މިއުނިކް (އޮގަސްޓް 17) - ވިންސެންޓް ކޮމްޕެނީގެ ކޯޗުކަމުގައި ބަޔާން މިއުނިކުން ކުޅުނު ފުރަތަމަ މެޗުގައި، ޖަރުމަނު ކަޕުން ބަޔާނުން އުލްމް އަތުން 4-0 އިން މޮޅުވެއްޖެ އެވެ.
މިދިޔަ ސީޒަނުގައި ބާންލީ އަށް ކޯޗުކޮށްދިން މެންޗެސްޓާ ސިޓީގެ ކުރީގެ ކެޕްޓަން، ކޮމްޕެނީ، ބަޔާނާ ހަވާލުވީ، ތިން އަހަރުގެ ކޮންޓްރެކްޓެއްގަ އެެވެ. ޕްރީ ސީޒަނުގައި ބަޔާނުން ވަނީ ކޮމްޕެނީއާ އެކު، ޖުމްލަކޮށް ރަނގަޅު ކުޅުމެއް ދައްކައިފަ އެވެ.
ޖަރުމަނު ކަޕްގައި ރޭ ދެ ވަނަ ޑިވިޝަންގެ އުލްމްއާ ދެކޮޅަށް ކުޅުނު މެޗުގައި ބަޔާނުން މެޗުގެ ކޮންޓްރޯލް ނަގައިގެން ކުޅެ ލަނޑު ޖަހާނެ ގިނަ ފުރުސަތުތަކެއް ހޯދައިފައިވެ އެވެ.
ބަޔާނުން ވަނީ ފުރަތަމަ 15 މިނިޓް ތެރޭ ދެ ލަނޑު ޖަހައިފަ އެވެ. މި ލަނޑުތައް ޖެހީ ތަޖުރިބާކާރު ފޯވާޑް، ތޯމަސް މުލާ އެވެ. މުލާގެ ދެ ވަނަ ގޯލަަށް ފުރުސަތު ތަނަވަސްކޮށްދިނީ ސާޖް ގްނާބްރީ އެވެ. މެޗުގައި ބަޔާނުން ޖެހި އަނެއް ދެ ގޯލު ޖެހީ މެޗުގެ ފަހުކޮޅުގަ އެވެ.
މެޗުގެ 79 ވަނަ މިނިޓްގައި ބަޔާންގެ ތިން ވަނަ ލަނޑު ޖެހީ ކިންގްސްލީ ކޯމަން އެެވެ. މިއީ ބަޔާނާ މި ފަހަރު ކުޅުނު މައިކަލް އޮލީސޭ ދިން ބޯޅައަކުން ކޯމަން ޖެހި ގޯލެކެވެ. އިތުރު ވަގުތުގެ ތިން ވަނަ މިނިޓްގައި ބަޔާންގެ ފަހު ގޯލު ޖެހީ ހެރީ ކޭން އެވެ. މި ލަނޑު ޖަހަން ފުރުސަތު ހޯދައިދިނީ މެޗުގައި މޮޅު ކުޅުމެއް ދެއްކި މުލާ އެވެ.
މިދިޔަ ސީޒަނަކީ ބަޔާނުން 2012 ވަނަ އަހަރުގެ ފަހުން، ތަށްޓެއް ނުހޯދައި ސީޒަނެއް ނިންމާލި ފުރަތަމަ ފަހަރެވެ. ބަޔާނަށް 2019-20 ވަނަ ސީޒަނުގެ ފަހު، ޖަރުމަނު ކަޕްގެ ކުއާޓާ ފައިނަލް ފަހަނައަޅައި ދެވޭގޮތެއްނުވެ އެވެ. އެހެންކަމުން، މި ފަހަރު އެ ޓީމާ ހަވާލުވެ، ކޮމްޕެނީ އަށް މި އޮތީ ޗެލެންޖިން މަސައްކަތެކެވެ.
ބަޔާނާ ދެކޮޅަށް ކުޅުނު އުލްމް ވަނީ މިދިޔަ ސީޒަނުގައި ދެއްކި ކުޅުމާ އެކު، 23 އަހަރު ފަހުން، ދެ ވަނަ ޑިވިޝަނަށް ޕްރޮމޯޓްވެފަ އެެވެ.
