މާލޭ ސަރަހައްދަށް އިއްޔެ ބޯކޮށް ވާރޭ ވެހުނު ނަމަވެސް މިއަދު އެވަރަށް ވާރޭ ނުވެހޭނެ ކަމަށް މޫސުމާބެހޭ ގައުމީ އިދާރާ، މޯލްޑިވްސް މީޓިއޮރޮލޮޖިކަލް ސާވިސްއިން ބުނެފި އެވެ.
ވިއްސާރަ ވިލާގެ ބަނަކަން ފިލައި، މިއަދު މާލެއަށް އިރުގެ އަލިކަން ވަނީ ލިބެން ފަށައިފަ އެވެ. ނަމަވެސް މާލޭ ސަރަހައްދަށް ވަރަށް ވައިގަދަ އެވެ. އަދި ކަނޑުވެސް ގަދަ އެވެ.
"ކުރިއަށް އޮތް 24 ގަޑިއިރަށް ބަލާއިރު އިއްޔެ ވީ ކަހަލަ ވިއްސާރައެއް [މާލެއަށް] ނުވާނެ. ކޮންމެވެސް ވަރަކަށް ވިއްސާރަ ވެހޭނެ، ބަނަކޮށް އުޅެނީ ވެސް، ނަމަވެސް އިއްޔެ ވީ ވަރެއް ނުވާނެ،" އެޓު އޮފީހުގެ އޮފިޝަލަކު ވިދާޅުވި އެވެ.
މެޓު އޮފީހުން ބުނީ މާލޭ ސަރަހައްދަށް ރީނދޫ އެލާޓު ނެރެފައިވަނީ ވައި ބާރުވުމުގެ ސަބަބުން ކަމަށެވެ.
މިއަދު ހެނދުނު 6:00 އިން ފެށިގެން 10:00 އާ ހަމައަށް ރީނދޫ އެލާޓު ނެރެފައި ވަނީ ހއ. އިން ފެށިގެން އދ. އަތޮޅުގެ ނިޔަލަށެވެ. އެ ސަރަހައްދުތަކަށް ގަޑިއަކު 25 މޭލާއި 30 މޭލުގެ ބާރުމިނުގައި ވައި ޖެހި، ވިލާގަނޑުގައި 50 މޭލަށް ވައިގަދަ ވާނެކަމަށް އަދި ކަނޑުތައް ވަރަށް ބޮޑަށް ގަދަވާނެ ލަފާކުރެ އެވެ.
އެހެން ސަރަހައްދުތަކަށް ވެސް ގަޑިއަކު 15 މޭލާއި 25 މޭލުގެ ބާރުމިނުގައި އަދި ކޮޅިގަނޑުގައި 45 މޭލުގެ ބާރުމިނުގައި ވައިޖެހޭނެ ކަމަށް ލަފާ ކުރެ އެވެ.
ކުރިއަށް އޮތް 24 ގަޑިއިރު ބޮޑަށް ވިއްސާރަ ކުރާނެ ކަމަށް ބެލެވެނީ ދ. އަތޮޅުން ފެށިގެން ދެކުނުގެ އަތޮޅުތަކަށް ކަމަށް މެޓު އޮފީހުން ބުންޏެވެ.
މާލެ އަށް އިއްޔެ ބޯކޮށް ވާރޭވި، އަދި މިއަދު ވެސް ބޯކޮށް ވާރޭ ވެހިދާނެ ކަމަށް ލަފާކުރެވިފައި އޮތުމުން، ސަރުކާރުގެ އޮފީސްތަކާއި ސްކޫލްތައް ވަނީ ބަންދުކޮށްފަ އެވެ.
މިހާރު ރާއްޖެއަށް ކުރަމުންދާ ވިއްސާރާގައި މާލޭގެ 252 ގެއެއްގައި ފެން ބޮޑުވެފައިވާ ކަމަށާއި 20 ރަށަކުން އެކިވަރުގެ ގެއްލުންވެގެން ރިޕޯޓުކޮށްފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓު އޮތޯރިޓީ (އެންޑީއެމްއޭ) ބުނެފައިވެ އެވެ.
