ދައުލަތުގެ އާމްދަނީ އާއި ހަރަދުތައް ހިމަނައިގެން ފިނޭންސް މިނިސްޓްރީން ގަވާއިދުން ޝާއިއުކުރަމުން އައި ވީކްލީ ފިސްކަލް ޑިވެލޮޕްމަންޓު ރިޕޯޓުތައް އާންމުނުކުރާތަ މިއަދަށް ދެ މަސް ދުވަސް ވެއްޖެ އެވެ.
ފިނޭންސް މިިނިސްޓްރީން އެންމެ ފަހުން ވީކްލީ ފިސްކަލް ޑިވެލޮޕްމަންޓް ރިޕޯޓެއް އާންމުކުރީ މީގެ 60 ދުވަސް ކުރިން، ޖޫން 20 ގަ އެވެ. އެއީ މި އަހަރުގެ 25 ވަނަ ހަފުތާއާ ހަމައަށް މާލީ ހިސާބުތައް އަންގައިދޭ ރިޕޯޓެކެވެ. މިއީ އަހަރުގެ 34 ވަނަ ހަފުތާ އެވެ.
މި ރިޕޯޓުތައް ހާމަނުކުރާ މައްސަލައިގައި ފިނޭންސާ ސުވާލު ކުރުމުން ބުނީ ހިސާބުތައް އާންމުކުރުން ލަސްވަނީ ރީކޮންސިލިއޭޝަން މަސައްކަތް ކުރާތީ ކަމަށެވެ. އަދި މި މަސައްކަތް ނިންމުމަށް ފަހު ނިމުނު މަހުގެ ފަހު ހަފުތާގައި އެ ރިޕޯޓުތައް އާންމުކުރާނެ ކަމަށް ބުންޏެވެ.
އެކަމަކު އެ ތާރީހަށް ވެސް އެއްވެސް ރިޕޯޓެއް އާންމު ނުކުރެ އެވެ. ފިނޭންސުން ވަނީ މިކަމާ ގުޅޭ ގޮތުން އެއްވެސް މުއާމަލާތެއް ކުރުން ވެސް ހުއްޓާލާފަ އެވެ. މިއަދު ވެސް ފިނޭންސުގެ ވެބްސައިޓުގެ އެ ރިޕޯޓުތައް ހުންނަ ބަޔަށް ވަނުމުން ފެންނަ އޮތީ ރީކޮންސިލިއޭޝަން މަސައްކަތް ނިންމާ، ޖުލައި ހަތަރު ވަނަ ހަފުތާގައި އާންމު ކުރާނެ ކަމަށް ބުނެ ޖަހާފައި އޮތް ނޯޓިހެވެ.
މާލީ ހިސާބުތަކުގެ ރިޕޯޓުތައް އާންމު ކުރުން ފިނޭންސުން ހުއްޓާލާފައިވާއިރު، ގައުމުގެ މާލީ މުސްތަގުބަލާ މެދު ގިނަ ކަންބޮޑުވުންތަކެއް އެބަހުއްޓެވެ. މި ކަންބޮޑުވުންތައް އިތުރުވީ މަސް ނިމެންވާއިރަށް ބޭނުންކުރެވޭ ޑޮލަރު ރިޒާވު ހުސްވެދާނެ ކަމަށް އެމްއެމްއޭއިން ފިނޭންސް މިނިސްޓްރީގައި އިލްތިމާސްކުރުމުންނެވެ.
އެމްއެމްއޭގެ އެންމެ ފަހުގެ ތަފާސްހިސާބުތަކުން ދައްކާ ގޮތުގައި މިދިޔަ މަހުގެ ނިޔަލަށް ބޭނުންކުރެވޭ ރިޒާވުގައި ހުރީ 43 މިލިއަން ޑޮލަރެވެ. މިއީ މިހާރު ދައްކަން ހުރި ދަރަންޏާއި ޒަރޫރީ އިމްޕޯޓަށް ކުރަން ޖެހޭ ހަރަދުތައް މަހަކަށް ކުރެވޭ ވަރަށް ވުރެ ވެސް ދަށް އަދަދެކެވެ.
މިކަމާ ގުޅޭ ގޮތުން "އަދަދު" އާ ވާހަކަ ދެއްކި މާލީ ދާއިރާގެ ތަޖުރިބާކާރުން ބުނީ ކުރިއަށް އޮތް ދުވަސްތަކުގެ ތެރޭގައި ޑޮލަރު ނުލިބިއްޖެ ހާލަތެއްގައި ދެން ސަރުކާރަށް އޮންނާނެ ގޮތަކީ ސޮވްރިން ޑިވެލޮޕްމަންޓު ފަންޑުގައި ހުރި ޑޮލަރުތައް ބޭނުންކުރުން ކަމަށެވެ.
ސަރުކާރުން ހާމަކޮށްފައިވާ ގޮތުގައި ސޮވްރިން ފަންޑުގައި 65 މިލިއަން ޑޮލަރު އެބަހުއްޓެވެ. މި މަހުގެ ތެރޭގައި ދައުލަތަށް ވަންނަން ޖެހޭ ޑޮލަރު އާމްދަނީ ލިބުމުން ވެސް މިކަމަށް ކޮންމެވެސް ވަރެއްގެ ލުޔެއް ލިބޭނެ އެވެ.
