މިއަދަކީ ސަރުކާރު ބަންދު ދުވަހެއް ކަމަށް ރައީސް އޮފީހުން ކަނޑައެޅުއްވުމުން ދަރުމަވަންތަ ހޮސްޕިޓަލާއި، އައިޖީއެމްއެޗް އަދި ވިލިމާލެ ހޮސްޕިޓަލުގެ އޯޕީޑީ އަދި އެހެނިހެން ކްލިނިކަލް ހިދުމަތްތައް ބަންދުކޮށްފި އެވެ.
އައިޖީއެމްއެޗް އިން "އެކްސް" ގައި ކުރި ޕޯސްޓެއްގައި ބުނީ މޫސުން ގޯސްވުމާ ގުޅިގެން މިއަދު ރައީސް އޮފީހުން ސަރުކާރު ބަންދު ކުރައްވާފައިވާތީ އެ ހޮސްޕިޓަލުތަކުން ދެއްވަމުން ގެންދާ އޯޕީޑީ ހިދުމަތްތައް ބަންދުވާނެ ކަމަށެވެ.
"އޯގަސްޓު މަހުގެ 14 ވާ ބުދަ ދުވަހަކީ ސަރުކާރު ބަންދު ދުވަހެއް ކަމަށް ރައީސް އޮފީހުން ކަނޑައަޅުއްވާފައިވާތީ ދަރުމަވަންތަ ހޮސްޕިޓަލާއި، އައިޖީއެމްއެޗް އަދި ވިލިމާލެ ހޮސްޕިޓަލުގެ ސްޕެޝަލިސްޓް އޯޕީޑީ އަދި އެހެނިހެން ހިދުމަތްތައް ބަންދުވާނެ" އެ ޕޯސްޓުގައި ބުނެފައިވެ އެވެ.
އައިޖީއެމްއެޗްގެ ސްޕެޝަލިސްޓް ޑޮކްޓަރުންނަށް ދެއްކުމަށް އެޕޮއިންޓްމެންޓް ހެއްދުމަކީ ވަރަށް ދަތި ކަމެކެވެ. އެތައް ދުވަހެއް މަޑު ކުރުމަށްފަހު އެޕޮއިންޓްމެންޓް ހަމަޖެހޭއިރު މިގޮތަށް ކެންސަލް ކުރުމުން ބައެއް އާންމުން ދަނީ ފާޑުކިޔަމުންނެވެ.
މިކަމާ ގުޅޭގޮތުން އައިޖީއެމްއެޗްއަށް ގުޅުމުން އެ ހޮސްޕިޓަލުގެ އޮފިޝަލަކު ބުނީ މިއަދަށް ހުރި އެޕޮއިންޓްމެންޓްތައް ކެންސަލްކޮށް ރީޝެޑިއުލް ކުރެވިފައިވާ ކަމަށެވެ. އެޕޮއިންޓްމަންޓުތައް ރީޝެޑިއުލް ކުރީ އަންނަ ހަފުތާއަށް ކަމަށާއި މިއަދަށް ކުރަން ހަމަޖެހިފައި ހުރި އޮޕެރޭޝަންތައް ވެސް ލަސްކުރެވިފައިވާ ކަމަށް އޭނާ ބުންޏެވެ.
އޯޕީޑީ އަދި އެހެނިހެން ކްލިނިކަލް ހިދުމަތްތައް ބަންދުކަމުގައި ވިޔަސް އައިޕީޑީ އަދި އިމަޖެންސީ ހިދުމަތްތައް ލިބޭނެ ކަމަށް އައިޖީއެމްއެޗްއިން ބުންޏެވެ.
