ހެދިކާއެއްގެ ތެރޭގައި އޮތް ފުޅިތޮށިގަނޑަކުން ކުއްޖަކު ޒަހަމްވެއްޖެ އެވެ.
މި ހާދިސާ ހިނގާފައި ވަނީ އިއްޔެ ހަވީރު ގދ. ތިނަދޫގަ އެވެ. ތިނަދޫ އަންހެނަކު އެ ވާހަކަ އޭނާގެ ފޭސްބުކްގައި ހިއްސާކޮށްފައި ވަނީ ފޮޓޯތަކާއެކު އެވެ.
"މިއީ ވަރަށް ދެރަ ކަންތައްތައް. މިއަދު ހަވީރު ސުމަން ފިހާރައިން ގަތް ހެދިކާ ކޭއިރު، ފުޅިތޮށިގަނޑެއް އަނގައަށް ވަދެ، ކޮއްކޮއަކު އަނގައިގެ އެތެރެ ކަފައިގެން ގޮސްފައި. މިއީ މިރަށު ވަރަށް ގިނަ މީހުން ހެދިކާ ގަންނަ ތަނެއް. ހެދިކާ ވިއްކާއިރު ސާފުތާހިރު ކަމަށް ބަލަން އެބަ ޖެހޭ،" އޭނާ ލިޔެފައިވެ އެވެ.
ހެލްތު މިނިސްޓްރީ އާއި، ތިނަދޫ ކައުންސިލް އަދި މޯލްޑިވްސް ފުޑް އެންޑް ޑްރަގު އޮތޯރިޓީ ޓެކްކޮށްފައިވަ އެ ޕޯސްޓު ގިނަ ބަޔަކު ޝެއާކޮށްފައި އެވެ.
ޝެއާކުރި ފޮޓޯއިން ފެންނަ ގޮތުގައި ފުޅިތޮށިގަނޑުން ޒަހަމްވީ ކުޑަ ކުއްޖެކެވެ.
