ކުރީގެ ޖެންޑާ މިނިސްޓްރީގެ ސްޓޭޓް މިނިސްޓަރު ޒިފްލީނާ ހުސެއިން ލަގްޒަރީ ފްލެޓެއް ބައްލަވައިގަތް މައްސަލައިގައި އެންޓި ކޮރަޕްޝަން ކޮމިޝަން (އޭސީސީ) އިން އޭނާއާ އެއްވެސް މުއާމަލާތެއް ނުކުރާ ކަމަށް ޒިފްލީނާ ވިދާޅުވެއްޖެ އެވެ.
ޒިފްލީނާގެ ލަގްޒަރީ ފްލެޓުގެ މައްސަލަ އޭސީސީން ބަލަން ފެށީ، އާންމުންގެ މީހަކު މި މައްސަލަ ފުލުހަށް ހުށަހެޅުމުން، ފުލުހުންގެ އިދާރާއިން އޭސީސީއަށް މައްސަލަ ފޮނުވުމުންނެވެ.
ހުސްވި ހަފުތާގެ ތެރޭގައި އޭސީސީން ވަނީ މި މައްސަލައިގައި ދައުވާ ކުރުމާ މެދު ގޮތެއް ނިންމަން ޕްރޮސެކިއުޓާ ޖެނެރަލް (ޕީޖީީ) އޮފީހަށް ފޮނުވާފަ އެވެ. މި މައްސަލައާ ގުޅޭ އިތުރު އެއްވެސް ތަފުސީލެއް އެ ކޮމިޝަނުން މީޑިއާތަކާ ހިއްސާނުކުރެ އެވެ.
މިކަމާ ގުޅޭ ގޮތުން "އަދަދު" އަށް މައުލޫމާތު ދެއްވަމުން ޒިފްލީނާ ވިދާޅުވީ އޭސީސީން މިހާތަނަށް އޭނާ އެއްވެސް ސުވާލެއް ނުކުރާ ކަމަށެވެ. އަދި މައްސަލައާ ގުޅޭ ގޮތުން މިހާތަނަށް އެނގޭ މައުލޫމާތެއް އެނގެނީ މީޑިއާގައި ހުރި ހަބަރުތަކުން ކަމަށް އޭނާ ވިދާޅުވި އެވެ.
"އެއްވެސް ސުވާލެއް ނުކުރޭ. މިހާތަނަށް އެއްވެސް މުއާމަލާތެއް ނުކުރޭ" ޒިފްލީނާ ވިދާޅުވި އެވެ.
ޒިފްލީނާއަށް ކުރެވޭ ތުހުމާތާ ގުޅިގެން ސުވާލުކުރުމުން އޭނާ ވިދާޅުވީ އޭސީސީން އޭނާއާ އެއްވެސް ސުވާލެއް ނުކުރާތީ ވަކި އެއްޗެއް ބުނަން ނެތް ކަމަށެވެ. ނަމަވެސް މިއީ "ޒާތީ މައްސަލައެއް" ކަމަށް އޭނާއަށް ގަބޫލުކުރެވޭ ކަމަށް ވެސް ޒިފްލީނާ ވިދާޅުވި އެވެ.
އެ މައްސަލައާ ގުޅޭ ގޮތުން އެއްޗެއް ވިދާޅުވީ ނުވި ނަމަވެސް ޒިފްލީނާ ވަނީ އޭނާއަކީ ފްލެޓު ނުގަނެވޭ ވަރުގެ މީހެއް ނޫން ކަން އޭނާ ދަންނަ އެންމެނަށް އެނގޭނެ ކަމަށް ވިދާޅުވެފަ އެވެ. އަދި އޭނާއަކީ ފުރާވަރު އުމުރުން ފެށިގެން ވަޒީފާ އަދާކުރަމުން އަންނަ މީހެއް ކަމަށް ވެސް އޭނާ ފާހަގަކުރެއްވި އެވެ.
"އަޅުގަނޑަކީ ފްލެޓެއް ނުގަނެވޭ ވަރުގެ މީހެއް ނޫން. އުމުރުން 16 އަހަރުން ފެށިގެން ވަޒީފާ އަދާކުރަމުން އަންނަ މީހެއް އަޅުގަނޑަކީ. އިހަށް ދުވަހު ސްކޫލް ނިންމި ކުދިން ވެސް ފްލެޓު ގަނެފައި އެބަހުއްޓެއް ނޫންތޯ؟" އޭނާ ވިދާޅުވި އެވެ.
މި މައްސަލަ ފެންމަތިވީ ފައިސާ ދެއްކުމުން ފުލެޓުގެ މިލްކުވެރިކަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ޒިފްލީނާގެ ނަން މައްޗަށް ބަދަލުކުރަން ސިވިލް ކޯޓުން ކުރި ހުކުމާ ގުޅިގެންނެވެ. އެއާއެކު މި ސަރުކާރާ ގުޅުން އޮތް މީހުންނާއި އާންމުން ދިޔައީ މި މައްސަލަ ބަލަން ގޮވާލަމުންނެވެ.
ސިވިލް ކޯޓުގެ ހުކުމުން އެނގޭ ގޮތުން ޒިފްލީނާ ފްލެޓު ބައްލަވައިގަތީ، ހުޅުމާލޭގައި ހުންނަ އެފްޑަބްލިއު ރެސިޑެންސްއިން 3.5 މިލިއަން ރުފިޔާއަށެވެ.
