ތިނަދޫ ސިޓީއަށް ދިމާވެފައިވާ ބޯހިޔާވެހިކަމުގެ މައްސަލަ ހައްލުކުރަން އިމާރާތްކުރާ 200 ހައުސިން ޔުނިޓަށް ކުރިމަތިލާން އަންނަ މަހު ހުޅުވާލާނެ ކަމަށް ސިޓީ ކައުންސިލުން މިއަދު އިއުލާންކޮށްފި އެވެ.
ތިނަދޫ ސިޓީ ކައުންސިލުގެ އިއުލާނުގައި ބުނީ ހައުސިން ޔުނިޓްތައް ދޫކުރުމުގެ އުސޫލާއި، ފޯމް ޕޯޓަލް މެދުވެރިކޮށް ހުށަހެޅުމުގެ ފުރުސަތު އަންނަ މަހުގެ އެކަކުން ފެށިގެން ހުޅުވާލާނެ ކަމަށެވެ.
"ތިނަދޫ ސިޓީ ކައުންސިލާއި، ސަރުކާރުން އެކަށައަޅާފައިވާ ސިޔާސަތުގެ ދަށުން ތިނަދޫ ސިޓީގެ ރައްޔިތުންނާއި، ތިނަދޫ ސިޓީއަށް ހިޖުރަކުރަން ބޭނުންވާ އެހެނިހެން ރައްޔިތުންނަށް ހާއްސަކޮށްގެން ތިނަދޫ ސިޓީގައި ސަރުކާރުން އިމާރާތް ކުރަމުންދާ 200 ހައުސިން ޔުނިޓް ދޫކުރަން އިއުލާން ކުރަން،" ސިޓީ ކައުންސިލުން ބުންޏެވެ.
ތިނަދޫގައި 200 ހައުސިން ޔުނިޓު 540 ދުވަސް ތެރޭގައި އިމާރާތް ކުރަން 253.9 މިލިއަން ރުފިޔާ އަށް 2022 ގައި ހަވާލުކުރީ ސިއެރާ ކޮންސްޓްރަކްޝަން އާއި ސްޓާ ކޮންސްޓްރަކްޝަންގެ ޖޮއިންޓް ވެންޗާ އަކާ އެވެ.
އެ މަޝްރޫއުގެ ދަށުން އިމާރާތްކުރާ ޔުނިޓެއްގައި ތިން ކޮޓަރި، ތިން ފާހަނާ، ސިޓިން ރޫމް، ބަދިގެ، ކާ ގެ، ލޯންޑަރީ އަދި ސްޓޯ ރޫމެއް ހުރެ އެވެ.
ތިނަދޫއަކީ ރާއްޖޭގެ ފަސްވަނަ އަށް އާބާދީ އެންމެ ބޮޑު ރަށެވެ. ގާތްގަނޑަކަށް 7،000 އަށް ވުރެ ގިނަ މީހުންގެ އުޅޭ ތިނަދޫގައި ބޯހިޔާވަހިކަމުގެ ދަތިކަން ވަނީ ބޮޑުވެފަ އެވެ. މީގެ ކުރިން އެ ރަށުގައި ގާއިމުކުރި 120 ހައުސިން ޔުނިޓަށް 2016 ގައި ހާހެއްހާ މީހުން ފޯމް ހުށަހެޅި އެވެ.
