކި މަލްޓިލެޓަރަލް ފޯރަމްތަކުގައި ރާއްޖޭގެ ހާރިޖިއްޔާއިން ކުރާ މަސައްކަތްތަކާ ގުޅޭ މައުލޫމާތު ވެސް ވަނީ އިންޑިއާގެ ވަފުދަށް ދީފަ އެވެ.
އެ ކޮލެޖަކީ އިންޑިއާގެ ސަރުކާރުން އެގައުމުގެ ޑިފެންސް މިނިސްޓްރީ މެދުވެރިގެން ހިންގާ ކޮލެޖެކެވެ. ނިއު ދިއްލީގައި ހުންނަ މި ކޮލެޖު އުފެއްދީ 1960 ގަ އެވެ. އިންޑިއާގެ އަސްކަރިއްޔާގެ އިސް އޮފިސަރުންގެ ތެރެެއިން ގިނަ ބަޔަކު މަތީ ތައުލީމު ހާސިލުކުރަނީ މި ކޮލެޖުންނެވެ.
މި ސަރުކާރު ވެރިކަމާ ހަވާލުވުމަށް ފަހު ރާއްޖެ އާއި އިންޑިއާއާ ދެމެދު އޮތް ޒަމާންވީ ގުޅުން ހީނަރުވެގެންދިޔަ އެވެ. ނަމަވެސް, ޖެހުނު މައްސަލަތައް ހައްލުކޮށް ދެ ގައުމުން އަނެއްކާ ވެސް މަސައްކަތް ކުރަމުންދަނީ ގުޅުން އިއާދަ ކުރުމަށެވެ.
