ދެކުނު އޭޝިއާގެ ކަނޑުގެ ސަރަހައްދުގެ ސެކިއުރިޓީ ބަލަހައްޓަން އިންޑިއާ އާއި ސްރީލަންކާ އަދި ރާއްޖެ ގުޅިގެން އުފެއްދުމުގެ މަސައްކަތް ކުރަމުންދާ ކޮލޮމްބީ ސެކިއުރިޓީ ކޮންކްލޭވް ސެކްރެޓޭރިއެޓެއް އުފެއްދުމަށް އެއްބަސްވެ ތިން ގައުމުގެ ވެރިން ޗާޓަރެއްގައި މިއަދު ސޮއިކޮށްފި އެވެ.
ކޮލޮމްބޯ ސެކިއުރިޓީ ކޮންކްލޭވް ސެކްރެޓޭރިޓް އުފެއްދުމަށް އެއްބަސްވެ ޗާޓަރުގައި ރާއްޖޭގެ ފަރާތުން ސޮއި ކުރެއްވީ ރާއްޖޭގެ ނެޝަނަލް ސެކިއުރިޓީ އެޑްވައިޒާ، އިބްރާހިމް ލަތީފެވެ. އެ ޗާޓަރުގައި އިންޑިއާ، ސްރީލަންކާ އަދި މޮރިޝަސް އިން ސޮއިކުރި އެވެ.
ކޮލޮމްބޯ ސެކިއުރިޓީ ކޮންކްލޭވްއަކީ އިންޑިއާއިން ޕާކިސްތާނާ އެކު މަސައްކަތް ކުރަން ބޭނުން ނުވާތީ، ސަރަހައްދީ ޖަމިއްޔާ ސާކްގެ ބަދަލުގައި އުފެއްދުމުގެ މަސައްކަތް ކުރާ ޖަމިއްޔާ އެކެވެ. އެ ޖަމިއްޔާގެ މައިގަނޑު މަގުސަދަކީ ވެސް މެންބަރު ގައުމުތައް ގުޅިގެން ސަރަހައްދީ ސެކިއުރިޓީ ބެލެހެއްޓުމުގެ މަސައްކަތް ކުރުމެވެ.
ކޮލޮމްބޯ ސެކިއުރިޓީ ކޮންކްލޭވް އުފައްދަނީ މައިގަނޑު ފަސް ކަމެއްގެ މައްޗަށް ބިނާކޮށެވެ. އެއީ ޑިސާސްޓާ ރިލީފް އާއި ކައުންޓާ ޓެރަރިޒަމާއި ރެޑިކަލައިޒޭޝަނުގެ އިތުރުން ކޮމްބެޓް ޓްރެފިކިން އާއި ސައިބާ ސެކިއުރިޓީ އެވެ.
އެ ޖަމިއްޔާގައި ބައިވެރިވުމުގެ ފުރުސަތު ބަންގްލަދޭޝް އާއި ސީޝެލްސްއަށް ވެސް ވަނީ ދީފަ އެވެ.
ސްރީލަންކާގެ ވެރިރަށް، ކޮލަމްބޯގައި ބޭއްވި އެ ބައްދަލުވުން ނިންމާލީ ކޮންކްލޭވް ކުރިއަށް ގެންދާނެ ގޮތުގެ މަޝްވަރާތަކަށް ފަހު އެވެ.
