ބްރިޖުގެ ލޭނެއް "މަދުވެގެން" އެކަމާ ކޯފާވެ، ކުރީގެ ރައީސް ޔާމީން "ބަވައިލި" ވާހަކައަކީ ތެދެއް ކަމަށާއި އެ ބައްދަލުވުމުގެ ތެރެއިން އެމަނިކުފާނަށް ރޮވުނު ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ބްރިޖުގެ ލޭނެއް މަދުވެގެން މުއިއްޒަށް ކީރިތި ކުރެއްވެންދެން ބަވައިލި ވާހަަކަ މިފަހުން ދެއްކެވީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އެވެ. ސަންގު ޓީވީ އަށް ދެއްވި ހާއްސަ އިންޓަވިއުއެއްގައި އަބްދުއްރަހީމް ދެއްކެވި އެވާހަކަ އާ ބެހޭ ގޮތުން ރައީސް އިއްޔެ ވާހަކަ ދެއްކެވީ ވެސް ސަންގު ޓީވީއަށް ދެއްވި އިންޓަވިއުއެއްގަ އެވެ.
ރައީސް ވިދާޅުވީ ފިޒިކަލީ ވަކިކޮށްފައިވާ ސައިކަލު ލޭނެއް ބްރިޖްގައި ނެތިގެން، އެފަދަ ލޭނެއް އިތުރުކޮށްފައި ނޫނީ ނުހުޅުވަން އަންގަވައި ޔާމީން "ބަވައިލީ" ސަކީނާ މަންޒިލުގައި އެހެން އެތައް ވަޒީރުންނެއްގެ ކުރިމަތީގައި ކަމަށެވެ. އެހެން ނަމަވެސް ބްރިޖުގެ މަަސައްކަތް ހައުސިން މިނިސްޓްރީއާ ހަވާލުކުރި އިރު ބްރިޖު ހަދަން އޮތީ މިހާރު ވެސް އެ އޮތް ގޮތަށް ކަމަށް ވެސް އެމަނިކުފާނު ވިދާޅުވި އެވެ.
"މިނިސްޓާސް، އެމްޕީސް، ސާޅީހަށް ވުރެ ގިނަ މީހުން ތިބޭނެ އެތާނގައި، ދެން [ރައީސް ޔާމީނު] ވިދާޅުވި އެތާ އެންމެންގެ ހާޒިރުގައި، ބްރިޖް ނުހުޅުވޭނޭ، މީގައި ސައިކަލަށް ވަކި ލޭނެއް ނެތޭ، ފިޒިކަލީ ވަކިން ބެރިއާ ކޮށްފައި ލޭނެއް އޮންނަން ބޭނުންވޭ، އެހެންނޫނިއްޔާ އެެކްސިޑެންޓްސްތައް ވާނޭ،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި އެމަނިކުފާނާމެދު ކޯފާވުމުގެ ކުރިން ވެސް ސައިކަލު ލޭނެއް ވަކިން އޮންނަން ޖެހޭނެ ކަމަށް ޔާމީނު ވިދާޅުވި އެވެ. އެފަހަރު އެވާހަކަ ދެއްކެވީ ބްރިޖު ކޮމިޓީގެ ބައްދަލުވުމެއްގަ އެވެ.
"ދެން އަޅުގަނޑުމެންނަށް ވަރަށް އުނދަގޫ ކަމަކަށްވި، ވަކި ލޭނެއް އެގޮތަށް ކަނޑައަޅަން، އަޅުގަނޑުމެން ކަނޑައަޅާފައި އެއޮތީ ސައިކަލު ލޭނަކާ ހެވީ ޓްރެފިކް، ހެވީ ވެހިކަލް ލޭނަކާ، ދެން މިހާރު ހަމަ އެއޮތީ އެގޮތަށް،" ރައީސް ވިދާޅުވި އެވެ.
ސައިކަލަށް ވަކި ލޭނެއް ހެދުމަކީ މަސައްކަތް އެެހިސާބަށް ދިއުމުން ދެން ކުރެވޭނެ ކަމަކަަށް ނުވާތީ ފަހުން ބެއްލެވީ ހިނގާފައިދާން މިހާރު އެ އޮތް ލޭނު ސައިކަލް ދުއްވާ ލޭނަކަށް ބަދަލުކުރެވޭތޯ ކަމަށް ވެސް ރައީސް މުއިއްޒު ވިދާޅުވި އެވެ. ރައީސް ވިދާޅުވީ އެގޮތަށް މަސައްކަތް ކުރެއްވީ ވެސް ޔާމީނު އަންގަވައިގެން ކަމަށެވެ.
"ދެން އަޅުގަނޑުމެން ފިޒިކަލީ ވެސް އެތަނުގެ މައްޗަށް ސައިކަލު އަރުވައިގެން ދުއްވޭތޯ ވެސް ބެލިން،" ރައީސް ވިދާޅުވި އެވެ.
އެހެން ނަމަވެސް އެތަނުގައި އަޅާފައި އޮންނަ ސްލެބަކީ ރައީސް ވިދާޅުވި ގޮތުގައި ސައިކަލް އަރުވަން އެކަށީގެންވާ ގޮތަށް އަޅާފައި އޮތް ސްލެބެއް ނޫނެވެ.
"އެއީ ހަމަ ބައިސްކަލް ދުއްވަން، ނޫނީ ހިނގަން ޑިޒައިންކޮށްފައި އޮތް ތަނެއް."
އެހެން ނަަމަވެސް އެ ލޭނު ސައިކަލް ދުއްވާ ގޮތަށް ބަދަލުކުރަން ޗައިނާ ސަރުކާރާ އެކުގައި މަޝްވަރާ ކޮށްފައިވާނެ ކަމަށާ އެހެން ނަމަވެސް އޭރު އޮތީ އެކަން ވާގޮތަކަށް ނޫން ކަމަށް ވެސް އެމަނިކުފާނު ވިދާޅުވި އެވެ.
ބްރިޖް ނުހުޅުވޭނެ ކަމަށް ޔާމީނު ވިދާޅުވުމުން އެހާ ބޮޑަށް ދެރަވީ އެވަރަށް މަސައްކަތް ކުރެއްވުމުން ވެސް ޔާމީނު ގަބޫލުނުކުރެއްވުމުން ކަމަށް ރައީސް ވިދާޅުވި އެވެ. ބްރިޖު ހުޅުވަން ނިންމި ތާރީހަށް ނުހުޅުވާ ނަމަ ޗައިނާއާއާ ރާއްޖެއާ ދެމެދު އޮތް ގުޅުމަށް ކުރާނެ އަސަރު ވިސްނިވަޑައިގެންނެވި ކަމަށް ވެސް ވިދާޅުވި އެވެ.
"ދެން ކްލިއަލީ ހަމަ ވިދާޅުވީ ޕްރޮޖެކްޓް، ނުހުޅުވާނަމޭ ބްރިޖެއް ނުހުޅުވާނަމޭ، ނިމުނީއޭ، އެހެން ވިދާޅުވެފައި މީޓީން ނިންމަވާލައްވައިފައި ވަޑައިގެންނެވީ. ދެން އެ ވާހަކައިގެ ތެރޭގައި އަޅުގަނޑަށް ވަރަށް ބޮޑު އަސަރެއް ކުރި، [އަބްދުއްރަހީމް] އެ ވިދާޅުވީ ރަނގަޅަށް، ހަމަ ރޮވުނު،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި ޔާމީނު އެ މޭރުމުން ވާހަކަ ދެއްކެވުމުން، ކީރިތިކުރެއްވުނު އިރު ވަޒީރުންނާއި މަޖިލީހުގެ މެމްބަރުން ހިމެނޭ ގޮތުން ސާޅީހަށް ވުރެ ގިނަ ބޭފުޅުން އެެ ބައްދަލުވުމުގައި ތިއްބެވި އެވެ.
ބްރިޖުގެ މަސައްކަތް ހައުސިން މިނިސްޓްރީއާ ހަވާލުކުރީ ސެޕްޓެމްބަރު، 2014، ގައި ކަމަށާއި އޭގެ ކުރިން އެ މަޝްރޫއާ ގުޅޭ ގޮތުން އޭރުގެ ސަަރުކާރުން ނިންމި ނިންމުންތައް އެނގިވަޑައިނުގަންނަވާ ކަމަށް ވެސް ރައީސް އިއްޔެ ވިދާޅުވި އެވެ. އެ މަަޝްރޫއު ހިންގާނީ ހައުސިން މިނިސްޓްރީން ކަމަށް ކަނޑައެޅީ އޭރު ފޮރިން މިނިސްޓްރީއަށް ފޮނުއްވި ސިޓީއެއްގައި ކަމަށް ވެސް އެމަނިކުފާނު ވިދާޅުވި އެވެ.
"އޭގެ ކުރިން އަޅުގަނޑަކީ މި މަޝްރޫއުގައި އެއްވެސް ވަރަކަށް ބައިވެރިވިމީހެއް ނޫން. މި ދެންނެވި ތާރީހަށް ފަހު އެ ޕްރޮޖެކްޓްގައި ހިނގި ހުރިހާ ކަމެއް އަޅުގަނޑަށް އެނގޭނެ. މި ދެންނެވި ތާރީހުގެ ފަހުން އެ ޕްރޮޖެކްޓުގައި އެއްވެސް ބަދަލެއް އިސްފިއްޔާ އަޅުގަނޑަށް އެނގޭނެ،" ރައީސް ވިދާޅުވި އެވެ.
އޭގެ ފަހުން އެ މަޝްރޫއަށް އެއްވެސް ބަދަލެއް އައިސްފައި ނުވާނެ ކަމަށް ވެސް ރައީސް ވިދާޅުވި އެވެ.
