މީހުން ދިރިއުޅޭ ރަށްރަށުގައި މަސާޖުޕާލާތައް ހިންގަމުން ދަނީ ގަވާއިދާ ހިލާފަށް ކަމަށާއި މަސާޖުޕާލަތައް ގޮތަށް ހިންގާ ތަނެއް ދެން ފާހަގަކުރެވިއްޖެ ނަމަ ބަންދު ކުރާނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
ގަވާއިދާ ހިލާފަށް ރާއްޖޭގައި އުޅޭ ބިދޭސީން އަތުލައިގަތުމަށް މިހާރު ކުރިއަށް ގެންދާ ހާއްސަ އޮޕަރޭޝަނުުގެ އަދާހަމަ ހިއްސާ ކުރުމަށް ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިހުސާން ވިދާޅުވީ މީހުން ދިރިއުޅޭ ރަށްރަށުގައި މަސާޖުޕާލާއެއް ހިންގަން އެއްވެސް ފަރާތަކަށް މިހާތަނަށް ހުއްދަ ދީފައި ނުވާނެ ކަމަށެވެ.
"އަސްލު ރާއްޖޭގައި، މާލޭގައި ހާއްސަކޮށް މީހުން ދިރިއުޅޭ ރަށްރަށުގައި މަސާޖު ޕާލާއެއް ހިންގާކަށް ހުއްދައެއް ދީފައެއް ނުވާނެ. މި ހިންގަނީ ސެލޫންގެ ނަމުގައި ހިންގާ ތަންތަން. އެތަނުގައި ދެން މި ކުރެވެނީ މި ދެންނެވި ބާވަތުގެ މަސައްކަތްތައް،" އިހުސާން ވިދާޅުވި އެވެ.
ދިވެހިރާއްޖޭގައި ރެޖިސްޓަރީ ނުކޮށް ވިޔަފާރިއެއް ހިންގުމަކީ ވިޔަފާރި ރަޖިސްޓަރީކުރުމުގެ ގާނޫނުގައި ލާޒިމު ކޮށްފައިވާ ކަމެކެވެ. ރެޖިސްޓަރީ ނުކޮށް ވިޔަފާރިއެއް ހިންގާ ނަމަ އެބަޔަކާ މެދު ފިޔަވަޅު އެޅޭނެ ގޮތްތައް ވެސް ގާނޫނުގައި ބަޔާން ކޮށްފައިވެ އެވެ.
އިހުސާން ވިދާޅުވީ ކުރިއަށް އޮތް ތަނުގައި ޓާސްކްފޯސްއަށް އެފަދަ ތަނެއް ފާހަގަ ކުރެވިއްޖެ ނަމަ އެތަނެއް ބަންދު ކުރާނެ ކަމަށެވެ.
"ދެން މި ހިސާބުން މިއޮތީ އަސްލ ވިޔަފާރި ބަންދު ކުރެވޭ ހާލަތު އައިސްފައި. އެއީ ހުއްދަ ނުދޭ މަސައްކަތެއް އެތަނުގައި ކުރުން އަދި ހަށިވިއްކުން ނޫންކަމުގައިވިޔަސް، އެހެންވީމާ އަޅުގަނޑުމެން މިހާރު މިއަދުން ފެށިގެން ޓާސްކްފޯސުން ވަންނަ ކޮންމެ ތަނެއް ބަންދު ކުރާނަން މިކަހަލަ ކަމެއް ހިނގާކަން ފާހަގަކުރެވިއްޖެއްޔާ،" އިހުސާން ވިދާޅުވި އެވެ.
މީހުން ދިރިއުޅޭ ތަންތަނުގައި މަސާޖުޕާލާތައް ހިންގަނީ ގަވާއިދާ ހިލާފަށް ކަމަށް އިހުސާން ވިދާޅުވިއިރު، މިހާރު ވެސް މާލޭގަ އާއި ރާއްޖޭގެ އެކި ރަށްރަށުގައި މަސާޖު ޕާލާތައް ހިންގަމުންދެ އެވެ. އަދި، އެތަންތަނަށް ދޭތެރެދޭތެރެއިން ފުލުހުން ވަދެ، ހަށިވިއްކާ ކަމުގެ ތުހުމަތުގައި މީހުން ވެސް ހައްޔަރު ކުރެ އެވެ. ނަމަވެސް އެއިން އެއްވެސް ތަނެއް، ހިންގަނީ ރެޖިސްޓަރީ ނުކޮށް ކަމަށް ބުނެ ބަންދެއް ނުކުރެ އެވެ.
