ރިޔާސީ ލޯންޗު "ފިނިފެންމާ" 2015 ވަނަ އަހަރު ގޮއްވާލުމުގެ އަޑީގައި ހުންނެވީ އެއިރުގެ ރައީސް އަބްދުﷲ ޔާމީން ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ތުހުމަތު ކުރައްވައިފި އެވެ.
"ސަންގު" ޓީވީއަށް ދެއްވި އިންޓަވިއުއެއްގައި ވެރިކަން ހިންގާ ޕީއެންސީގެ ޗެއާޕާސަން އަބްދުއްރަހީމް ވިދާޅުވީ، ޔާމީން އާއި އަނބިކަނބަލުން ފާތިމަތު އިބްރާހިމް ސެޕްޓެމްބަރު 28، 2015، ގައި ހުޅުލެއިން މާލެއަށް ދަތުރު ކުރެއްވި ލޯންޗު ގޮއްވާލުމުގެ އަޑީގައި ހުރީ ޔާމީންތޯ ސުވާލު އުފައްދަންޖެހޭ ކަމަށެވެ.
"ޔާމީން ވިދާޅުވީ ތިމަންނައަށް އިންޓެލިޖެންސް އެއްވެސް މައުލޫމާތެއް ނުދޭތާ ހަ މަސް ދުވަސް ފަހުންނޭ ބޮން ގޮވީ. މިއަދު [ކުރީގެ ޕޮލިސް ކޮމިޝަނަރު] ހުސެއިން ވަހީދު އެންމެ އަރިހުގައި [ހުންނެވީ]، އެންމެ އިތުބާރު ކުރައްވަނީ. އެހެންވީމަ މިއަދު ހަމަ އެބަ ދަންނަވަންޖެހޭ، ސުވާލު އުފައްދަންޖެހޭ ފިނިފެންމާ ލޯންޗު ގޮއްވާލުން މިއީ އަނެއްކާ ޔާމީން އިސްވެ ހުރެގެން ކުޅުނު ޑްރާމާއެއް ނޫންބާވައޭ،" އަބްދުއްރަހީމް ވިދާޅުވި އެވެ.
އެކަމާ ގުޅޭ ގޮތުން އިތުރަށް ވާހަކަ ދައްކަވަމުން އަބްދުއްރަހީމް ވިދާޅުވީ، "ފިނިފެންމާ" ގޮއްވާލުމުގެ ހާދިސާއަކީ ޔާމީން ކުޅުއްވި ޑްރާމާއެއް ނޫންތޯ ވެސް ސުވާލު އުފައްދަންޖެހޭ ކަމަށެވެ.
"މިހާރު ބައެއް ފަހަރު އެބަ ހީވޭ، އަޅުގަނޑަށް ހަމަ މިއަދު ދަންނަވަން ކެރިދާނެ ފިނިފެންމާ ލޯންޗު ގޮވުން މިއީ މިހާރު ޔާމީން ކުޅުނު ޑްރާމާއެއް ނޫންބާވައޭ. އެ ހިސާބަށް ޔާމީނުގެ ވާހަކަ ހިނގައްޖެ. އަޅުގަނޑުމެން އެންމެން ކައިރީގައި ޔާމީން ވިދާޅުވީ ލޯންޗު ގޮއްވާލީމާ ތިމަންނާއަށް ބޭރަށް ނުކުމެވުނީމަ ބޮޑު ފާލަމާ ދިމާލަށް ބަލާލިއިރު އެތަނުގައި ހުއްޓޭ ނޫ ކުލައިގެ ޓީޝާޓެއް ލައިގެން ހުރި މީހަކު، ތިމަންނައަށް ވަގުތުން އެނގުނޭ އޭނަކަން އެކަން ކުރީ،" އެމަނިކުފާނު ވިދާޅުވި އެވެ.
ޔާމީން 2008 ގައި އުފެއްދެވި ޕާޓީ ޕީޕަލްސް އެލަޔަންސް ގައި ވެސް އިސް ރޯލެއް އަދާ ކުރައްވައި، ކުރިން ޔާމީންއާއެކު ވަރަށް ގާތްކޮށް މަސައްކަތް ކުރެއްވި އަބްދުއްރަހީމް އެ އިންޓަވިއުގައި އިތުރަށް ވިދާޅުވީ، ކުރީގެ ރައީސްއަކީ "ސިޔާސީ ގޮތުން ވަރަށް ތަންދޮރު ނުދަންނަ ބޭފުޅެއް" ކަމަށެވެ.
"އަޅުގަނޑު ކުރީގަ ހިތަށް އަރާ ހަމަ ހަގީގަތުގައި ވެސް ހާދަ ސްމާޓް ބޭފުޅެކޭ ޔާމީންއަކީ. އެކަމަކު މިއަދު މިހާލަތަށް އައީމަ މި އެނގެނީ ވަރަށް ތަންދޮރު ނުދަންނަ ބޭފުޅެކޭ ޔާމީންއަކީ،" އަބްދުއްރަހީމް ވިދާޅުވި އެވެ. "ސިޔާސީ ގޮތުން ވަރަށް ތަންދޮރު ނުދަންނަ ބޭފުޅެއް ޔާމީންއަކީ."
ރައީސް ޑރ. މުހައްމަދު މުއިއްޒު ނޮވެމްބަރު، 2023، ގައި ވެރިކަމަށް ވަޑައިގެންނެވީ އެއިރު ހުކުމެއްގައި ހުންނެވި ޔާމީން އިންތިހާބުގައި ވާދަ ކުރެއްވުމަށް ޝަރުތު ހަމަނުވުމުންނެވެ. ޔާމީން މިނިވަން ކުރުމުގެ ވައުދާއެކު ވެރިކަމަށް ވަޑައިގެންނެވި ނަމަވެސް އެންމެ ހަފުތާއެއްގެ ތެރޭގައި ރައީސް މުއިއްޒާއި ޔާމީންއާ ދެމެދު ވަނީ މައްސަލަ ޖެހިފަ އެވެ.
އޭގެ ފަހުން ޔާމީން ވަނީ ޕީޕަލްސް ނެޝަނަލް ފްރަންޓުގެ ނަމުގައި އާ ސިޔާސީ ޕާޓީއެއް އުފައްދަވައިފަ އެވެ. އަދި މިހާރު އެމަނިކުފާނު ހަރަކާތްތެރިވެވަޑައިގަންނަވަނީ އިދިކޮޅު ސިޔާސީ ޕާޓީއެއްގެ ލީޑަރުގެ ގޮތުގަ އެވެ.
