ޕީއެންސީ އަށް ނިސްބަތްވާ ރައްޔިތުންގެ މަޖިލީހުގެ މެންބަރުންނަށް ކޮންމެ މަހަކު ރައީސް ޑރ. މުހައްމަދު މުއިއްޒު ބަހާ ފައިސާ ހޯއްދަވާ ގޮތާމެދު އެ ޕާޓީގެ ބައެއް މެންބަރުން ކަންބޮޑުވެއްޖެ އެވެ.
މިހާރު ހިނގަމުންދާ 20 ވަނަ ރައްޔިތުންގެ މަޖިލީސް މެއި މަހު ފެށި ފަހުން ކޮންމެ މަހަކު ވެސް، ބޭނުންވާ ކޮންމެ މެންބަރަކަށް ރައީސްގެ ފަރާތުން 50،000ރ. ލިބޭ ކަމަށް އެ ޕާޓީގެ ބައެއް މެންބަރުން ވިދާޅުވި އެވެ. އެކަން މީގެ ކުރިން ވެސް ރިޕޯޓުކޮށްފައިވާނެ އެވެ.
ރައްޔިތުންގެ މަޖިލީހުގައި ޕީއެންސީ ތަމްސީލުކުރާ 75 މެންބަރުން ތިއްބެވިއިރު، އެ ހުރިހާ މެންބަރުންނަށް ފައިސާ ދޭން މަހަކު 3.75 މިލިއަން ރުފިޔާ ބޭނުންވާނެ އެވެ. ޕާޓީގެ ސިޔާސީ ހަރަކާތްތަކާއި އިދާރީ ހަރުދަށް ވެސް ރައީސްގެ ފަރާތުން ފައިސާ ދޭ ކަމަށް، އެކަން އެނގޭ ބައެއް މެންބަރުން "އަދަދު" ނޫހަށް ވިދާޅުވި އެވެ.
"ކޮންމެ މަހަކު ރައީސް ހައެއްކަ މިލިއަން ރުފިޔާ ބަހާ ވާހަކަ މި ދައްކަނީ. ކުޑަ އަދަދެއް ނޫން. އެ ވަރަށް އެ ފައިސާ ހޯދަނީ ކިހިނެއް ކަމެއް ވެސް ނޭނގޭ،" މެންބަރަކު ވިދާޅުވި އެވެ.
އޭނާ ވިދާޅުވި ގޮތުގައި ބައެއް މެންބަރުން މަހަކު 100،000ރ ވެސް ދެ އެވެ. އެއީ ރައީސް މުއިއްޒުގެ އިތުބާރު ބޮޑަށް ލިބިވަޑައިގެންފައިވާ މެންބަރުންކަމަށް ކަމަށް އޭނާ ގަބޫލު ކުރައްވަ އެވެ.
ބައެއް މެންބަރުން ވިދާޅުވި ގޮތުގައި ފައިސާ ދިނުމަށް ގުޅުއްވަނީ ރައީސް އޮފީހުގެ މިނިސްޓަރެއްގެ ގޮތުގައި ހުންނެވި، ރައީސްގެ އަރިސް ބޭފުޅެކެވެ.
"މި ފައިސާ އެ ހޯއްދަވަނީ ކިހިނެއްތޯ ސުވާލު އުފެދޭ،" މެންބަރަކު ވިދާޅުވި އެވެ.
ޕީއެންސީގެ ސިޔާސީ ހަރަކާތްތަކަށް ސަރުކާރުގެ ބައެއް އެސްއޯއީތައް ހިންގަން ތިބި ފަރާތްތަކުން ފައިސާ ހޯދައިދޭ ކަމަށް އެ ޕާޓީގެ އެތެރޭގެ ކަންކަން އެނގޭ ބައެއް މަސްދަރުތަކުން "އަދަދު" ނޫހަށް ބުނެފައި ވެ އެވެ.
"ރައީސްގެ ފަރާތުން" ދެއްވާ ފައިސާއާ ނުލައި ވެސް މަޖިލިސް މެންބަރަކަށް ކޮމެޓީ އެލެވެންސްގެ ގޮތުގައި ލިބޭ 20،000ރ. އާއެކު ކޮންމެ މަހަކު ޖުމުލަ 82،500ރ. ލިބެ އެވެ.
ރައީސްގެ ފަރާތުން މެންބަރުންނަށް ފައިސާ ބަހާއިރު، އެ މަނިކުފާނަކީ ވިޔަފާރިއެއް ކުރައްވާ ބޭފުޅެއް ނޫނެވެ. ރައީސުލްޖުމްހޫރިއްޔާގެ މުސާރައިގެ ގޮތުގައި އެމަނިކުފާނަށް މަހަކު ލިބިވަޑައިގަންނަވާނީ 100،000ރ. އެވެ.
މެންބަރުންނަށް ފައިސާ ދޭ މައްސަލަ އެންޓި ކޮރަޕްޝަން ކޮމިޝަނުން ބަލަމުންދާކަން ހާމައެއް ނުކުރެ އެވެ.
