ކައުންސިލްތަކުގެ ބާރު ކުޑަވާ ގޮތަށް ފަރުމާ ކޮށްފައިވާ, ބިނާވެށި ޕްލޭންކުރުމާއި ހިންގުމުގެ ބިލު ތަސްދީގު ނުކުރަން ކައުންސިލުތަކުގެ ޖަމިއްޔާ، މޯލްޑިވްސް ލޯކަލް ކައުންސިލް އެސޯސިއޭޝަން (އެމްއެލްސީއޭ) އިން ރައީސް ޑރ. މުހައްމަދު މުއިއްޒު އަށް މިއަދު ގޮވާލައިފި އެވެ.
އެމްއެލްސީއޭ އިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނޫނު އަތޮޅު ކައުންސިލުގެ ރައީސް މުހައްމަދު ބަޝީރު ވިދާޅުވީ ވަޒީރަށާއި މަޖިލިސް މެންބަރުންނަށް ވެސް ބިލުގައިވާ އެއްޗެއް ރަނގަޅަށް ނޭނގޭ ކަމަށެވެ. އަދި މި ބިލު ތަސްދީގު ނުކޮށް އަލުން މަޝްވަރާކުރުމަށް އެ އެސޯސިއޭޝަންގެ ފަރާތުން އޭނާ ގޮވާލެއްވި އެވެ.
"އަޅުގަނޑުމެން މި އެސޯސިއޭޝަން އިން ރައީސަށް މި ގޮވާލަނީ ބިނާވެށި ބިލުތަސްދީގު ނުކޮށް އަލުން އެ ބިލާ މެދު މަޝްވަރާ ކުރުމަށް. އަސްލު ހަގީގަތުގައި ވަޒީރު ބޭފުޅުންނާއި މަޖިލިސް މެންބަރުންނަށް ވެސް މި ބިލުގައި ވާގޮތެއް ނޭނގޭ،" ބަޝީރު ވިދާޅުވި އެވެ.
ބަޝީރު އިތުރަށް ފާހަގަކުރީ 2019 ގައި ގާނޫނަށް ގެނެވުނު އިސްލާހާއި އެކީގައި ކައުންސިލުތަކަށް ބާރުތަކެއް ލިބި ހިންގައި ގަނެވުނީ އަދިކިރިޔާ ކަމަށެވެ. ނަމަވެސް، މި ބިލުގެ ސަބަބުން އެ ބާރުތައް ހަނިވެ ކައުންސިލުތަކުން ހަދައިފާ ހުރި ލޭންޑް ޔޫސް ޕްލޭންތައް ބޭނުން ނުކުރެވޭނެ ކަމަށް އޭނާ ވިދާޅުވި އެވެ.
އެ ބައްދަލުވުމުގައި ބައިވެރިވި ބޭފުޅުން ވިދާޅުވީ މި ބިލުގެ ސަބަބުން އަތޮޅު ކައުންސިލުތައް އެއްކޮށް އެކަހެރިވެގެންދާ ކަމަށެވެ. އަދި ކައުންސިލުތަކަށް ލިބިގެންދާ އެތައް ބާރެއް ހިފެހެއްޓި ސަރުކާރުގެ އޮތޯރިޓީއެއްގެ ތެރެއަށް އެ ބާރުތައް ދާ ކަމާއި އަދި ރައްޔިތުންގެ އަޑު އެކީގައި ކެނޑިގެންދާނެކަމަށް މި ބޭފުޅުން ވިދާޅުވި އެވެ.
ބިނާވެށި ޕްލޭންކުރުމުގެ ބިލު މަޖިލީހުން ފާސްކުރީ އޮގަސްޓް 22، ގަ އެވެ. ބިނާވެށި ޕްލޭން ކުރުމުގެ ބިލު މަޖިލީހަށް ހުށަހެޅީ ޕީއެންސީއަށް ނިސްބަތްވާ ކޮލަމާފުށި ދާއިރާގެ މެންބަރު އިބްރާހިމް ދީދީ އެވެ. އެ ބިލު ފާސްކުރީ ވޯޓުގައި ބައިވެރިވި 79 މެންބަރުންގެ ތެރެއިން 67 ވޯޓުންނެވެ. ބިލާ ދެކޮޅަށް ވޯޓު ދިނީ 10 މެންބަރުންނެވެ.
