ކުށުގެ ވެށިން ޒުވާނުން ސަލާމަތްކޮށް ރައްކާތެރިކުރުމަށް ސަރުކާރުން ތަރައްގީ ކުރާ "ހޯޕް އައިލެންޑް" ގެ ކުރެހުން ނިންމާލައިފި އެވެ.
"ހޯޕް އައިލެންޑް" އަކީ ގޭންގު ކުށްތަކުގައި ޖެހޭ ސުކޫލް ކުދިންނާއި ކުށުގެ މާހައުލުގައި އުޅޭ ޒުވާން ކުދިން ބޭތިއްބުމަށް ތަރައްގީ ކުރާ ރަށެވެ. އެކަން ކުރާނީ ދ. ވާނީގައި ކަމަށް ސަރުކާރުން ބުނެ އެވެ.
މި ޕްރޮޖެކްޓު ކުރެހުމުގެ މަސައްކަތް ނިމިފައިވާއިރު އަންނަ ހަފްތާގެ ތެރޭގައި މަސައްކަތަށް ފައިނޭންސް ކުރާނެ މޮޑެލް އިކޮނޮމިކް ކައުންސިލަށް ހުށަހެޅާނެ ކަމަށް މިނިސްޓަރު އަލީ އިހުސާން ވިދާޅުވި އެވެ.
"ކުރިއަށް އޮތީ ފައިނޭންސް ކުރާނެ މޮޑެލް އިކޮނޮމިކް ކައުންސިލަށް ހުށަހެޅުން އަދި އެ މަސައްކަތް މިފެށޭ ހަފްތާގެ ތެރޭގައި ކުރެވޭނެ،" އިހުސާން ވިދާޅުވި އެވެ.
އަދުލުގެ ނިޒާމް ފުރިހަމަ ކުރުމަށްޓަކައި ޖިނާއީ ކުށުގެ ޒިންމާ ނަގަން ޖެހޭ އުމުރު ކަމަށް މިހާރު ކަނޑައަޅާފައިވާ 15 އަހަރުގެ ބަދަލުގައި 12 އަހަރަށް ދަށްކުރުމަށް ވެސް ސަރުކާރުން ވަނީ ނިންމަވައިފަ އެވެ.
ގާނޫނު މިހާރު އޮތް ގޮތުން ވެސް އުމުރުން 15 އަހަރާއި 18 އަހަރާ ދެމެދުގެ ކުދިން ޖިނާއީ މަސްއޫލިއްޔަތު އަދާކުރަން ޖެހެ އެވެ. ނަމަވެސް، ކުށުގެ ޒިންމާ އުފުލާ އުމުރު ދަށްކުރަނީ 12 އަހަރާއި 15 އަހަރާ ދެމެދުގެ ކުދިން ކުށްތަކަށް ވަންނަ މިންވަރު އިތުރުވެފައިވާތީ އެވެ.
ގާނޫނަށް ބަދަލުތައް ގެނައި ނަމަވެސް އުމުރުން 12 އަހަރާއި 15 އަހަރާ ދެމެދުގެ ކުދިން ޖަލަށް ލުމުގެ އެއްވެސް ވިސްނުމެއް ނޯންނާނެ ކަމަށް ސަރުކާރުން ބުނެ އެވެ. އެ ބަދަލުތައް ގެންނައިރު ގާނޫނުގައި އެކަން ބަޔާންކުރާނެ ކަމަށް ވެސް ސަރުކާރުން ބުނެ އެވެ.
ގާތްގަނޑަކަށް 400 ކުދިން "ހޯޕް އައިލެންޑް" ގައި ރިހެބިލިޓޭޓް ކުރެވޭއިރު، 18 އަހަރު ވަންދެން ކުދިން އެ ރަށުގައި އުޅޭނެ އެވެ. ސަރުކާރުން ނިންމަވާފައި ވަނީ އެކުދިންނަށް 18 އަހަރުވުމުން ދިވެހި ފުލުހުން ނުވަތަ ދިވެހި ސިފައިންގެ ވަޒީފާއެއް ހަމަޖައްސައިދިނުމަށެވެ.
