ސަރުކާރުގެ ފަރާތުން ކުރިއަށްގެންދާ މަޝްރޫއުތަކުގެ ބޭރުން ރާއްޖޭގައި ބިން ހިއްކުމަށް ނަގާ ވެލިން ކޮންމެ ކޮޑިމީޓަރަކަށް ދެ އެމެރިކާ ޑޮލަރު ނަގަން ނިންމައިފި އެވެ.
މިއީ ދައުލަތުގެ އާމްދަނީ އިތުރުކުރުމުގެ ގޮތުން ސަރުކާރުން އަޅަން ނިންމާފައިވާ ފިޔަވަޅުތަކުގެ ތެރެއިން ތަންފީޒުކުރާ ކަމެކެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ފިނޭންސް މިނިސްޓްރީން ހިއްސާކުރި މައުލޫމާތުތަކުން އެނގޭ ގޮތުގައި މި ފީ ނަގަން ފަށާނީ އަންނަ އަހަރުގެ ޖެނުއަރީ މަހުގެ ފުރަތަމަ ދުވަހުން ފެށިގެންނެވެ.
"ވެއްޔަކީ އޭގެ ޒާތުގައި އިއާދަވާ ވަސީލަތަކަށް ވިޔަސް, އެ ސަރަހައްދުގައި ކުރިން ހުރި މިންވަރަށް ވެލި ޖަމާވުމަށް އެތަކެއް އަހަރުތަކެއް ނަގާ," ފިނޭންސްގެ ކަރުދާހުގައި ލިޔެފައިވެ އެވެ.
މިކަން ތަންފީޒު ކުރުމުގެ ގޮތުން ވެއްޔާއި, ގަލާއި އަކިރި ނެގުމާއި ބޭނުންކުރުމާ ބެހޭ ބިލު ގާނޫނަކަށް ބަދަލުކުރުމަށް ވެސް ވަނީ ނިންމާފަ އެވެ.
ފިނޭންސް މިނިސްޓްރީން އަންދާޒާކުރާ ގޮތުގައި މި ފީ ނަގަން ފެށުމާއެކު ކޮންމެ އަހަރަކު ވެސް ދައުލަތުގެ އާމްދަނީއަށް 262.1 މިލިއަން ރުފިޔާ އިތުރުވާނެ އެވެ.
